ފަތުރުވެރިކަމުގެ ބޭނުމަށް 15 ރިސޯޓު ތަރައްގީކުރުމަށް ހަތަރު ރަށަކާއި 11 ފަޅެއް ދޫކުރުމަށްޓަކައި ބީލަން ހުށަހެޅުމުގެ ފުރުސަތު ޓޫރިޒަމް މިނިސްޓްރީން ހުޅުވާލައިފި އެވެ.
އިއްޔެ ކުރި އިއުލާނެއްގައި އެ މިނިސްޓްރީން ވަނީ ހއ. މާދުނި ފަރުން ފަޅުގެ 200 ހެކްޓަރުގެ ތިން ސަރަހައްދާއި، ހދ. މަކުނުދޫ ފަރުން 200 މީޓަރުގެ ސަރަހައްދަކާއި، ހދ. މާފަރު ފަރުން 200 މީޓަރުގެ ތިން ސަރަހައްދާއި، ށ. ގޮނާ ފަރުން 200 މީޓަރުގެ ތިން ސަރަހައްދެއްގައި ރިސޯޓު ހެދުމަށް ޝައުގުވެރިވާ ފަރާތްތަކުންބ ބީލަން ހުށަހެޅުމަށް ހުޅުވާލާފަ އެވެ.
އޭގެ ތެރެއިން ހއ. މާދުނި ފަރުން ދޫކުރާ ތިން ސަރަހައްދާއި ށ. ގޮނާ ފަރުން ދޫކުރާ ތިން ސަރަހައްދަށް އެކުއިޒިޝަން ކޯސްޓުގެ ގޮތުގައި 2،115،000 އެމެރިކާ ޑޮލަރު ދައްކަން ޖެހެ އެވެ. އަދި ހދ. މާފަރު ފަރުން ދޫކުރާ ދެ ސަރަހައްދާއި ހދ. މަކުނުދޫ ފަރުން ދޫކުރާ ސަރަހައްދަށް އެކުއިޒިޝަން ފީގެ ގޮތުގައި 1،586،250 އެމެރިކާ ޑޮލަރު ދައްކަން ޖެހެ އެވެ.
އެ މިނިސްޓްރީން ވަނީ ހަލާލް ޓޫރިޒަމްގެ މޮޑެލްއަށް ތިން ރިސޯޓު ތަރައްގީކުރުމަށް ބީލަމަށް ހުޅުވާލާފަ އެވެ. އެއީ ލ. ފޮނަގާދޫ އާއި ސ. ދޮންހެރަ އަދި ހދ. މަކުނުދޫ ފަރުން ފަޅުގެ 200 ހެކްޓަރުގެ ސަރަހައްދެކެވެ. އޭގެ ތެރެއިން ފޮނަގާދޫގެ އެކިއުޒިޝަން ފީގެ ގޮތުގައި 588،960 އެމެރިކާ ޑޮަލަރު ދައްކަން ޖެހޭއިރު ސ. ދޮންހެރަ ނެގުމަށް 498،420 އެމެރިކާ ޑޮލަރު ދައްކަން ޖެހެ އެވެ. އަދި މަކުނުދޫ ފަރުން ދޫކުރާ ސަރަހައްދަށް 1،269،000 ޑޮލަރު ދައްކަން ޖެހެ އެވެ.
ހަމައެހެންމެ، އަނެއްކާ ވެސް ށ. ނަލަންދޫގައި ރިސޯޓެއް ތަރައްގީކުރާނެ އިންވެސްޓަރަކު ވޭތޯ ބީލަމަށް ވަނި ހުޅުވާލާފަ އެވެ. އޭއި މީގެ ދެ އަހަރެއްހާ ދުވަސްކުރިން ވެސް ބީލަމަށް ހުޅުވާލި ރަށެކެވެ. ނަލަންދުއަކީ ވަރަށް ގިނަ އަހަރުތަކެއް ވަންދެން ލަނޑާ އާލާކުރާ ބަޔަކަށް ކުއްޔަށް ދޫކޮށްފައި އޮތް ރަށެކެވެ. އެއީ ގުދުރަތީ ގޮތުން ހާއްސަ ސިފަތަކެއް ލިބިފައިވާ ރަށެކެވެ.
ޖުމުލަ 63 ހެކްޓަރުގެ ބޮޑުމިނުގެ ރަށުގައި 200 އެނދު ތަރައްގީކުރަން ހުޅުވާލީ އިއްޔެ އެވެ. އެ ރަށުގެ އެކުއިޒިޝަން ފީގެ ގޮތުގައި އެއް މިލިއަން ޑޮލަރު ދައްކަން ޖެހޭއިރު ބިޑު ހުށަހަޅާ މީހުންގެ މާލީ ގާބިލުކަން ސާބިތުކަން ކޮށްދިނުމަށް 10 މިލިއަން ޑޮލަރު ހުރިކަން ދައްކަން ޖެހެ އެވެ.
އޭގެ އިތުރުން ނ. ފަރުމުލީގައި 150 އެނދުގެ ރިސޯޓެއް ތަރައްގީކުރުމަށް ބީލަން ހުށަހެޅުމަށް ވެސް ވަނީ ހުޅުވާލާފަ އެވެ. އެ ރަށުގެ އެކުއިޒިޝަން ފީގެ ގޮތުގައި 2،250،000 ޑޮލަރު ދައްކަން ޖެހޭނެ އެވެ.
އެ ތަންތަން ކުއްޔަށް ނެގުމަށް ބީލަން ހުށަހެޅުމުގެ ސުންގަޑިއަކީ ނޮވެމްބަރު 18، 2026 އެވެ.
