ސަރުކާރުން އިއުލާންކޮށްފައިވާ ޕްރޮޖެކްޓުތަކުގެ ދުވެލި ލަސްވެ، ގިނަ ޕްރޮޖެކްޓުތަކެއް ހުއްޓި މަސައްކަތް ނުހިނގާ މައްސަލައިގައި، ރައީސް މުހައްމަދު މުއިއްޒު އިއްޔެ ބޭއްވި ކެބިނެޓު ބައްދަލުވުމުގައި ކޯފާއިސްކުރައްވައި މިނިސްޓަރުން ބަދުނާމުކުރައްވައިފި އެވެ.
އިތުބާރު ހުރި މަސްދަރުތަކުން "އަދަދު" އަށް މައުލޫމާތު ދިން ގޮތުގައި، ކެބިނެޓު ބައްދަލުވުމުގައި ރައީސް މުއިއްޒު ވަނީ ޕްރޮޖެކްޓުތައް ނުހިނގަނީ މިނިސްޓަރުންގެ ފަރުވާކުޑަކަމުން ކަމަށް ތުހުމަތުކުރައްވާފަ އެވެ. އެ ގޮތުން ފައިސާ ހަމަނުޖެހި ހުރި ޕްރޮޖެކްޓުތަކުގެ މައްސަލައިގައި، މުއިއްޒު ވަނީ މިހާރުގެ ފިނޭންސް މިނިސްޓަރު ހަސަން ޒަރީރާއި ކުރީގެ ފިނޭންސް މިނިސްޓަރު މޫސާ ޒަމީރަށް ވެސް ތުހުމަތުގެ އިނގިލި ދިއްކުރައްވާފަ އެވެ.
"މިނިސްޓަރުން ރައްދުގައި ބަހެއް ވިދާޅެއް ނުވޭ. އަސްލު ސަބަބު ހުރިހާ ބޭފުޅުންނަށް ވެސް ސާފު ދެއްތޯ. ޕްރޮޖެކްޓުތައް ކުރިއަށް ނުގެންދެވެނީ ފައިސާ ނެތީމަ،" އަދަދު ނޫހާ ވާހަކަ ދެއްކެވި އެއް ބޭފުޅަކު ވިދާޅުވި އެވެ.
އެހެން މަސްދަރަކުން ބުނި ގޮތުގައި ރައީސް ކޯފާ އިސްކުރައްވައި ވާހަކަ ދެއްކެވުމަށް ފަހު އާންމުކޮށް ކެބިނެޓު ނިންމާ ވަގުތަށް ވުރެ އިއްޔެ ކެބިނެޓުގެ ބައްދަލުވުން އަވަހަށް ނިންމައިލެއްވި އެވެ.
އޭނާ ވިދާޅުވި ގޮތުގައި ޕޮރޮޖެކްޓުތަކާއި ބަޖެޓު ސަޕޯޓަށް ރާއްޖޭން ބޭރުން ހޯދަން މަސައްކަތްކުރި އެހީ ވެސް ލިބިފައި ނުވާ ކަމަށެވެ.
ޕްރޮޖެކްޓުތަކުގެ މައްސަލައިގައި ރައީސް މުއިއްޒު ކޯފާއިސްކުރެއްވިއިރު، މި ސަރުކާރުން ޕްރޮޖެކްޓުތައް ހަވާލުކުރުމުގެ ކުރިން އެމަނިކުފާނު ވަނީ ފައިސާއާއި ހުރިހާ ކަމެއް ވެސް ހަމަޖެހިފައިވާ ކަމަށް ތަކުރާރުކޮށް އެކި މަންސަތަކުގައި ވިދާޅުވެފައެވެ.
އެހެންނަމަވެސް، ސަރުކާރު ކުންފުނިތަކާ ހަވާލުކުރި ޕްރޮޖެކްޓުތަކާއި އަމިއްލަ ކުންފުނިތަކަށް ބަހާލި ގިނަ ޕްރޮޖެކްޓުތައް މިހާރު ހުރީ ހުއްޓިފައެވެ. ބައެއް ޕްރޮޖެކްޓުތަކުގެ މަސައްކަތް ކޮންމެވެސް ވަރަކަށް ކުރިއަށްދިޔަ ނަމަވެސް، ގިނަ ޕްރޮޖެކްޓުތައް ހުރީ ބިންގާ އެޅުމާ ހަމައިން ހުއްޓިފައެވެ.
މިފަދަ މައްސަލަތަކާ ގުޅިގެން އާންމުންގެ ފަރާތުން ލިބެމުންދާ ޝަކުވާތަކާ ހެދި، ރައްޔިތުންގެ މަޖިލީހުގައި ތިއްބެވި ސަރުކާރު ހިންގާ ޕީއެންސީއަށް ނިސްބަތްވާ މެންބަރުން ވެސް ވަނީ ކަންބޮޑުވުން ފާޅުކުރައްވަން ފައްޓަވާފައެވެ.
މި ސަރުކާރުގެ ދައުރުގެ ތެރޭގައި އުމްރާނީ ތަރައްގީގެ ޕްރޮޖެކްޓުތަކަށް ހަރަދުކުރާ ފައިސާގެ އަދަދު ވެސް ވަނީ ވަރަށް ބޮޑަށް ދަށްވެފައެވެ. މިދިޔަ އަހަރުގެ ތެރޭގައި ވެސް ކެޕިޓަލް ހަރަދުތަކަށް 12.5 ބިލިއަން ރުފިޔާ ބަޖެޓުކުރި ނަމަވެސް، ހަރަދުކުރެވުނީ 6.8 ބިލިއަން ރުފިޔާ އެވެ.
މިދިޔަ އަހަރެކޭ އެއްފަދައިން މި އަހަރު ވެސް ކެޕިޓަލް ހަރަދުތައް ކުރަމުންދަނީ ވަރަށް ބޮޑަށް ހިފަހައްޓައިގެންނެވެ. އެންމެ ފަހުގެ ހިސާބުތަކުން ދައްކާ ގޮތުގައި އަހަރު ދެބައިވީއިރު ހަރަދުކުރެވުނީ މި އަހަރަށް ބަޖެޓުކުރި ނުވަ ބިލިއަނަށް ވުރެ ގިނަ ރުފިޔާގެ 3.2 ބިލިއަން ރުފިޔާ އެވެ.
