އިތިއޯޕިއާގެ ބޮޑުވަޒީރު އަބީ އަހުމަދު، އެ ގައުމުގެ ކެބިނެޓް ވަޒީރުންނާއި ސަރުކާރުގެ އިސް އޮފިޝަލުންނަށް އަސްކަރީ ތަމްރީނުތަކެއް ދެއްވަން ފައްޓަވައިފި އެވެ.
ބޮޑުވަޒީރު ވިދާޅުވި ގޮތުގައި ސިފައިންގެ ތެރޭގައި އޮންނަ އަދަބު އަޚުލާގާއި ތަރުތީބުގެ ސަބަބުން، ވަރުގަދަ ލީޑަރުން ބިނާކުރުމަށާއި ގައުމުގެ ތަރައްގީ ކުރިއެރުވުމަށް އެހީތެރިވެދޭނެ އެވެ.
ބޮޑުވަޒީރު އަބީ އަހުމަދު ސޯޝަލް މީޑިއާގައި ހިއްސާކުރެއްވި ފޮޓޯތަކުން ފެންނަ ގޮތުގައި، ހުރުސޯ މިލިޓަރީ ޓްރެއިނިން ސެންޓަރުގައި ކުރިއަށްދާ މި އަސްކަރީ ތަމްރީނުތަކުގައި ވަޒީރުންނާއި، ސްޓޭޓް މިނިސްޓަރުންގެ އިތުރުން ސަރުކާރުގެ މުއައްސަސާތަކުގެ ވެރިންނާއެކު ބޮޑުވަޒީރު އަމިއްލަފުޅަށް ވެސް ބައިވެރިވެވަޑައިގަންނަވަ އެވެ.
އިތިއޯޕިއާގެ ސަރުކާރުގެ އިސް މަދަނީ އޮފިޝަލުން މިފަދަ އަސްކަރީ ތަމްރީނުތަކެއް ފުރިހަމަކުރުމަކީ އެ ގައުމުގައި މީގެ ކުރިން ފެނިފައިނުވާ އާދަޔާ ހިލާފު ކަމެކެވެ.
މި އަސްކަރީ ތަމްރީނުތައް ފެށީ ކޮން އިރަކު ކަމެއް އަދި މި ތަމްރީނުތައް ކުރިއަށްދާނީ ކިހާ މުއްދަތަކަށް ކަމެއް ސަރުކާރުން ހާމަކޮށްފައެއް ނުވެ އެވެ.
ބޮޑުވަޒީރު އަބީ އަހުމަދު ކުރެއްވި ޕޯސްޓެއްގައި ވިދާޅުވީ، އިތިއޯޕިއާ އިން އުންމީދުކުރާ ފާގަތިކަމާއި ތަރައްގީ ހާސިލުކުރުމަށްޓަކައި، ގައުމުގެ ލީޑަރުންނަކީ ޖިސްމާނީ ގޮތުން ދުޅަހެޔޮ، އަޚުލާގީ ގޮތުން ވަރުގަދަ އަދި ފިކުރީ ގޮތުން ގާބިލު ބަޔަކަށް ވާންޖެހޭ ކަމަށެވެ.
ސަރުކާރުގެ އިސްވެރިންނަށް މި ތަމްރީނުތައް ދޭން ފަށާފައި މިވަނީ، އިތިއޯޕިއާގެ ސަލާމަތީ މަޝްރަހު ގޯސްވެފައިވާ ދަނޑިވަޅެއްގަ އެވެ.
އެގޮތުން އުތުރުގެ ޓިގްރޭ ސަރަހައްދުގެ ބައެއް ހިސާބުތަކުގައި ހިނގަމުންދާ ހަމަނުޖެހުންތަކާއި، އަމްހާރާ ސަރަހައްދުގައި ހިނގަމުންދާ ކުރިމަތިލުންތަކުގެ އިތުރުން އޮރޯމިއާ ސަރަހައްދުގެ ސަލާމަތީ ނުރައްކާތައް ފާހަގަކޮށްލެވެ އެވެ.
މީގެ އިތުރުން، އަވަށްޓެރި އެރިތުރިއާއާ އެކު އޮތް ގުޅުން ގޯސްވެ، ދެ ގައުމުގެ ދެމެދުގައި އަލުން ހަނގުރާމައެއް ފެށިދާނެ ކަމުގެ ބިރު ބޮޑުވެފައިވާ ދަނޑިވަޅެއްގައި މި ތަމްރީނުތައް ކުރިއަށް ގެންދިއުމަކީ ސަމާލުކަން ލިބިފައިވާ ކަމެކެވެ.
ބޮޑުވަޒީރު އަބީ އަހުމަދު މީގެ ކުރިން ވެސް ވަނީ، އަސްކަރީ ތައްޔާރީތަކާއި ގައުމީ ތަރައްގީއަކީ އޭނާގެ ސަރުކާރުގެ އެންމެ މުހިންމު އަމާޒުތައް ކަމަށް ވިދާޅުވެފަ އެވެ.
