ސައުދީ އަރަބިއްޔާއިން ތުރުކީ އާއި ޕާކިސްތާނާއެކު ދިފާއީ އެއްބަސްވުމެއްގައި ސޮއިކުރިތާ ދެ ދުވަސް ފަހުން، އެ ގައުމުގެ ޖީޒާންގައި ހުންނަ ސައުދީ އަރަމްކޯގެ ތެޔޮ ސާފުކުރާ ކާރުހާނާއަށް ހަމަލާދީފައިވާ ކަމަށް އީރާނަށް ތާއީދުކުރާ ޔަމަނުގެ ހޫތީން ބުނެފި އެވެ.
ސައުދީ އެނާޖީ މިނިސްޓްރީން ބުނި ގޮތުގައި އެ ކާރުހާނާގައި އަލިފާނުގެ ހާދިސާއެއް ހިނގައިގެން އުޅެނިކޮށް މިހާރު ވަނީ ނިއްވާލާފަ އެވެ. ނަމަވެސް އަލިފާން ރޯވާން މެދުވެރިވި ސަބަބެއް އެ މިނިސްޓްރީން ހާމައެއް ނުކުރެ އެވެ.
ސައުދީ އަރަބިއްޔާގެ ހުޅަނގު ދެކުނުގައި ދުވާލަކު 400،000 ފީފާގެ ސާފުނުކުރާ ތެޔޮ އުފައްދާ މި ކާރުހާނާއަށް ދިމާވި ހާދިސާއާ ގުޅިގެން ފުރިހަމަކުރަންޖެހޭ އިޖުރާއަތްތައް ކަމާބެހޭ އިދާރާތަކުން ކުރަމުންދާ ކަމަށް ވެސް އެ މިނިސްޓްރީން ބުންޏެވެ. މި ހާދިސާގައި އެއްވެސް މީހަކަށް އަނިޔާއެއް ލިބިފައިވާ ކަމުގެ ރިޕޯޓެއް ލިބިފައެއް ނުވެ އެވެ.
ހޫތީންގެ އަސްކަރީ ތަރުޖަމާނު ޔަހްޔާ ސަރީ އެކްސްގައި ކުރި ޕޯސްޓެއްގައި ބުނެފައިވަނީ، އެ ކާރުހާނާއަށް ހަމަލާދިނީ ޑްރޯން ބޭނުންކޮށްގެން ކަމަށެވެ. މީގެ ކުރިން ވެސް ރަތް ކަނޑުގެ އައްސޭރީގައި ޖީޒާން އަދި ޔަންބޫގައި ހުރި އަރަމްކޯގެ މަރުކަޒުތަކަށް ހޫތީން ވަނީ ހަމަލާދީފަ އެވެ.
ފެބްރުއަރީ 28 ވަނަ ދުވަހު އެމެރިކާ އާއި އިސްރާއީލުން އީރާނަށް ދިން ވަރުގަދަ ހަމަލާތަކާ ގުޅިގެން، އީރާނާއި އެ ގައުމަށް ތާއީދުކުރާ ޝިއައީ ހަތިޔާރުއެޅި ޖަމާއަތްތަކުން ދަނީ ސައުދީ އަރަބިއްޔާއަށާއި ގަލްފުގެ އެހެން ގައުމުތަކަށް ހަމަލާދީ، އެ ގައުމުތަކުގެ ތެޔޮ އުފުލާ އުޅަނދުތަކަށް ހުރަސްއަޅަމުންނެވެ.
ދުނިޔޭގައި އެންމެ ގިނައިން ތެޔޮ އެކްސްޕޯޓްކުރާ އަރަމްކޯގެ ޗީފް އެގްޒެކެޓިވް އަމީން ނާސިރު މިދިޔަ ހަފުތާގައި ވިދާޅުވީ، އެ ކުންފުނީގެ މަރުކަޒުތަކަށް ދޭ ހަމަލާތަކުގެ ސަބަބުން ތެޔޮ އުފެއްދުމަށް ބައެއް ބުރޫތައް އެރި ނަމަވެސް، ވަރަށް އަވަހަށް މަސައްކަތްތައް އާންމު ހާލަތަށް ގެނެވޭނެ ކަމުގެ އިތުބާރު އެބައޮތް ކަމަށެވެ. އަދި މި ހަމަލާތަކުގެ ސަބަބުން ކުންފުނީގެ ހިންގުމަށް ނުވަތަ މާލީ ހާލަތަށް މާ ބޮޑު އަސަރެއް ކޮށްފައިނުވާ ކަމަށް ވެސް އޭނާ ވިދާޅުވި އެވެ.
ދުނިޔޭގެ ހަކަތައިގެ ސަޕްލައިއަށް ބުރޫއަރައި، ދުނިޔޭގެ އިގްތިސާދަށް ލޮޅުން އަރާފައިވާ މި ހަމަލާތަކާ ގުޅިގެން، ސައުދީ އަރަބިއްޔާއިން ވަނީ މިދިޔަ ހުކުރު ދުވަހު އެމެރިކާގެ ބައިވެރިން ކަމަށްވާ ސުންނީ މުސްލިމް ތުރުކީ އާއި ޕާކިސްތާނާއެކު އިއްތިހާދެއް އުފައްދާފަ އެވެ.
