ނިމިގެން ދިޔަ މިނިވަން ދުވަހުގެ ރަސްމީ ޖަލްސާގައި ހިތްހަމަނުޖެހުމާއި ރުޅިވެރިކަމާއެކު، ރައީސް މުހައްމަދު މުއިއްޒު ދެއްވި ތަގުރީރު ނިންމާލައްވަން އެ މަނިކުފާނު ބޭނުންވީ ރައްޔިތުންގެ ހިތްތަކުގައި އުންމީދުތަކެއް އާކޮށްދިންނުމަށް ފަހު އެވެ. ވެތުވެދިޔަ ދެ ސަރުކާރަށްވުރެ ގިނަ މަޝްރޫއު ނިންމައި، އަދި އެތައް ގުނައެއް ގިނަ މަޝްރޫއުތަކެއް މިހާރު ވެސް ހިނގަމުންދާ ކަމަށް އެމަނިކުފާނު ވިދާޅުވެފަ އެވެ.
"އަޅުގަނޑުމެން ވާހަކަ ދައްކާނީ ނަތީޖާއިން" ކަމަށް މުއިއްޒު ވިދާޅުވި ނަމަވެސް، ސިޔާސީ ޕޯޑިއަމެއްގައި ދެއްކެވި މި ވާހަކަތައް ހަގީގަތާ އެއްގޮތްތޯ ބަލާލުން މުހިންމެވެ.
ތަގުރީރުގައި މުއިއްޒު ވިދާޅުވި ގޮތުގައި މި ސަރުކާރުން ވަނީ އެކި ދާއިރާތަކުން 590 މަޝްރޫއު ނިންމައި، 1635 މަޝްރޫއު ކުރިއަށް އެބަދެ އެވެ. ކުރީގެ ދެ ސަރުކާރުގެ ފުރަތަމަ ދެ އަހަރާއި އަށް މަހުގެ ނަތީޖާއާ އަޅާބަލާއިރު މިއީ ބޮޑު ކުރިއެރުމެއް ކަމަށް މުއިއްޒު ވިދާޅުވި އެވެ. ނަމަވެސް، ސުވާލަކީ މިއީ ކިހާވަރެއްގެ ސައްހަ އަދަދުތަކެއް ހެއްޔެވެ؟
މައުލޫމާތު ހޯދައި ލިބިގަތުމުގެ ހައްގުގެ ގާނޫނުގެ ދަށުން މައުލޫމާތު ހޯދަން އެދުމުންވެސް، ނިމުނު އަދި ހިނގަމުންދާ މަޝްރޫއުތަކުގެ ތަފްސީލީ މައުލޫމާތު ރައީސް އޮފީހުން ހާމައެއް ނުކުރެ އެވެ. އެހެންވެ، ސިޔާސީ ވާހަކައެއްގެ ގޮތުގައި އަދަދުތަކެއް އިއުލާނު ކުރެއްވި ނަމަވެސް، ގާނޫނީ ގޮތުން ކަށަވަރު ކުރެވޭނެ އުސޫލަކުން މައުލޫމާތު ހާމަނުކުރުމަކީ، އެ އަދަދުތަކުގެ ސައްހަކަމާމެދު ސުވާލު އުފެދޭ ކަމެކެވެ.
އެންމެ އަޖައިބުވާންޖެހޭ ކަމަކީ، މިނިވަން ދުވަހުގެ ތަގުރީރުގައި ކާމިޔާބުގެ ވާހަކަ ދެއްކެވިތާ ދެ ހަފުތާތެރޭގައި، އިއްޔެގެ ކެބިނެޓު ބައްދަލުވުމުގައި މަޝްރޫއުތައް ކުރިއަށް ނުދާތީ މުއިއްޒު ކޯފާ އިސްކުރެއްވި ކަމަށް ތިލަވި މައުލޫމާތެވެ. ސަރުކާރުން ދައްކާ އަދަދުތަކާ އެއްވަރަށް މަޝްރޫއުތައް ބާރަށް ކުރިއަށްދާނަމަ، ކެބިނެޓުގައި ކޯފާ އިސްކުރައްވަންޖެހޭ ސަބަބެއް ނެތެވެ.
އަދަދު ނޫހާ ވާހަކަ ދެއްކެވި ސަރުކާރުގެ ބައެއް އިސް އޮފިޝަލުން ވިދާޅުވި ގޮތުގައި މަޝްރޫއުތައް ހިނގާ ކަމަށް ބުނި ނަމަވެސް އެކަންކަން އެކަށީގެންވާ ގޮތެއްގައި ކުރިއަށް ނުދެ އެވެ. މައިގަނޑު ސަބަބަކީ ފައިސާ ނެތުމެވެ. މިއީ ހިންގުމުގެ ގާބިލުކަން ނެތުމުގެ ސަބަބުންނާއި، ހަރަދުތައް ބޮޑުވެ، މާލީ ތާށިކަން ބޮޑުވުމުން ދިމާވި ހާލަތެއްކަން އެންމެން ވެސް ގަބޫލުކުރަންޖެހެ އެވެ.
