ނ. މެދުފަރުގައި ތަރައްގީކޮށްގެން ހިންގަމުން އަންނަ ސޮނޭވާ ޖާނީ ރިސޯޓުގައި ދިރޭތަކެއްޗާއި މާހައުލީ ނިޒާމު ރައްކާތެރިކުރަން ކުރާ މަސައްކަތް ބަލައިގަނެ، އެ ރިސޯޓަށް "އަދާ އިފެކްޓިވް އޭރިއާ-ބޭސްޑް ކޮންޒަވޭޝަން މެޝާޒް" ނުވަތަ އޯއީސީއެމްގެ ލަގަބު އެންވަޔަރަމަންޓު މިނިސްޓްރީން ދީފި އެވެ.
މިއާ އެކީ ސޮނޭވާ ޖާނީ ވެގެން ގޮސްފައި ވަނީ ރާއްޖޭގެ ރިސޯޓުތަކުގެ ތެރެއިން މި ލަގަބު ލިބުނު ފުރަތަމަ ރިސޯޓަށެވެ.
އެންވަޔަރަމަންޓް މިނިސްޓްރީން ބުނި ގޮތުގައި ސޮނޭވާ ޖާނީގެ އޯއީސީއެމް އަކީ ތިން ސަރަހައްދަކަށް ބަހާލެވިފައިވާ 0.41 އަކަ ކިލޯމީޓަރުގެ ސަރަހައްދެކެވެ. ޒޯން 1 ގައި ހިމެނެނީ ކުޑަ ގާމަތީ ރަށެއް ކަމުގައިވާ މާކަނާފުއްޓާއި އެ ރަށާ އިންވެގެންވާ ފަރުގެ ސަރަހައްދެވެ. ޒޯން 2 ގައި ހިމެނެނީ މެދުފަރުގެ އިރުަީ ފަރާތުގެ ގޮނޑުދޮށުގައިވާ ވެލާ ބިސްއަޅާ، ވިހާ އާލާވާ ސަރަހައްދަކާއި ގޮނޑުދޮށާ އިންވެގެންވާ ޗަސްބިން އެކުލެވޭ ސަރަހައްދެކެވެ. ޒޯން 3 ގައި ވެސް ހިމެނެނީ ޗަސް ބިމުގެ ސަރަހައްދެކެވެ.
ސޮނާވޭ ޖާނީގެ އޯއީސީއެމްގެ ޒޯން 2 އަދި 3 ގައި ގިނަ އަދަދެއްގެ ކުރެދި އާއި، ބުރެވި އާއި، ނިކަގަހުގެ އިތުރުން ދިއްގާ އާއި އުންޔާއި، މިދިލި ގަހާއި، މަގޫ ގަހާއި، ކަނޑޫ ގަހާއި ބޯކަށިކެޔޮ ހެދިފައިވެ އެވެ. ޒޯން 1 އަދި ޒޯން 2 ގައި ހިމެނޭ ފަރުގެ ސަރަހައްދަކީ އެކި ބާވަތުގެ މުރަކާ ހެދިފައިވާ އަދި ގިނަ އަދަދެއްގެ މަހުގެ އާއިލާތައް ރެކޯޑުކުރެވިފައިވާ ސަރަހައްދެކެވެ.
އެންވަޔަރަމަންޓް މިނިސްޓްރީން ބުނީ، މި ފަރުގެ ސަރަހައްދުގެ ތެރޭގައި ގިނަ އަދަދެއްގެ ފަރުމަހުގެ އާއިލާތައް ހިމެނެ އެވެ. ފަރުަ މަހުގެ އާއިލާ ގިނަ ވުމަކީ ފަރުގެ ސިއްހަތުގެ ރަނގަޅު ކަން އަންގައިދޭ ކަމެކެވެ. ހަމަ އެހެންމެ، މި ސަރަހައްދަކީ އެންމަޑި އާއި، ފަޅު މިޔަރާއި، އޮޅުފަތި މިޔަރުގެ އިތުރުން ނެތިދިއުމުގެ ބިރުހީވެފައިވާ ކަހަނބު ފެންނަ ސަރަހައްދެކެވެ.
އޭގެ އިތުރުން، މި ސަރަހައްދުން މާކަނާ އާއި، ކަނބިއްޔާއި، ހުވަދޫ ރާބޮނދީގެ އިތުރުން ތޭރަވާ އާއި ކުޅީ ކުކުޅާއި، ފިދަނަ އާއި ކޮވެލި ހިމެނޭހެން ގިނަ އަދަދެއްގެ ދޫނީގެ ބާވަތްތައް ފެންނަ ކަމަށް ރެކޯޑުކުރެވިފައި ވެ އެވެ.
