ރިސޯޓުތައް ތަރައްގީކުރަން މިދިޔަ އަހަރުގެ ތެރޭގައި 12 ތަނެއް ކުއްޔަށް ދީގެން 16.7 މިލިއަން ޑޮލަރު (258 މިލިއަން ރުފިޔާ) ލިބުނު ކަމަށް ޓޫރިޒަމް މިނިސްޓްރީން ބުނެފި އެވެ.
ޓޫރިޒަމް މިިނިސްޓްރީން ދިން މައުލޫމާތުގައިވާ ގޮތުގައި މިދިޔަ އަހަރުގެ ތެރޭގައި ރިސޯޓުތައް ތަރައްގީކުރަން 10 އަތޮޅަކުން، އަށް ރަށާއި ހަތަރު ފަޅު ކުއްޔަށް ދޫކޮށްފައިވެ އެވެ. އެއް ތަނަށް ވުރެ ގިނައިން ކުއްޔަށް ދޫކޮށްފައި ވަނީ ލ. އަތޮޅާއި ތ. އަތޮޅުން އެކަންޏެވެ.
ރިސޯޓު ތަރައްގީކުރަން ކުއްޔަށް ދޫކުރި ތަންތަނުގެ އަގު އުޅެނީ 96،250 ޑޮލަރު (1.4 މިލިއަން ރުފިޔާ) އިން ފެށިގެން 4.3 މިލިއަން ޑޮލަރު (66.6 މިލިއަން ރުފިޔާ) އާ ދޭތެރޭގަ އެވެ. ގިނަ ތަންތަނުގެ ލީސް އެކުއިޒިޝަން ކޮސްޓު އެއް މިލިއަން ޑޮލަރަށް ނާރަ އެވެ.
އެންމެ ކުޑަ އަގުގައި ކުއްޔަށް ދޫކޮށްފައި ވަނީ ގދ. ރާވެރިންކޮޅިހުއްޓާ އެވެ. އެ އަތޮޅު ވާދޫ ކައިރީގައި އޮންނަ ހެކްޓަރެއް ވެސް ހަމަ ނުވާ މި ކުޑަ ރަށް ކުއްޔަށް ނެގީ ޔޫއޭއީގެ ރިއަލް އެސެޓް މެނޭޖުމަންޓު ކޮމްޕެނީއަކުންނެވެ.
ރިސޯޓު ތަރައްގީކުރަން ކުއްޔަށް ދޫކުރި ތަންތަން
- ހދ. ވައިކަރަަމުރައިދޫ - 750،000 ޑޮލަރު
- ބ. ގޮއިދޫ ފަޅުން ސަރަހައްދެއް - 521،360 ޑޮލަރު
- އއ. ބޮޑުގާ ފަޅު - 3.9 މިލިއަން ޑޮލަރު
- އދ. ގެނބުރުގާ ފަޅު - 3.4 މިލިއަން ޑޮލަރު
- ކ. އަތޮޅުން ފަޅެއް - 710،000 ޑޮލަރު
- މ. ތުވަރު - 4.3 މިލިއަން ޑޮލަރު
- ތ. މާގުޅި - ދެ ލައްކަ ޑޮލަރު
- ތ. ކުރަނދުވަރު - 1.7 މިލިއަން ޑޮލަރު
- ލ. ގަސްގަނޑުފިނޮޅު - 360،000 ޑޮލަރު
- ލ. ބޮޑުމުންޏަފުށި - 314،000 ޑޮލަރު
- ގއ. ބޭރުމައުއްޑޫ - 385،000 ޑޮލަރު
- ގދ. ރާވެރިންކޮޅިހުއްޓާ - 96،250 ޑޮލަރު
އެންމެ ބޮޑު އަގުގައި ކުއްޔަށް ދޫކޮށްފައި ވަނީ މ. ތުވަރެވެ. ދަނޑުވެރިކަން ކުރަން ގިނަ އަހަރުތަކެއް ވަންދެން ކުއްޔަށް ދޫކޮށްފައި އޮތް މި ރަށަކީ 500 ހެކްޓަރަށް ވުރެ ބޮޑު ފަޅެއްގެ ތެރޭގައި އޮންނަ 14 ހެކްޓަރުގެ ރަށެކެވެ.
ރިސޯޓު ތަރައްގީކުރަން ދޫކުރި ތަންތަނުގެ އިތުރުން ކުރިން ކުއްޔަށް ދޫކޮށްފައި ހުރި ތަންތަަނުގެ ކުލި މުއްދަތު އިތުރުކޮށްދީގެން ވަނީ 73 މިލިއަން ޑޮލަރު (1.1 ބިލިއަން ރުފިޔާ) ލިބުނެވެ.
މިދިޔަ އަހަރު ކުއްޔަށް ދޫކުރި ރަށްތަކާއި އަދި މި އަހަރުގެ މިހާތަނަށް ކުއްޔަށް ދޫކުރި ރަށްތަައް ހިމަނައިގެން ރާއްޖޭގައި ތަރައްގީކުރަމުން އަންނަ ރަށްތަކުގެ އަދަދު ވަނީ 165 އަށް އަރާފަ އެވެ. މި ވަގުތު ރާއްޖޭގައި އޮޕަރޭޓުކުރަމުން އަންނަ ރިސޯޓުތަކުގެ އަދަދަކީ 179 އެވެ.