އަމިއްލަ އަށް ގެނުވި ސަބަބުތަކަކާއެކު މެދުވެރިވެފައިވާ މާލީ މި ދަތިކަމުގައި ގައުމު އޮއްވައި، މުއިއްޒު ވަނީ 2028 ގެ މިނިވަން ދުވަހަށް ވަރަށް ބޮޑެތި ވައުދުތަކެއް ވެވަޑައިގެންފަ އެވެ.
އެގޮތުން، ހުރިހާ ރަށެއްގައި ފެނާއި ނަރުދަމާ، ވޭސްޓް މެނޭޖްމަންޓް، އަދި އޭޓީއެމް ގާއިމުކުރުމާއި، ކޮންމެ އަތޮޅެއްގައި އެސްޓީއޯ ރޭޓުގައި ތެޔޮ ވިއްކާ ޝެޑާއި 30 މިނެޓުން ދެވޭނެ އެއާޕޯޓު ގާއިމުކުރުން ހިމެނެ އެވެ.
ކޮންމެ އަތޮޅެއްގައި ސީޓީ ސްކޭނާއި ޑައިލިސިސްގެ ހިދުމަތް، އިސްލާމިކް ސެންޓަރުތައް، 100 ރަށުގެ ކައުންސިލް އިމާރާތް އަދި ފަސް މިލިއަން ގަސް އިންދުމުގެ މަޝްރޫއު ނިންމެވުމަކީވެސް އެ ތަސައްވުރުގެ ބައެކެވެ.
މީގެ އިތުރުން މާލޭގެ މަގުހެދުމާއި، ތިލަމާލެ ބްރިޖާއި، ޕޯޓު ބަދަލުކުރުމާއި ވިލިމާލެ ހޮސްޕިޓަލް ނިންމުން ފަދަ ކަންކަންވެސް ހިމެނެއެވެ.
މި ތަސައްވުރުތަކަކީ ކޮންމެ ރައްޔިތަކު ވެސް އެދޭނެ، އަޑުއަހަން ރީތި، ފަސޭހަ ކަންކަމެވެ. ނަމަވެސް، އަދުގެ މާލީ ހާލަތު އޮތްގޮތުންނާއި، މިހާރު ހުރި މަޝްރޫއުތައް ވެސް ފައިސާ ނެތިގެން ހުއްޓެމުން ދާއިރު، މިފަދަ ބޮޑެތި ވައުދުތަކެއް 2028 އަށް ފުރިހަމަވާނެ ކަމަށް ގަބޫލުކުރުން ފަސޭހައެއް ނޫނެވެ.
ވެރިކަމުގެ ހުވާކުރެއްވުމުގެ ކުރިން މި ސަރުކާރުގެ އިސްވެރިން ވިދާޅުވަމުން ގެންދެވީ ފައިސާ ހޯދާނެ ގޮތް އެނގިވަޑައިގަންނަވާ ކަމަށެވެ. ނަމަވެސް ތިން އަހަރުވުމަށް ގާތްވެފައިވާއިރު އެ ވިދާޅުވި ނަތީޖާ އާއި ގާބިލްކަމެއް މުއިއްޒު އަދި މި ސަރުކާރަށް ދެއްކިއްޖެތޯ އަމިއްލަ އަށް ފައިސަލާ ކޮށްލާށެވެ.
ސިޔާސީ ޕޯޑިއަމްތަކުގައި ބޮޑެތި އަދަދުތަކާއި މޮޅު ތަސައްވުރުތައް ދެއްކުމަކީ ފަސޭހަކަމެކެވެ. ނަމަވެސް، ވާހަކަ ދައްކާނީ ނަތީޖާއިން ކަމަށް ވިދާޅުވާއިރު، ރައްޔިތުންނަށް ފެންނަ ނަތީޖާއަކީ މާލީ ތާށިކަމެވެ.
މަޝްރޫއުތައް ހުއްޓި، ފައިސާ ނެތިގެން ނުރައްކާތެރި ހާލަތެއް އުފެދިފައިވާ ތަނެވެ. ޑޮލަރުގެ އަގު 22ރ. އަށް އަރައި، މުސާރަ ދިނުމަށް ފައިސާ "ޗާޕްކުރަންޖެހޭ ހިސާބަށް" ގޮސްފައިވާ ހާލަތެވެ.
މަޝްރޫއުތައް ކުރިއަށްދާ ކަމަށް މުއިއްޒު މާލެގައި ހުންނަވައި ޕޯޑިއަމްގައި ވިދާޅުވި ނަމަވެސް، ކޮންމެ ރަށަކަށް ވަޑައިގެން ކުރެއްސެވި ތަސްވީރު ކުލަ ނުވާކަށް އެ ރަށުގެ ރައްޔިތުންނަށް އެނގެ އެވެ. އެ ވާހަކަ ރައްޔިތުންގެ ދުލުން ދައްކަމުން ދާއިރު، އަދި މަންޒަރުތައް އެކި މަންސަ ތަކުގައި ހިއްސާކުރަމުން ދާއިރު، މުއިއްޒުގެ ކަށިނެތް ދުލުން އަމުނާލާ ފޮނިބައިސާތަކުން މަޝްރޫއުތަކުގެ ބިންގާ އެޅި، އިމާރާތް ކޮޅަކަށް ނުޖެހެ އެވެ.
