ޑޮލަރު ތާށިކަމަށް ލުޔެއް ހޯދައި ދިނުމުގެ ގޮތުން ބޭންކުތަކަށް ހަފުތާއަކު ދޫކުރާ އެމެރިކާ ޑޮލަރުގެ މިންވަރު 51 އިންސައްތަ އިތުރުކުރުމަށް މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން މިއަދު ނިންމައިފި އެވެ.
އެމްއެމްއޭއިން ބުނީ މި ބަދަލު ގެނައި ބޭންކިން ނިޒާމުގެ ތެރެއިން ބޭރު ފައިސާ ލިބުން އިތުރަށް ފަސޭހަކޮށްދިނުމުގެ ގޮތުންނާއި ބޭރު ފައިސާގެ ބާޒާރަށް އިތުރު ލުޔެއް ހޯދައިދިނުމުގެ ގޮތުން ކަމަށެވެ.
މި ބަދަލުތަކާ އެކީ މި ހަފުތާއިން ފެށިގެން ކުރިއަށް އޮތް ތިން ހަފުތާ ވަންދެން ބޭންކުތަކަށް އިތުރަށް ޑޮލަރު ދޫކުރާނެ އެވެ. އަދި، މިއީ މުދާ އިމްޕޯޓު ކުރުމަށް ބޭނުންވާ ފައިސާ ހޯދުމުގައި ވިޔަފާރިތަކަށް ކުރިމަތިވާ ދަތިތަކަށް ހައްލެއް ހޯދައިދިނުމަށް އެޅި ފިޔަވަޅެއް ކަމަށް މަރުކަޒީ ބޭންކުން ބުންޏެވެ.
އެމްއެމްއޭއިން ބުނި ގޮތުގައި، އެ އިދާރާއިން އަންނަނީ އިރާނު ހަނގުރާމައާ ގުޅިގެން ރާއްޖެއަށް ޑޮލަރު ވަންނަ މިންވަރު މަދުވުމާ ގުޅިގެން، ޑޮލަރު ފިއްތުންތަކަށް ކުޑަކުރުމަށް ފިޔަވަޅުތަކެއް އަޅަމުންނެވެ.
އެ ގޮތުން، ރޯދަ މަހާ ދިމާކޮށް ޒަރޫރީ ކާބޯތަކެތި އިމްޕޯޓްކުރާ ވިޔަފާރިވެރިންނަށް އެހީތެރިވުމަށާއި އަގުތައް އެއްވަރެއްގައި ހިފެހެއްޓުމަށްޓަކައި ބޭންކުތަކަށް ދޫކުރާ ޑޮލަރުގެ މިންވަރު 32 ޕަސެންޓަށް އިތުރުކުރި އެވެ. އަދި، ޓޫރިޒަމްގެ އޮފް-ސީޒަނާ ދިމާކޮށް ވިޔަފާރިތަކަށް އިތުރު އެހީތެރިކަން ފޯރުކޮށްދިނުމުގެ ގޮތުން މިދިޔަ ޖޫން މަހު ވެސް، ހަފުތާއަކު ދޫކުރާ ޑޮލަރުގެ މިންވަރު 26 އިންސައްތަ އިތުރުކުރި އެވެ.
އެމްއެމްއޭއިން މި ފިޔަވަޅު އަޅާފައި މި ވަނީ ޑޮލަރު ތާށިކަން ބޮޑުވެ، ތާރީހުގައި ނުވެއްޓޭ ވަރަށް ދިވެހި ރުފިޔާގެ އަގު ވެއްޓިފައިވާ ދަނޑިވަޅެއްގަ އެވެ. އެ ގޮތުން ރަސްމީ ރޭޓު 15.42ރ. ގައި ހިފެހެއްޓިފައި ހުއްޓަސް، ކަޅު ބާޒާރުން ޑޮލަރު ލިބޭ ރޭޓު އުޅެނީ 22.25ރ. ގައި އެވެ.
އެމްއެމްއޭއިން ވަނީ ބޭންކިން ނިޒާމުގެ ތެރެއަށް ވަންނަ ޑޮލަރު އިތުރުކުރަން ބޭރު ފައިސާގެ ގާނޫނަށް ބަދަލުތަކެއް ވެސް ހުށަހަޅާފަ އެވެ.
އެ އިދާރާއިން މިއަދު އިއުލާންކުރި ބަދަލުތަކުގައި ހުށަހަޅަނީ ރިސޯޓުތަކަށް އަންނަ ކޮންމެ ޓޫރިސްޓެއްގެ ބޮލަކަށް 500 ޑޮލަރު މާރުކުރަން އޮންނަ އިހުތިޔާރު އުވާލާށެވެ. މި ބަދަލު ގެނައުމުން ހުރިހާ ރިސޯޓުތަކުން ވެސް ޖެހޭނީ ލިބޭ އާމްދަނީގެ 20 ޕަސެންޓު މާރުކުރާށެވެ.