އޯއީސީއެމްގައި ކުރުން މަނާ ކަންތައްތައް
- ތިމާވެއްޓަށް ގެއްލުންދާ ފަދަ އެއްވެސް ހަރަކާތެއް ހިނގުން
- ދިރޭތަކެތިގޭ މުއްސަނދިކަަށް ގެއްލުން ލިބޭ އެއްވެސް ހަރަކާތެއް ހިންގުން
- އިންފްރާސްޓްރަކްޗާ ގާއިމުކުރުން
- ބްރައިން އަދި ސީ އައުޓްފްލޯ ބެހެއްޓުން
- ވެލި ޕަމްޕުކުރުން
އޯއީސީއެމްގައި ކުރުން ހުއްދު ކަންތައްތައް
- ދިރޭތަކެއްޗާއި އެ ތަކެތީގެ މާހައުލީ ނިޒާމުތައް ދެމެހެއްޓުމަށް ކުރެވޭ މަސައްކަތްތައް
- އެ ސަރަހައްދުން ލިބޭ ސަގާފީ، އިގުތިސޯދީ، އިޖުތިމާއީ ފައިދާތައް ދެމެހެއްޓުމަށް ކުރެވޭ މަސައްކަތްތައް
އޯއީސީއެމްގެ ގޮތުގައި ކަނޑައަޅާ ސަރަހައްދުތަކަކީ ތިމާވެށި ރައްކާތެރިކޮށް ދެމެހެއްޓުމާ ބެހޭ ގާނުނުގެ ދަށުން ހިމާޔަތްކޮށްފައިވާ ސަރަހައްދުތަކެއް ނޫނެވެ.
މި ސަރަހައްދުތަކަކީ އެ ސަރަހައްދެއް ދެމެހެއްޓެނިވި ގޮތެއްގައި މެނޭޖުކޮށް ބެލެހެއްޓުމުގެ ސަބަބުން ދިރޭތަކެއްޗާއި މާހައުލީ ނިޒާމުތައް ރައްކާތެރިކޮށް ދެމެހެއްޓުމުގެ އިތުރުން، އެކިއެކި މަންފާތަކާއި ބޭނުންތަކަށް މަގުފަހިކުރުވާ ވަކި ސަރަހައްދުތަކެވެ. މި ބޭނުންތަކުގެ ތެރޭގައި ސަފާގީ ބޭނުންތަކާއި، އިޖުތިމާއީ ބޭނުންތަކާއި، އިގުތިސޯދީ ބޭނުންތައް ވެސް ހިމެނެ އެވެ.
އޯއީސީއެމްގެ ލަގަބު ލިބެނީ، އަމިއްލަ ފަރާތުން ނުވަތަ ޖަމިއްޔާ ޖަމާއަތްތަކުން ނުވަތަ ކުންފުނިތަކުން ނުވަތަ ސަރުކާރަކުން ދިގުމުއްތަދަަށް ބެލެހެއްޓުމުގެ ސަބަބުން އޭގެއިން ދިރޭތަކެއްޗާއި މާަހައުލަށް ފައިދާ ލިބޭތީ އެ ފަދަ ސަރަހައްދުތަކަށް ދެވޭ ލަގަބެކެވެ.
މިއީ ދިވެހިރާއްޖެއިން ބައިވެރިވެފައިވާ މުއާހަދާއެއް ކަމުގައިވާ "ޔުނައިޓެޑް ނޭޝަންސް ކޮންވެންޝަަން އޮން ބަޔޮލޮޖިކަލް ޑައިވާސިޓީ" ގެ ދަށުން ދިރޭތަކެތީގެ ނަސްލު ދެމެހެއްޓުމަށާއި މާހައުލީ ނިޒާމުތައް ރައްކާތެރިކުރުމަށް ކުރެވޭ އެންމެހާ މަސައްކަތްތައް ދެނެގަތުމަށްޓަކައި އެކުލަވާލާފައިވާ ލަގަބެކެވެ. މިއީ ގައުމީ ފެންވަރުގައި އަދި ދުނިޔޭގެ ފެންވަރުގައި ވެސް ބަލައިގެންފައިވާ ލަގަބެކެވެ.
