ބޭސްފަރުވާގެ ބޭނުމަށް ބެންކް އޮފް މޯލްޑިވްސް (ބީއެމްއެލް) އިން އެވްރެޖުކޮށް މަހަކު ވިއްކާ ޑޮލަރުގެ އަދަދު މިލިއަނަކުން ތިން މިލިއަން ޑޮލަރަށް އިތުރުވެފައިވާ ކަމަށް އެ ބޭންކުން ބުނެފި އެވެ.
ޕީއެސްއެމް އިން ގެނެސްދިން ޕްރޮގްރާމެއްގައި ބީއެމްއެލްގެ ހެޑް އޮފް ބްރޭންޑް އެންޑް މާކެޓިން ސްޓްރެޓެޖީ މުހައްމަދު ސައީދު ވިދާޅުވީ ބޭސްފަރުވާއަށް މިދިޔަ އަހަރު އެވްރެޖުކޮށް އެއް މިލިއަން ޑޮލަރު ވިއްކިއިރު، މި އަހަރުގެ ފުރަތަމަ ހަތް މަސް ދުވަހުގެ ތެރޭގައި ބޭސްފަރުވާއަށް ވިއްކި ޑޮލަރުގެ އަދަދު އެވްރެޖުކޮށް ތިން މިލިއަނަށްވުރެ އިތުރުވެފައިވާ ކަމަށެވެ.
"މެޑިކަލްއަށް މިދިޔަ އަހަރު އަޅުގަނޑުމެންގެ އެވްރެޖްއަކީ މަހަކަށް އެއް މިލިއަން ޑޮލަރު. އެހެންމަވެސް މި އަހަރު އެ އަދަދު އަޅުގަނޑުމެން މިއޮތީ ތިން މިލިއަން ޑޮލަރަށްވުރެ އިތުރުވެފައި. މާނައަކީ މި އަހަރު މިދިޔަ ހަތް މަސްދުވަސް ތެރޭގައި މަހަކަށް އެވްރެޖުކޮށް އަޅުގަނޑުމެން ތިން މިލިއަން ޑޮލަރު މެޑިކަލްއަށް އަޅުގަނޑުމެން މި އަންނަނީ ވިއްކަމުން،" އޭނާ ވިދާޅުވި އެވެ.
މިދިޔަ އަހަރު އޮގަސްޓް 1، އިން ފެށިގެން ނެޝަނަލް ސޯޝަލް ޕްރޮޓެކްޝަން އެޖެންސީ (އެންސްޕާ) ގެ އެހީގައި ރާއްޖެއިން ބޭރުން ބޭސްފަރުވާކުރާ މީހުންގެ ޑޮލަރު ލިމިޓް 2،000 އަށް ވަނީ ބޮޑުކޮށްފަ އެވެ. އޭގެއިތުރުން އަމިއްލަ ހަރަދުގައި ބޭރަށް ބޭސްފަރުވާއަށް ދާނަމަ 1،000 ޑޮލަރު ބޭންކުން ގަންނަން ލިބޭގޮތަށް ވަނީ ހަމަޖައްސާފަ އެވެ.
ބޭރު ގައުމުތަކަށް އަމިއްލަ ހަރަދުގައި ބޭސް ފަރުވާއަށް ދާ މީހުންނަށް ބީއެމްއެލް އިން ޑޮލަރު ސަޕޯޓުގެ ގޮތުގައި 1000 ޑޮލަރު ދެނީ ފަރުވާ ހޯދާ ޑޮކްޓަރަށް ދައްކަން އެޕޮއިންޓްމަންޓު ހަދާފައި އެ ވެސް ހުށަހެޅުމުންނެވެ.
މިދިޔަ އަހަރު މަހަކަށް 3.8 މިލިއަން ޑޮލަރު އެޑިއުކޭޝަނަށް ދޫކުރިކަން ފާހަގަކުރައްވާ ސައީދު ވިދާޅުވީ މި އަހަރުވެސް މަހަކަށް ދޫކުރަމުންދަނީ ގާތްގަނޑަކަށް އެވަރު ކަމަށެވެ.
ސައީދު ވިދާޅުވީ ބީއެމްއެލް އިން އެވްރެޖުކޮށް ކޮންމެ ދުވަހަކު 2.7 މިލިއަން ޑޮލަރު ވިއްކަމުންދާ ކަމަށާއި އޭގެ ތެރޭގައި ޓީޓީ ހެދުމުގެ އިތުރުން ކާޑު ޓްރާންސެކްޝަންތައް ވެސް ހިމެނޭ ކަމަށެވެ. އޭގެއިތުރުން އޭނާ ވިދާޅުވީ މިދިޔަ ހަތް މަސް ތެރޭގައި 570 މިލިއަން ޑޮލަރު ބީއެމްއެލް އިން ވިއްކި ކަމަށެވެ.
ވިޔަފާރިތަކަށް އެހީތެރިވުމުގެ ގޮތުން ބީއެމްއެލްއިން މިދިޔަ ހަތް މަސް ދުވަހުގެ ތެރޭގައި 270 މިލިއަން ޑޮލަރު ދޫކޮށްފައިވާކަން ވެސް ސައީދު ފާހަގަކުރެއްވި އެވެ.
މުހައްމަދު މުއިއްޒު ވިދާޅުވެފައި ވަނީ، ސަރުކާރުން ތަންފީޒުކުރަމުންދާ ފިޔަވަޅުތަކާއެކު ޑޮލަރުގެ އަގު ދަށްވަމުން ގޮސް، ރަސްމީ ރޭޓުގައި ޑޮލަރު ލިބެން ފަށާނީ 2027 ގައި ކަމަށެވެ. އަދި އެ އަމާޒަށް ވާސިލުވާން އަޅަންޖެހޭ ފިޔަވަޅުތައް އަޅަމުން ގެންދާނެ ކަމަށް މުއިއްޒު ވިދާޅުވެފައިވެ އެވެ.
މި ހަފްތާ ފެށުނުއިރު ޑޮލަރުގެ އަގު ވަނީ 22ރ. އަށް އަރައިފަ އެވެ. އެގޮތުން އާދީއްތަ ދުވަހު ޑޮލަރުގެ އަގު 22.10ރ. އަށް ހުރިއިރު، 48 ގަޑިއިރު ތެރޭގައި 15 ލާރި މިވަނީ އިތުރުވެފަ އެވެ.
މިދިޔަ ޖުލައި މަހުގެ 29 ވަނަ ދުވަހު ކަޅު ބާޒާރުގައި ޑޮލަރުގެ އަގު 21.70 ރުފިޔާގައި ހުރުމަށްފަހު، ފާއިތުވި ދުވަސްތަކުގައި އަގު ވަނީ މަޑުމަޑުން އުފުލެން ފަށައިފަ އެވެ. މި މިދިޔަ ހަފުތާ ނިމުނުއިރު، ޑޮލަރެއްގެ އަގު ހުރީ 21.85ރ. ގަ އެވެ. އެއީ ވެސް މީގެ ކުރިން ރާއްޖޭގައި ޑޮލަރުގެ އަގު ނުއުފުލޭ މިންވަރެކެވެ.
ރާއްޖޭގެ ކަޅު ބާޒާރުގައި ޑޮލަރުގެ އަގު ހުއްޓުމެއްނެތި އިންތިހާއަށް ބޮޑުވަމުންދާއިރު، ޑޮލަރު ލިބުމުގައިވެސް ދަނީ ދަތިތައް ދިމާވަމުންނެވެ.
