ބޭންކިން ނިޒާމުގައި ދައުރުވާ ރުފިޔާގެ ސާޕްލަސް ލިކުއިޑިޓީ މަދުކުރުމަށް މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން ފަށާފައިވާ އޯޕަން މާކެޓް އޮޕަރޭޝަންސް މެދުވެރިކޮށް، އިތުރު ތިން ބިލިއަން ރުފިޔާ ނަގައި، މިހާތަނަށް ޖުމްލަ ތިން ބިލިއަން ރުފިޔާ ނަގާފައިވާ ކަމަށް އެ އިދާރާއިން ބުނެފި އެވެ،
އެމްއެމްއޭއިން މި އަދަދަށް ފައިސާ ނެގުމާއެކީ، އިގުތިސޯދުގައި ހުރި ޝޯޓް ޓާމް ލިކުއިޑިޓީ ވަނީ 3.5 ބިލިއަން ރުފިޔާއަށް ކުޑަވެފަ އެވެ. އެމްއެމްއޭއިން މިދިޔަ އަހަރު އެ އޮޕަރޭޝަންތައް ފެށިއިރު، މި އަދަދު ހުރީ 6.5 ބިލިއަން ރުފިޔާގައި އެވެ.
މި ފިޔަަވަޅުތަކީ ޑޮލަރުގެ ތާށިކަން އިންތިހާއަށް ބޮޑުވުމާ ގުޅިގެން އެމްއެމްއޭއިން އަޅަމުންދާ ފިޔަވަޅުތަކުގެ ތެރެއިން ފިޔަވަޅެކެވެ. މިދިޔަ މަހުގެ ތެރޭގައި މަރުކަޒީ ބޭންކުން ވަނީ މި އޮޕަރޭޝަންތައް 10 ބޭސިސް ޕޮއިންޓަށް އިތުރުކުރަން ނިންމާފަ އެވެ.
މި ބޭސިސް ޕޮއިންޓުތައް އިތުރުކުރުމުގެ ބޭނުމަކީ މި މުއާމަލާތުން ބޭންކުތަކަށް ލިބޭ އިންޓްރެސްޓް އާމްދަނީ އިތުރުކޮށް، އެ ފައިސާ އެމްއެމްއޭގައި ބަހަައްޓަން ބޭންކުތަކުގެ ޝައުގުވެރިކަން އިތުރުކުރުމެވެ.
އޯޕަން މާކެޓް އޮޕަރޭޝަންތަކުގެ އިތުރުން އެމްއެމްއޭއިން ވަނީ ސަރުކާރުގެ ތަންފީޒީ އިދާރާތަކާ ގުޅިގެން ޑޮލަރުގެ ކަޅު ބާޒާރު ހުއްޓުވުމުގެ އޮޕަރޭޝަނެއް ފަށާފަ އެވެ. އަދި ބޭރު ފައިސާގެ ގާނޫނު ބަދަލުކޮށްގެން، ރިސޯޓުތަކަށް ލިބޭ އާމްދަނީގެ 40 ޕަސެންޓު ބޭންކުތަކަށް މާރުކުރަން މަޖުބޫރުކުރަން ދަނީ މަސައްކަތް ކުރަމުންނެވެ.
މި ފިޔަވަޅުތަކާ ގުޅިގެން ބޮޑު ނުތަނަސްވަކަމެއް އުފެދިފައިވާއިރު، ރިސޯޓު ވިޔަފާރިތައް ތަމްސީލުކުރާ ޖަމިއްޔާ، މޯލްޑިވްސް އެސޯސިއޭޝަން އޮފް ޓޫރިޒަމް އިންޑަސްޓްރީސް (މަޓީ) އިން ވަނީ މިހާ ގިނަ ޑޮލަރު މާރުކުރުމަކީ ކުރެވޭނެ ކަމެއް ނޫން ކަމަށް ބުނެފަ އެވެ.
މި މައްސަލައިގައި ސަރުކާރުން ދެކެނީ، ހުރިހާ ވެސް ގޯހެއް ހަދަނީ ޑޮލަރުން އާމްދަނީ ލިބޭ ވިޔަފާރިތަކުން ކަމަށެވެ. އަދި، ކަޅު ބާޒާރުގައި ރޭޓު ކަނޑައަޅަނީ މި ގޮތަށް ޑޮލަރު ލިބޭ ބަޔަކު ހިންގާ ބޮޑު ނެޓްވޯކަކުންނެވެ. މި ނެޓްވޯކުގެ ތެރޭގައި ދެން ގޯސް ހަދާ ބަޔަކީ، ސަރުކާރުން ތުހުމަތު ކުރާ ގޮތުގައި، ޑޮލަރުން މުސާރަ ލިބޭ މީހުންނެވެ.
މި މައްސަލައިގައި އާންމުންގެ ތެރޭގައި ބޮޑު ނުތަނަވަސްކަމެއް އުފެދިފައިވާއިރު، އިދިކޮޅު ސިޔާސީ ޕާޓީތަކާއި ބައެއް އިގުތިސޯދީ މާހިރުން ބުނަނީ މީގެ ސަބަބުން ކަންކަން އިތުރަށް ގޯސް ވާނީ ކަމަށެވެ.
