ޑޮލަރު ސައްލާ: އަގު އުފުލެނީ ބޭރުން ފައިސާ ހޯދަން ނުކުޅެދި، އެތެރޭގެ މާކެޓުން ޑޮލަރު ނަގައިގެން ދަރަނި ދެއްކުމުން

ރާއްޖޭގެ ކަޅު ބާޒާރުގައި ޑޮލަރުގެ އަގު އުފުލެމުން ދަނީ ސަރުކާރުގެ ސިޔާސަތުތައް ފެއިލްވެ ބޭރުން ފައިސާ ހޯދުމަށް ނުކުޅެދުމުން ކަމަށް އިގުތިސާދީ މާހިރުން ބުނެފި އެވެ.

ސަންގު ޓީވީ އާއި އަދަދު ނޫސް ގުޅިގެން މިރޭ ކުރިއަށް ގެންދިޔަ 'ޑޮލަރު ސައްލާ' ގައި ވާހަކަދައްކަވަމުން ކުރީގެ ޗީފް ބަޖެޓު އެގްޒެކެޓިވް، އަހުމަދު ޝަރުވަސް އާދަމް ވިދާޅުވީ ރާއްޖެއިން ބޭރުން ފައިސާ ހޯދޭ އޮންނަނީ ތިން ގޮތެއް ކަމަށެވެ.

އެއްގޮތަކީ ސީދާ މާކެޓުން ފައިސާ ހޯދުން ކަމަށާއި އެކަން ކުރެވެނީ އެ ގައުމެއްގެ އިގުތިސާދަކަށް އިންވެސްޓަރުންގެ އިތުބާރު ހޯދޭނެ ގޮތްތަކެއް ހޯދަންޖެހޭ ކަމަށް އޭނާ ވިދާޅުވި އެވެ. އެގޮތުން، ސަރުކާރާއި މަރުކަޒީ ބޭންކުން އެ ގައުމެއްގެ މުޅި އިގުތިސާދު މެނޭޖުކުރާނެ ގޮތާއި އެކަން ކުރާ ގޮތުގެ ރަނގަޅު އިންޑިކޭޓާތަކެއް ދައްކަންޖެހޭ ކަމަށް އޭނާ ވިދާޅުވި އެވެ.

ބޭރުގެ ރޭޓިން އޭޖެންސީތަކުން ގައުމުތަކުގެ ކްރެޑިޓް ރޭޓިން މަތިކޮށް ދަށްކުރަނީ އެކަންކަމުގެ މައްޗަށް ބެލުމަށްފަހު ކަމަށް އޭނާ ވިދާޅުވި އެވެ.

"މާކެޓު އެކްސެސް ބައެއްފަހަރު ގެއްލޭ، އޭގެ އެއް ސަބަބެއް މިސާލަކަށް ރޭޓިން ދެފަހަރު ދަށްވީމާ އެ އޮތީ ދެން ގާތްގަނޑަކަށް ގެއްލިފައި މާކެޓު އެކްސެސް. ދެން އޮތް ސޯސްއަކީ ބައިލެޓްރަލް ސޯސަސް، އެއީ ރާއްޖޭގެ ފޮރިން ޕޮލިސީގެ ތެރެއިން ކުރަންޖެހޭ ކަމެއް،" ސަރުވަޝް ވިދާޅުވި އެވެ.

އޭނާ ވިދާޅުވީ ބޭރުގެ ގައުމުތަކާ އޮންނަ ގުޅުމުގެ ތެރެއިން ވެސް މި ސަރުކާރަށް އެއްވެސް ފައިސާއެއް ނުހޯދުނީ، މި ސަރުކާރުގެ ފޮރިން ޕޮލިސީ ފެއިލްވީމާ ކަމަށެވެ.

ތިންވަނަ ގޮތަކީ، އައިއެމްއެފް ފަދަ މާލީ އިދާރާތަކުން ފައިސާ ހޯދުން ކަމަށް ސަރުވަޝް ވިދާޅުވި އެވެ. ނަމަވެސް، އެ ތަންތަނުން ފައިސާ ނަގާނަމަ. އެ ބޭފުޅުން ގަބޫލުކުރާވަރުގެ ރީފޯމް ފިޔަވަޅުތަކެއް އަޅަންޖެހޭނެ ކަމަށެވެ. ނަމަވެސް، މި ސަރުކާރުން އެ މަންޒަރު ވެސް ނުފެނުނު ކަމަށް އޭނާ ވިދާޅުވި އެވެ.

