ގަލްފް ސަރަހައްދުން ދަތުރުކުރަމުންދަނިކޮށް ގަތަރުގެ ތެޔޮ އުފުލާ ބޯޓަކަށް ހަމަލާދީފައިވާ ކަމަށް ގަތަރު ގޭސް ޓްރާންސްޕޯޓް ކޮމްޕެނީން ބުނެފި އެވެ.
މިއީ މި އަހަރުގެ ފެބްރުއަރީ މަހު އީރާނާ ދެކޮޅަށް އެމެރިކާ އާއި އިސްރާއީލުން ފެށި ހަނގުރާމައާ ގުޅިގެން، ވިޔަފާރި އުފުލާ އުޅަނދުތަކަށް އަމާޒުކޮށް ދިން އެންމެ ފަހުގެ ހަމަލާ އެވެ.
އެ ކުންފުނިން އާދީއްތަ ދުވަހު ނެރުނު ބަޔާނެއްގައި ބުނެފައިވަނީ، މިދިޔަ ހުކުރު ދުވަހުގެ އިރުއޮއްސުނު ވަގުތު ހަމަލާ އަމާޒުވެފައިވަނީ އެ ކުންފުނީގެ މިލްކިއްޔާތުގައި އޮންނަ، ގުދުރަތީ ގޭސް (އެލް.އެން.ޖީ) އުފުލާ "އަލް މައިދާ" ނަމަކަށް ކިޔާ ބޯޓަކަށް ކަމަށެވެ.
މި ހަމަލާގައި ބޯޓުގެ ފަޅުވެރިންގެ ތެރެއިން އެއްވެސް މީހަކަށް އަނިޔާއެއް ލިބިފައި ނުވާ ކަމަށާއި، ތިމާވެއްޓަށް ގެއްލުމެއް ލިބޭ ފަދަ ކަމެއް ހިނގާފައިވާ ކަމުގެ ރިޕޯޓެއް ލިބިފައި ނުވާ ކަމަށް ވެސް އެ ކުންފުނިން ބުނެފައިވެ އެވެ.
ގަތަރު ސްޓޮކް އެކްސްޗޭންޖުން އާންމުކުރި އެ ބަޔާނުގައި ބުނެފައިވަނީ، ހަމަލާ އަމާޒުވި ބޯޓު މިހާރު އޮތީ "ރައްކާތެރި ހާލަތެއްގައި" ކަމަށާއި ބޯޓުގެ އޮޕަރޭޝަންތައް ހުއްޓުމެއް ނެތި ކުރިއަށްދާ ކަމަށެވެ. އަދި މި ހާދިސާގެ ސަބަބުން ލިބުނު ގެއްލުންތައް ބަލައި ވަޒަންކުރުމުގެ މަސައްކަތް މިހާރު ކުރަމުންދާ ކަމަށް ވެސް ބަޔާނުގައިވެ އެވެ.
ގަތަރު ގޭސް ޓްރާންސްޕޯޓް ކޮމްޕެނީއަކީ ގަތަރުގެ ބަނދަރުތަކާއި ޓާމިނަލްތަކަށް ބޯޓުފަހަރު ކައިރިކުރުމާއި ކަނޑުގެ ދަތުރުފަތުރާ ގުޅޭ އެކި ހިދުމަތްތައް ފޯރުކޮށްދޭ ކުންފުންޏެކެވެ.
އިންޓަނޭޝަނަލް މެރިޓައިމް އޯގަނައިޒޭޝަން (އައި.އެމް.އޯ) އާއި ޔޫ.ކޭ މެރިޓައިމް ޓްރޭޑް އޮޕަރޭޝަންސްގެ ތަފާސްހިސާބުތަކުން ދައްކާ ގޮތުގައި، ހަނގުރާމަ ފެށުނު ފަހުން މިހާތަނަށް ވިޔަފާރި ކުރާ 120 އަށްވުރެ ގިނަ އުޅަނދަށް ވަނީ ހަމަލާދީފަ އެވެ.
ހަނގުރާމައިގެ ކުރީކޮޅު ހޯރްމޫޒް ކަނޑުއޮޅި ބަންދުކުރި އީރާނުން ތަކުރާރުކޮށް އިންޒާރު ދެމުންދަނީ، އެ ގައުމުގެ ހުއްދައާ ނުލައި އެ މުހިންމު ކަނޑުގެ ސަރަހައްދުން ދަތުރުކުރަން އުޅޭ ކޮންމެ އުޅަނދެއް "ނައްތާލާނެ" ކަމަށެވެ.
މިދިޔަ ޖުލައި މަހު އެމެރިކާއިން އީރާނުގެ ދެކުނު ބަނދަރުތައް އަލުން ބަންދުކޮށް (ބްލޮކޭޑް)، ހިސާރުކުރުމާ ގުޅިގެން މިފަދަ ހަމަލާތައް ވަނީ އިތުރުވެފަ އެވެ.
މިދިޔަ އޮކްޓޫބަރު މަހަކީ ހަނގުރާމައިގެ ތެރޭގައި އެންމެ ގިނަ ހަމަލާ ރެކޯޑުކުރެވުނު މަހެވެ. އެގޮތުން އެ މަހު މަދުވެގެން 29 އުޅަނދަކަށް ހަމަލާދީފައިވާއިރު، މީގެ ކުރިން އެންމެ ގިނަ ހަމަލާ ރެކޯޑުކުރެވުނު މާޗް މަހު ދީފައިވަނީ 20 ހަމަލާ އެވެ.
