މިދިޔަ އަހަރުގެ ތެރޭގައި ރާއްޖެއަށް ޒިޔާރަތްކުރި ޓޫރިސްޓުންގެ ތެރޭގައި ގިނައީ މުޅިން އަލަށް އަންނަ މީހުންނާއި ޖޯޑުތައް ކަމަށް ޓޫރިޒަމް މިނިސްޓްރީން ހަދާ ވިޒިޓާ ސާވޭއިން ދައްކައިފި އެވެ.
އަހަރުތަކެއްގެ މެދުކެނޑުމަކަށް ފަހު ޓޫރިޒަމް މިނިސްޓްރީން ހެދި އެންމެ ފަހުގެ ވިޒިޓާ ސާވޭއަކީ ނިމުނު އަހަރުގެ އޮކްޓޫބަރުގައި ރާއްޖެއަށް އައި ޓޫރިސްޓުންގެ ފަރާތުން މައުލޫމާތު ހޯދައިގެން ކުރި ދިރާސާއެކެވެ.
ޓޫރިޒަމް މިނިސްޓްރީގެ މި ސާވޭއިން ދައްކާ ގޮތުގައި، އެންމެ މަތީ ފަންތީގެ ލަގްޒަރީ މަންޒިލެއްގެ ގޮތުގައި ރާއްޖެއަށް ބޮޑު ޑިމާންޑެއް އަދިވެސް އެބައޮތެވެ. މި ޑިމާންޑަކީ، އަގު ހެޔޮ ވެގެން ނޫނީ ފަސޭހަ ވެގެން އޮންނަ ޑިމާންޑަކާ ހިލާފަށް، ސީދާ ރާއްޖޭގައި ޗުއްޓީ ހޭދަކުރަން އަންނަން ބޭނުންވެގެން އޮންނަ ޑިމާންޑެކެވެ.
އޭގެ އިތުރުން އެހެން ވައްތަރުގެ ޓޫރިޒަމް ޕްރޮޑަކްޓުތައް ފުޅާވަމުން އައި ނަމަވެސް، ޓޫރިސްޓުންގެ ޑިމާންޑު އަދިވެސް އޮތީ ރާއްޖޭގެ ޓޫރިޒަމްގެ ޕްރީމިއަމް ޕްރޮޑަކްޓު ކަމުގައިވާ ރިސޯޓުތަކަށް ކަމަށް ދިރާސާއިން ދައްކަ އެވެ.
ވިޒިޓާ ސާވޭގައިވާ ގޮތުގައި ރާއްޖެ އައި 73 ޕަސެންޓު މީހުންނަކީ ފުރަތަމަ ފަހަރަށް ރާއްޖެއަށް ޒިޔާރަތްކުރި މީހުންނެވެ. އަދި، 65 ޕަސެންޓު މީހުން އަންނަނީ އަނބިމީހާ ނުވަތަ ފިރިމީހާއާ އެކީގަ އެވެ. އެންމެ ގިނައިން އަންނަނީ "މިލޭނިއަލް" އުމުރުފުރާގެ މީހުންނެވެ. އަދި، ގިނަ ޓޫރިސްޓުން ހިޔާރުކުރަނީ ރިސޯޓުތަކުގައި ޗުއްޓީ ހޭދަކުރުމަށެވެ.
ޗުއްޓީއަށް އައިސް ހޭދަކުރާ މުއްދަތަށް ބަލާއިރު، ކޮންމެ ޓޫރިސްޓަކު އެވަރެޖުކޮށް ހަތަރު ދުވަހާއި ހަތް ދުވަހާ ދެމެދުގެ މުއްދަތެއް ވަންދެން ޗުއްޓީ ހޭދަ ކުރެ އެވެ. އަދިވެސް، ގިނަ މީހުން އަންނަނީ ރާއްޖޭގެ ގުދުރަތީ ރީތިކަން ދެކިލާށެވެ.
މިދިޔަ އަހަރަކީ ރާއްޖޭގެ ޓޫރިޒަމުގެ ތާރީހުގައި ފާހަގަކޮށްލެވޭ ވަރުގެ ކާމިޔާބީތަކެއް ހޯދި އަހަރެކެވެ. އެ ގޮތުން ފުރަތަމަ ފަހަރަށް ދެ މިލިއަން ޓޫރިސްޓުންގެ އަމާޒަށް ވާސިލުވުމާއި، ރެކޯޑު އަދަދަކަށް ޓޫރިޒަމް ސިނާއަތަށް އާމްދަނީ ލިބުން ފާހަގަކޮށްލެވެ އެވެ.
