އިންޑިއާގެ އިންތިޚާބީ އިދާރާގެ އިސްވެރިޔާގެ އިސްތިއުފާއަށް ގޮވާލައި، އިދިކޮޅު ފަރާތްތަކުން އާދީއްތަ ދުވަހު ނިއުދިއްލީގައި ބޭއްވުމަށް ހަމަޖެހިފައިވާ ބޮޑު މުޒާހަރާއާ ދިމާކޮށް، އައްޑަނަ އާއި މުގުރުބުރި ހިފައިގެން ތިބި ސަލާމަތީ ބާރުތަކުންނާއި ހަމަނުޖެހުން ކޮންޓްރޯލްކުރާ އުޅަނދުފަހަރުން މުޒާހަރާ ކުރާ ސަރަހައްދު ވަށާލައިފި އެވެ. މި މުޒާހަރާއަކީ ވޯޓުލާ މީހުންގެ ލިސްޓަށް ގެނައި އިސްލާހުތަކާ ގުޅިގެން، އެ ގައުމުގެ ޗީފް އިލެކްޝަން ކޮމިޝަނަރު މަގާމުން ވަކިވުމަށް ބާރުއެޅުމުގެ ގޮތުން ބާއްވާ ހަރަކާތެކެވެ.
ކޮންގްރެސް ޕާޓީގެ ލީޑަރު ރާހުލް ގާންދީ އިސްވެ ހުންނަވައި ކުރިއަށްގެންދާ މި ހިނގާލުމާއި އެއްވުމުގެ ކުރިން، ދިއްލީގެ ޓްރެފިކް ރޫޓުތަކަށް ބަދަލު އަންނާނެ ކަމުގެ އިންޒާރު ކަމާބެހޭ އިދާރާތަކުން ވަނީ ދީފަ އެވެ. އިދިކޮޅު ފަރާތްތަކުން ބުނާ ގޮތުގައި މި މުޒާހަރާގައި އެތައް ލައްކަ ބަޔަކު ބައިވެރިވާނެ ކަމަށް ބެލެވޭއިރު، މިއީ ބޮޑުވަޒީރު ނަރެންދުރަ މޯދީ އާއި ބާރަތިޔާ ޖަނަތާ ޕާޓީ (ބީޖޭޕީ) އަށް ކުރިމަތިވާނެ ވަރުގަދަ ގޮންޖެހުމަކަށް ވާނެ އެވެ.
ވޯޓުލާ މީހުންގެ ލިސްޓަށް ގެނައި ބަދަލުތަކަކީ ބީޖޭޕީއަށް ފައިދާވާ ގޮތަށް ގެނައި ބަދަލުތަކެއް ކަމަށް ބުނެ، ޗީފް އިލެކްޝަން ކޮމިޝަނަރު ގްޔަނޭޝް ކުމާރު އިސްތިއުފާ ދެއްވުމަށް ގޮވާލައި، އިދިކޮޅު ޕާޓީތަކާއި ދަރިވަރުންގެ ޖަމިއްޔާތަކުގެ އިތުރުން ޒުވާނުން އިސްވެ އުފައްދާފައިވާ "ކޮކްރޯޗް ޖަންތާ ޕާޓީ" އިން އަންނަނީ މިދިޔަ މަހުން ފެށިގެން ކޮންމެ ދުވަހަކު ކަހަލަ ގޮތަކަށް މުޒާހަރާ ކުރަމުންނެވެ.
އިލެކްޝަން ކޮމިޝަނުން ވަނީ ވަކިފަރާތަކަށް ޖެހިފައިވާ ކަމަށް ކުރެވޭ ތުހުމަތުތައް ދޮގުކޮށްފަ އެވެ. އަދި އޮޅުމަކުން ލިސްޓުން ނަން އުނިވެފައިވާ ފަރާތްތަކަށް އަލުން ރަޖިސްޓްރީވުމުގެ ފުރުސަތު އޮތް ކަމަށް އެ ކޮމިޝަނުން ބުނެ އެވެ. ހަމައެއާއެކު، ބީޖޭޕީން ވަނީ އިދިކޮޅު ފަރާތްތަކުން ސައްހަ އިންތިޚާބީ ނިޒާމާ މެދު ސުވާލު އުފައްދައި، ޑިމޮކްރަސީ ބަލިކަށިކުރަން މަސައްކަތް ކުރާ ކަމަށް ތުހުމަތުކޮށްފަ އެވެ.
މަސްރަހު ދިރާސާކުރާ ފަރާތްތަކުން ބުނާ ގޮތުގައި، ޒުވާނުންގެ މުޒާހަރާތަކާއި އިދިކޮޅަށް ލިބެމުންދާ ތާއީދަކީ 2014 ވަނަ އަހަރު މޯދީ ވެރިކަމަށް ވަޑައިގެންނެވި ފަހުން ކުރިމަތިވި އެންމެ ބޮޑު ގޮންޖެހުމެވެ. އެހެންނަމަވެސް، މޯދީގެ ސަރުކާރު އަދިވެސް އޮތީ ވަރުގަދަކޮށެވެ.
އިދިކޮޅު ޕާޓީތަކުން އިއުލާންކޮށްފައިވާ ގޮތުގައި، އާދީއްތަ ދުވަހުގެ މި ހިނގާލުން ކުރިއަށްދާނީ މެދުތެރޭ ދިއްލީން ފެށިގެން މުޒާހަރާ ބޭއްވުމަށް ހަމަޖެހިފައިވާ ރާމްލީލާ މައިދާނާ ހަމައަށް ގާތްގަނޑަކަށް 1.5 ކިލޯމީޓަރުގެ ސަރަހައްދެއްގަ އެވެ.
