ދައުލަތުގެ ޓެކްސް އިދާރާ، މޯލްޑިވްސް އިންލެންޑް ރެވެނިއު އޮތޯރިޓީ (މީރާ) އިން މިދިޔަ މަހުގެ ތެރޭގައި ބަލައިގަތް 108.3 މިލިއަން ޑޮލަރު (1.6 ބިލިއަން ރުފިޔާ) އާ އެކީ، މިދިޔަ މަހުގެ ނިޔަލަށް 976.6 މިލިއަން ޑޮލަރު (15.1 ބިލިއަން ރުފިޔާ) ލިބިފައިވާ ކަމަށް އެ އިދާރާގެ އެންމެ ފަހުގެ އާމްދަނީގެ ރިޕޯޓުން ދައްކައިފި އެވެ.
މީރާއިން ޝާއިއުކޮށްފައިވާ ޖުލައި މަހުގެ މަންތުލީ ރެވެނިއު ކަލެކްޝަން ރިޕޯޓުގައިވާ ގޮތުގައި، ޓެކްސްތަކުން 756 މިލިއަން ޑޮލަރު (11.6 ބިލިއަން ރުފިޔާ) ލިބިފައިވާއިރު، ޓެކްސް ނޫން އާމްދަނީތަކުން 220.6 މިލިއަން ޑޮލަރު (3.4 ބިލިއަން ރުފިޔާ) ލިބިފައިވެ އެވެ. މިއީ މިދިޔަ އަހަރުގެ މި މުއްދަތުގެ ތެރޭގައި ލިބުނު 898.2 މިލިއަން ޑޮލަރު (13.8 ބިލިއަން ރުފިޔާ) އަށް ވުރެ، 8.7 ޕަސެންޓުގެ އިތުރުވުމެކެވެ.
މި އާމްދަނީގެ ގާތްގަނޑަކަށް ދެ ބައި ކުޅަ އެއް ބައި (47 ޕަސެންޓު) އަކީ ޓޫރިޒަމް ދާއިރާގެ މުދަލާއި ހިދުމަތުން ނަގާ ޓެކްސް (ޓީޖީއެސްޓީ) ގެ ގޮތުގައި ރިސޯޓުތަކާއި ގެސްޓުހައުސްތަކާއި އެހެން ޓޫރިޒަމް ވިޔަފާރިތަކުން ދައްކާފައިވާ ފައިސާ އެވެ. ޓީޖީއެސްޓީގެ ގޮތުގައި މި އަހަރު 468.4 މިލިއަން ޑޮލަރު (7.2 ބިލިއަން ރުފިޔާ) ލިބިފައިވެ އެވެ.
ޓީޖީއެސްޓީ ނަގާފައި ދެން އެންމެ ގިނަ އަދަދަކަށް ޑޮލަރު ލިބިފައި ވަނީ ވިޔަފާރިތަކާއި އާންމު ފަރުދުންގެ އަތުން ނަގާ އާމްދަނީގެ (އިންކަމް) ޓެކްސް އިންނެވެ. އިންކަމް ޓެކްސްގެ ގޮތުގައި މި އަހަރު 120.1 މިލިއަން ޑޮލަރު (1.8 ބިލިއަން ރުފިޔާ) ލިބިފައިވެ އެވެ.
ޑޮލަރުން ލިބުނު އާމްދަނީ (މިދިޔަ މަހުގެ ނިޔަލަށް)
- ޓީޖީއެސްޓީ - 468.4 މިލިއަން ޑޮލަރު
- އިންކަމް ޓެކްސް - 120.1 މިލިއަން ޑޮލަރު
- ގްރީން ޓެކްސް - 88.3 މިލިއަން ޑޮލަރު
- އެއާޕޯޓު ޑިވެލޮޕްމަންޓު ފީ - 78.9 މިލިއަން ޑޮލަރު
- އެއާޕޯޓު ޑިޕާޗާ ޓެކްސް - 78 މިލިއަން ޑޮލަރު
- ޓޫރިޒަމް ލޭންޑް ރެންޓް - 77.6 މިލިއަން ޑޮލަރު
މި އަހަރު ވެސް ދައުލަތުގެ އާމްދަނީ އިތުރުވެ، ރެކޯޑު އަދަދަކަށް ޑޮލަރު ލިބިފައި ވިޔަސް، ރާއްޖޭގެ ތާރީހުގައި މިހާ ޑޮލަރު ތާށި ދުވަސްވަރެއް ނާދެ އެވެ.
އެ ގޮތުން ރަސްމީ ރޭޓަކީ 15.42ރ. ނަމަވެސް، އާންމުންނާއި ވިޔަފާރިތަކުން ބޭނުންކުރާ ޑޮލަރުގެ ބޮޑު ބަޔެއް ހޯދަން ބަރޯސާވާ ކަޅު ބާޒާރު ނުވަތަ ޕެރެލަލް މާކެޓުގައި ޑޮލަރެއްގެ އަގު ހުރީ 22.60ރ. އަށެވެ. މިއީ ދިވެހި ތާރީހުގައި ދުވަހަކު ވެސް ޑޮލަރުގެ އަގު ނުއުފުލޭ ވަރެކެވެ.
މީރާއަށް ޑޮލަރުން ލިބުނު އާމްދަނީ
- ޖެނުއަރީ - 180.4 މިލިއަން ޑޮލަރު (2.8 ބިލިއަން ރުފިޔާ)
- ފެބްރުއަރީ - 126.8 މިލިއަން ޑޮލަރު (1.9 ބިލިއަން ރުފިޔާ)
- މާޗު - 205.1 މިލިއަން ޑޮލަރު (3.2 ބިލިއަން ރުފިޔާ)
- އޭޕްރިލް - 120.7 މިލިއަން ޑޮލަރު (1.9 ބިލިއަން ރުފިޔާ)
- މެއި - 88.5 މިލިއަން ޑޮލަރު (1.4 ބިލިއަން ރުފިޔާ)
- ޖޫން - 118.5 މިލިއަން ޑޮލަރު (1.8 ބިލިއަން ރުފިޔާ)
- ޖުލައި - 108.3 މިލިއަން ޑޮލަރު (1.7 ބިލިއަން ރުފިޔާ)
ސަރުކާރުން ބުނަނީ މި ހުރިހާ ވެސް މައްސަލައަކީ ކުރިން ވެރިކަމުގައި އޮތް އެމްޑީޕީ ސަރުކާރުން އަށް ބިލިއަން ރުފިޔާ ޗާޕުކުރުމާ ގުޅިގެން އިގުތިސޯދުގައި އުފެދިފައިވާ ހާލަތަކެވެ. ނަމަވެސް ގިނަ މާހިރުން ބުނަނީ މިއީ އޭރު ފައިސާ ޗާޕުކޮށްފަ އޮއްވާ، އެ ޕްރެޝަރު ކުޑަކުރަން ސަރުކާރަށް ހަރަދުތައް ކޮންޓްރޯލް ނުކުރެވުމުގެ ސަބަބުން އިތުރަށް ގޯސްވީ ހާލަތެއް ކަމަށެވެ.
