ރާއްޖޭގައި ދެން އޮންނަ ރިޔާަސީ އިންތިހާބުގައި މޯލްޑިވިއަން ޑިމޮކްރަޓިކް ޕާޓީ (އެމްޑީޕީ) ގެ ޓިކެޓުގައި ވާދަކުރާނެ ކެންޑިޑޭޓަކު ހޮވުމަށް ބާއްވާ ރިޔާސީ ޕްރައިމަރީގައި ހުޅުމާލެ ދެކުނު ދާއިރާގެ މެންބަރު އަހުމަދު ޝަމްހީދު ވާދަކުރައްވާނެކަން ހާމަކުރައްވައިފި އެވެ.
އެމްޑީޕީން ބާއްވާ ޕްރައިމަރީގައި ވާދަކުރާނެކަން ޝަމްހީދު އިއުލާންކުރެއްވީ "އަވަސް" ނޫހުން ގެނެސްދޭ "ޝަމްހީދު އާއެކު ޕޮޑްކާސްޓުގެ ޓްރެއިލާ ވީޑިއޯ މެދުވެރިކޮށެވެ. އެ ޕޮޑްކާސްޓުގެ ފުރަަތަމަ އެޕިސޯޑު ބުރާސްފަތި ދުވަހު ނެރޭނެ އެވެ.
"އިރާދުކުރެއްވިއްޔާ އެމްޑީޕީގެ ކުރިއަށް މިއޮތް ރިޔާސީ ޕްރައިމަރީގައި ވާދަކުރާނަން. އެއް ވާހަކަ އިތުރުކޮށްލަން ބޭނުން، މަޖިލިސް އިންތިހާބުގައި ކުރި ކެމްޕޭނުގައި މި ދާއިރާ ރައްޔިތުންނަށް ކުރި ހަމައެކަނި ވައުދު ކަމަށްވެސް ވެދާނެ، ރިޔާސީ ޕްރައިމަރީގައި ވާދަކުރުމުގެ ވައުދަކީ،" ޝަމްހީދު ވިދާޅުވި އެވެ.
ޝަމްހީދު އެންމެ ފުރަތަމަ ސިޔާސީ މައިދާނުގައި ހަރަކާތްތެރިވީ ޖުމްހޫރީ ޕާޓީގެ މެންބަރެއްގެ ގޮތުގަ އެވެ. އެ ޕާޓީގެ ސްލޮޓެއްގައި ކުރީގެ ރައީސް މުހައްމަދު ވަހީދުގެ ސަރުކާރުގައި ޓްރާންސްޕޯޓް މިނިސްޓަރުކަން އޭނާ ކުރެއްވި އެވެ. އޭނާ އެމްޑީޕީއާ ގުޅިވަޑައިގަތީ ނޮވެމްބަރު 2013، ގަ އެވެ.
އޭނާއަކީ އިނގިރޭސިވިލާތުގެ ލީޑްސް ޔުނިވާސިޓީން ސިވިލް އިންޖިނިއަރިންގެ ދާއިރާއިން ޕީއެޗްޑީ ފުރިހަމަކުރައްވާފައިވާ މީހެކެވެ.
އެމްޑީޕީގެ ޕްރައިމަރީގައި ވާދަކުރައްވާނެކަން އެ ޕާޓީގެ ކުރީގެ ޗެއާޕާަސަން ފައްޔާޒު އިސްމާއީލް އާއި އެ ޕާޓީގެ ކުރީގެ ރައީސް އަބްދުالله ޝާހިދު ވެސް ވަނީ އިއުލާން ކުރައްވާފަ އެވެ. އެ ޕްރައިމަރީގައި ވާދަ ކުރައްވަން ނިންމައި ކުރީގެ ރައީސް އިބްރާހިމް މުހައްމަދު ސޯލިހު ވަނީ ބައެއް ބޭފުޅުން ކައިރީ އެ ވާހަކަ ދައްކަވައިފަ އެވެ. ނަމަވެސް ސޯލިހުގެ ނިންމުން ރަސްމީކޮށް އިއުލާނެއް ނުކުރައްވަ އެވެ.
ދިވެހިރާއްޖޭގައި ބޭއްވި އެންމެ ފުރަތަމަ ގިނަ ޕާޓީ އެކުލެވޭ އިންތިހާބު 2008 ކާމިޔާބު ކުރެއްވީ އެމްޑީޕީގެ ކެންޑިޑޭޓު ނަޝީދެވެ. ނަމަވެސް ފުލުހުންނާއި ސިފައިން ހިންގި މިއުޓިނީއެއްގެ ތެރެއިން ނަޝީދު ވަނީ ދައުރު ހަމަނުވަނީސް އިސްތިއުފާ ދެއްވައިފަ އެވެ.
އޭގެ ފަހުން 2018 ވަނަ އަހަރު އެމްޑީޕީގެ ޓިކެޓުގައި ވާދަ ކުރައްވައި ރައީސް ސޯލިހު ވަނީ އިންތިހާބު ކާމިޔާބު ކުރައްވައިފަ އެވެ. އެންމެ ފަހުން 2023 ވަނަ އަހަރު ބޭއްވި އިންތިހާބުގައި ވެސް ސޯލިހު ވާދަ ކުރެއްވި އެވެ.