"އަޅުގަނޑުމެންނަށް ފެނުނީ މާލީ އިދާރާތަކާ އޮތް ގުޅުން ވެސް ހީނަރުވެ އެ ބޭފުޅުންނާ ވެސް ވާހަކަނުދައްކާ ހަމަ އެ ބޭފުޅުންނާ އެއްވެސް ޑައިލޮގެއް ނުބާއްވާ ދިޔަތަން، ބައިލެޓްރަލީ ވެސް ހަމަ ގައުމުތަކާ ގުޅުން ގޯސްވެ އެ ބޭފުޅުންގެ ފަރާތުން މަޝްރޫއުތަކަށް ވެސް ފައިސާ ނުލިބޭ އަދި ބަޖެޓު ސަޕޯޓަށް ވެސް ފައިސާ ނުލިބޭ ގޮތަށް [އަމަލުކުރަމުންދިޔަތަން]،" ސަރުވަޝް ވިދާޅުވި އެވެ.

އެ ހާލަތަށް ދިޔުމުން ދެން އޮންނަ ހަމައެކަނި ގޮތަކީ ރާއްޖޭގެ އެތެރޭގެ މާކެޓުގައި ހުންނަ ފައިސާއިން ދަރަނި ދެއްކުން ކަމަށާއި އެގޮތަށް އަމަލުކުރުމުން، ގައުމުގެ އެތެރޭގެ ބޭނުންތަކަށް ކޮންމެހެން ބޭނުންވާ ވަރަށްވުރެ ބޭރުފައިސާ މަދުވާ ކަމަށް އޭނާ ވިދާޅުވި އެވެ.

"ދެން އޮންނާނެ ހަމައެކަނި ގޮތަކީ [ދަރަނި] އަނބުރާ ދައްކަންޖެހޭ ދުވަހު އަޅުގަނޑުމެންގެ އަތުގައި ހުރި ހުރިހާ އެއްޗެއް ހޯދައިގެން ދެއްކުމެއްނޫންތޯ؟" ސަރުވަޝް ވިދާޅުވި އެވެ.

ރިޒާވާއި އެސްޑީއެފް ބޭނުންކޮށްގެން ސުކޫކަށް 500 މިލިއަން ޑޮލަރު ދައްކައިފި

އެސްޑީއެފްގައި ހުރި ފައިސާ އާއި ރިޒާވު ބޭނުންކޮށްގެން ސުކޫކު ދެއްކި ކަމަށް ފިނޭންސުން ބުނި ނަމަވެސް އޭގެ ތަފުސީލުތަކެއް ނުދޭ.

ދިވެހިރާއްޖެއިން މި އަހަރުގެ އޭޕްރިލްގައި ދައްކަންޖެހޭ 500 މިލިއަން ޑޮލަރާއި ސުކޫކުގެ ފައިދާއަށްވާ ރޭޓަށްވާ 24.68 މިލިއަން އެމެރިކާ ޑޮލަރާއެކު ޖުމްލަ 524.68 މިލިއަން އެމެރިކާ ޑޮލަރު ސަރުކާރުން ދައްކައި ހަލާސްކުރީ އެޕްރީލް 2، ގަ އެވެ. 

މީގެ ފަސް އަހަރު ކުރިން އެމްޑީޕީ ސަރުކާރުގައި ވިއްކި މި ބޮންޑަކީ އޭގެ ކުރީ ސަރުކާރުން ނަގާފައިވާ 250 މިލިއަން ޑޮލަރުގެ "ސަނީ ސައިޑް" ބޮންޑް އަދާކުރަން ވިއްކި ބޮންޑެކެވެ.

ރިޒާވާއި އެސްޑީއެފްގައި ހުރި ފައިސާ ބޭނުންކޮށްގެން ސުކޫކަށް އަނބުރާ ފައިސާ ދެއްކުމަކީ ސަރުކާރުގެ ޕްލޭން ކަމަށް ރައީސް މުހައްމަދު މުއިއްޒު ހާމަކުރެއްވީ، މާޗު 2 ގައި، ރައީސް އޮފީހުގައި ބޭއްވެވި ނޫސްވެރިންގެ ބައްދަލުވުމުގައި އެވެ. އެ ދުވަހު ރައީސް ވިދާޅުވީ އެސްޑީއެފްގައި 320 މިލިއަން ޑޮލަރު އަދި ޔޫސަބަލް ރިޒާވުގައި ހުރި 330 މިލިއަން ޑޮލަރު އެބަހުރި ކަމަށެވެ.