މިއަދު ފެށި ވެރިކަން ކުރާ ޕީޕަލްސް ނެޝަނަލް ކޮންގްރެސްގެ މަތީ މަޖިލިސް ނުވަތަ ކޮންގްރެސްގައި އިދިކޮޅު މޯލްޑިވިއަން ޑިމޮކްރެޓިކް ޕާޓީގެ ޗެއާޕާސަން ކުރީގެ ރައީސް މުހައްމަދު ނަޝީދު ބައިވެރިވެވަޑައިގެންފި އެވެ.
ނަޝީދުގެ އިތުރުން މޯލްޑިވްސް ނެޝަނަލް ޕާޓީގެ ލީޑަރު މުހައްމަދު ނާޒިމް އާއި އަދާލަތު ޕާޓީގެ ފަރާތުން ވެސް އެ ކޮންގްރެސްގައި ބައިވެރިވި އެވެ. ނަމަވެސް ކުރީގެ ރައީސް އަބްދުﷲ ޔާމީންގެ ޕީޕަލްސް ނެޝަނަލް ފްރަންޓުން ކޮންގްރެސްއަށް މަންދޫބަކު ނުފޮނުވަ އެވެ.
"ބައެއް ސަބަބުތަކާހުރެ އެހެން ޕާޓީތަކުގެ ލީޑަރުންނަށް ބައިވެރިވެވަޑައިނުގެންނެވުނު. އަޅުގަނޑު ހަމަ އަޅުގަނޑުމެންގެ ޕާޓީގެ ނަންފުޅުގައި ޕާޓީގެ ލީޑާޝީޕްގެ ނަމުގައި އަދި ޕާޓީގެ ހުރިހާ ލޮބުވެތި މެންބަރުންގެ ނަމުގައި، އަޅުގަނޑުމެންގެ ދައުވަތު ގަބޫލު ކުރައްވާ ދިވެހިރާއްޖޭގެ ސިޔާސީ ޕާޓީތަކުގެ ތެރެއިން ސިޔާސީ މަސައްކަތުގައި ކުރައްވާ ޕާޓީތަކުގެ ތެރެއިން އަޅުގަނޑުމެންގެ ދައުވަތު ގަބޫލު ކުރައްވާ ތިން ޕާޓީގެ ވެރިންނަށް ވަރަށް ބޮޑަށް ޝުކުރު ދަންނަވަން،" ޕީއެންސީގެ ލީޑާޝިޕް މެންބަރު އިބްރާހިމް ފަލާހު ވިދާޅުވި އެވެ.
ޕީއެންސީގެ ކޮންގްރެސްގައި އެ ޕާޓީގެ އަސާސީ ގަވާއިދަށް ގެނައި ބަދަލުތައް ވަނީ އެންޑޯޒްކޮށްފަ އެވެ. އެ ބަދަލުތަކުގެ ތެރޭގައި އެ ޕާޓީއަށް ގުނަވަންތައް އިތުރުކުރުން ހިމެނެ އެވެ. އޭގެ ތެރޭގައި ދީނީ އިލްމުވެރިންގެ މަޖިލިސް، އަންހެނުންގެ ހަރަކާތް، ޒުވާނުންގެ ހަރަކާތް އަދި އިސްރަށްވެހިންގެ ހަރަކާތް ހިމެނެ އެވެ.
މީގެއިތުރުން ޖުމްލަ 15 ކޮމިޓީއެއް އުފައްދަން ވެސް އަސާސީ ގަވާއިދު ވަނީ އިސްލާހުކޮށްފަ އެވެ. އެ ކޮމިޓީތައް އުފެއްދީ ގައުމީ މުހިންމު ކަންކަމުގައި ޕާޓީގެ ސިޔާސަތުތައް ކަނޑައެޅުމަށްޓަކައި ޕާޓީގެ ރައީސްއަށާއި ލީޑާޝިޕަށް އަދި މެންބަރުންނަށް ލަފާދިނުމަށެވެ.
ޕީއެންސީން ބުނީ މި އިސްލާހުތައް ގެނައީ ޕާޓީގެ މެންބަރުން އިތުރުވެފައިވާތީ އެކަމަށް ރިޔާޔަތްކުރެވި، އެކި ދާއިރާތަކަށް އަމާޒު ކުރެވިގެން ޕާޓީގެ ހަރަކާތްތައް އުފައްދައި ގައުމަށް ލާބަހުރި މަގުން ޕާޓީ ހިންގައި، ޕާޓީގެ އިސް ސަފުން ޕާޓީގެ މެންބަރުންނަށް އޮންނަ ޖާގަ ފުޅާކޮށް މެންބަރުންގެ ޝާމިލުކަން އިތުރުކުރަން ކަމަށެވެ.
މިގޮތުން މި އިސްލާހުތަކުގެ ސަބަުން ލީޑާޝިޕްގައި ހިމެނޭ އަދަދު އިތުރުވެ މިންތީގެ އަދި ގިންތީގެ ޝާމިލުކަން އިތުރުވެ، ޕާޓީގެ ގުނަވަންތަކުގެ ހަރަކާތްތެރިކަން ވެސް އިތުރުވާނެ ކަމަށް ޕީއެންސީން ބުންޏެވެ.
ޕީއެންސީގެ އަސާސީ ގަވާއިދު ޖެނުއަރީ 27، 2019 ގައި ފާސްކުރި ފަހުން އަސާސީ ގަވާއިދަށް ޖުމްލަ ހަތް އިސްލާހެއް ވަނީ ގެނެސްފަ އެވެ. އިސްލާހުތައް ގެނައީ އެޕްރީލް 26، 2019 ގައި އާއި ޖޫން 23، 2022 ގައި އާއި އޮގަސްޓް 3، 2023، ގައި އާއި އޮކްޓޯބަރު 4، 2023 ގައި އާއި މެއި 15، 202، ގައި އަދި އޮގަސްޓް 6، 2026، ގަ އެވެ.
ހަތަރު ދުވަހަށް ދެމިގެންދާ ޕީއެންސީގެ ކޮންގްރެސްގައި މުހިންމު ގުނަވަންތަކަށް މެންބަރުން ހޮވުމަށް ބާއްވާ ވޯޓުލުން ކުރިއަށްގެންދާނެ އެވެ.
ޕީއެންސީގެ ކޮންގްރެސް އިފްތިތާހުކޮށްދެއްވީ ރައީސުލްޖުމްހޫރިއްޔާ އަދި ޕީއެންސީގެ ރައީސް މުހައްމަދު މުއިއްޒެވެ. ކޮންގްރެސް އިފްފތިތާހުކޮށްދެއްވުމަށްފަހު ވާހަކަ ދައްކަވަމުން މުއިއްޒު ވިދާޅުވީ، ޕާޓީގެ މެންބަރުން މަސައްކަތް ކުރަންޖެހޭނީ "ގައުމީ މަސްލަހަތު އިސްކޮށް، ޕާޓީގެ މަސްލަހު ކުރިއަށް ނެރެ" ކަމަށެވެ.
ޕީއެންސީގެ ކޮންގްރެސްގައި 12 މަގާމަށް މެންބަރުން ހޮވާނެ އެވެ. އޭގެ ތެރެއިން އެންމެ މުހިންމު މަގާމަކީ ނައިބު ރައީސުންގެ މަގާމުތަކެވެ. ޕީއެންސީއަށް ހަ ނައިބު ރައީސަކު އިންތިހާބު ކުރާއިރު އަށް ބޭފުޅަކު ވަނީ ނައިބު ރައީސްގެ މަގާމަށް ކުރިމަތިލައިފަ އެވެ.
