ރާއްޖޭގެ ބޭރު ފައިސާގެ އެކްސްޗޭންޖްގެ ހާލަތު އިންތިހާއަށް ގޯސްވަމުންދާތީ، އެކަމާމެދު އެމްއެމްއޭގެ ގަވަރުނަރު، އަހުމަދު މުނައްވަރު މަޖިލީހަށް ހާޒިރުކޮށްދިނުމަށް އިދިކޮޅު އެމްޑީޕީން މިއަދު އެދިއްޖެ އެވެ.
އެމްޑީޕީން މަޖިލިސް ރައީސް އަބްދުއްރަހީމް އަބްދުﷲ އަށް އެޑްރެސްކުރައްވައި ފޮނުވި ސިޓީގައި ބުނީ ރާއްޖޭގެ ފައިސާގެ އަގު ހިފެހެއްޓުމާއި، ފޮރިން އެކްސްޗޭންޖްގެ އޮނިގަނޑާ ނިޒާމް ރެގިއުލޭޓްކޮށް މޮނިޓާ ކުރުމަކީ އެމްއެމްއޭގެ މަސްއޫލިއްޔަތަކަށްވާއިރު، އެމްއެމްއޭގެ އެންމެ އިސް ފަރާތެއްގެ ހައިސިއްޔަތުން ގަވަނަރު އާންމުންނަށް ޖަވާބުދާރީވެވަޑައިގަންނަވަންޖެހޭ ކަމަށެވެ.
ދިވެހި ރުފިޔާގެ އަގަށް އަންނަ ހުރިހާ ބަދަލަކީ އެމްއެމްއޭގެ ބާރު ހިނގާ ކަންކަމެއް ނޫން ކަމަށްވާއިރު، ސަރުކާރުގެ ހަރަދުތަކާ، ދަރަންޏާ، އިމްޕޯޓްކުރާ މިންވަރާ، ބޭރު ފައިސާގެ އާމްދަނީއަކީ ވެސް މިކަމާ ގުޅުން ހުރި ކަންކަން ކަމަށް އެމްޑީޕީން ބުންޏެވެ.
"މިކުރިމަތިވެފައިވާ ޑޮލަރުގެ ތާޢްޓަކީ، ސަރުކާރުގެ ސިޔާސަތުގެ ސަބަބުން ބޮޑުވަމުންދާ މައްސަލައެއްނަމަ، އެކަންވެސް ހާމަކުރެވެންވާނެ. ޒިންމާ ނަގަންޖެހޭ ފަރާތެއް ޒިންމާ ނަގަންޖެހޭނެ. ސަރުކާރުން ސަރުކާރުގެ ސިޔާސަތުތަކާމެދު ޖަވާވުދާރީ ވާންޖެހޭނެ. އެމްއެމްއޭގެ ޕާފޯމަންސާ މަސައްކަތަށް އެމުއައްސަސާގެ ފަރާތުން ގަވާނަރު ޖަވާބުދާރީވާންވާނެ،" އެ ޕާޓީން ބުންޏެވެ.
ޑޮލަރުގެ އަގު ބޮޑުވުމަކީ ހަމައެކަނި ބޭންކުތަކާ ފައިސާ މާރުކުރާ ފަރާތްތަކަށް އެކަނި ކުރިމަތިވާ މައްސަލައެއް ނޫންކަން ފާހަގަކޮށް އެމްޑީޕީން ބުނީ އެއީ ދިރިއުޅުމުގެ އަގާ ގުޅިފައިވާ، ކޮންމެ ގޭބިސީއަކާ ގުޅިފައިވާ ބޮޑު މައްސަލައެއް ކަމަށެވެ.
ކަޅު ބާޒާރުަގައި ޑޮލަރުގެ އަގު 22.25ރ. އަށް އަރައިފި
ރާއްޖޭގެ ކަޅު ބާޒާރުގައި ޑޮލަރުގެ އަގު ފުރަތަމަ ފަހަރަށް 22.25 ރުފިޔާއަށް އުފުލި، ޑޮލަރު ލިބުމުގެ ދަތިކަން ވަނީ އިންތިހާއަށް ބޮޑުވެފައި. މިއީ ރަސްމީ ރޭޓަށްވުރެ 44 ޕަސަންޓް ބޮޑު އަދަދެއް ކަމަށްވާއިރު، ޑޮލަރުގެ މައްސަލަ ހައްލުކުރަން ސަރުކާރުން އާ ސިޔާސަތުތަކެއް ކަނޑައެޅި ނަމަވެސް ޑޮލަރުގެ އަގު ދަނީ ހުއްޓުމެއްނެތި މައްޗަށް.
ރާއްޖެއަކީ ބޭނުންކުރާ ހުރިހާ އެއްޗެއްހެން އިމްޕޯޓްކުރާ ގައުމަކަށްވީ ހިނދު، ވިޔަފާރިތަކަށް ހަމަ އަގުގައި ޑޯލަރު ނުލިބުމުން ދެކޮޅު ޖެއްސުމަށްޓަކައި ތަކެތީގެ އަގަށް ބަދަލު ގެންނަން މަޖުބޫރުވާ ކަމަށް އެމްޑީޕީން ބުންޏެވެ. އެ ޕާޓީން ބުނީ އެ ހަރަދުތައް އިތުރުވަނީ އާންމު ދިރިއުޅުމަށް ތަކެތި ގަންނަ ރައްޔިތު މީހާއަށް ކަމަށެވެ.
މި ހަފްތާ ފެށުނުއިރު ޑޮލަރުގެ އަގު ވަނީ 22ރ. އަށް އަރައިފަ އެވެ. އެގޮތުން އާދީއްތަ ދުވަހު ޑޮލަރުގެ އަގު 22.10ރ. އަށް ހުރިއިރު، 48 ގަޑިއިރު ތެރޭގައި 15 ލާރި މިވަނީ އިތުރުވެފަ އެވެ.
މިދިޔަ ޖުލައި މަހުގެ 29 ވަނަ ދުވަހު ކަޅު ބާޒާރުގައި ޑޮލަރުގެ އަގު 21.70 ރުފިޔާގައި ހުރުމަށްފަހު، ފާއިތުވި ދުވަސްތަކުގައި އަގު ވަނީ މަޑުމަޑުން އުފުލެން ފަށައިފަ އެވެ. މި މިދިޔަ ހަފުތާ ނިމުނުއިރު، ޑޮލަރެއްގެ އަގު ހުރީ 21.85ރ. ގަ އެވެ. އެއީ ވެސް މީގެ ކުރިން ރާއްޖޭގައި ޑޮލަރުގެ އަގު ނުއުފުލޭ މިންވަރެކެވެ.
މަރުކަޒީ ބޭންކު، މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން ޑޮލަރު ވިއްކުމަށް ކަނޑައަޅާފައިވާ ރަސްމީ ރޭޓަކީ 15.42ރ. އެވެ. ކަޅު ބާޒާރުގެ މިހާރުގެ އަގަށް ބަލާއިރު، މިއީ ރަސްމީ ރޭޓަށްވުރެ 6.83ރ. ބޮޑު އަދަދެކެވެ. މިއީ އިންސައްތައިން ބަލާނަމަ ރަސްމީ ރޭޓަށްވުރެ 44.29 ޕަސެންޓުގެ ބޮޑުވުމެކެވެ.
ޑޮލަރުގެ އަގަށް އަންނަ ބަދަލުތައް އަދަދު ނޫހުގެ ޑޮލަރު ޓްރެކަރ މެދުވެރިކޮށް ވަގުތުން ބަލާލެވޭނެ އެވެ.
