ރައީސް މުހައްމަދު މުއިއްޒުގެ ސަރުކާރުގައި ތިއްބެވި އިސް ބޭފުޅުންނާ މެދު ހިތްބުރަކަމެއް ނެތް ކަމަށާއި ނަމަވެސް އެ މަނިކުފާނުގެ އަރިހުގައި ވައްކަން ކުރަން ތިއްބެވި ބޮޑެތި ބޭފުޅުންނަށް އެމަނިކުފާނު އެކުލަވާލާ ސަރުކާރަކުން އަލުން ޖާގައެއް ނުދެއްވާނެ ކަމަށް ކުރީގެ ރައީސް އަބްދުﷲ ޔާމީން ވިދާޅުވެއްޖެ އެވެ.
ސަންގު ޓީވީން ރޭ ގެނެސްދިން ޕްރޮގްރާމެއްގައި ޔާމީން ވިދާޅުވީ މުއިއްޒަށް 2028 ކާމިޔާބު ކުރެއްވޭނެ ތަނެއް ފެނިވަޑައިނުގަންނަވާ ކަމަށާއި ރިޔާސީ އިންތިހާބުގައި މުއިއްޒުގެ ތާއިދު އެމަނިކުފާނަށް ދިނުމަކީ މުއިއްޒުގެ އަމިއްލަ ނިންމުމެއް ކަމަށެވެ.
އެފަދަ ހާލަތެއްގައި ވެސް މުއިއްޒު އަރިހުގައި ވައްކަން ކުރަން ތިބި އިސް މީހުންނަށް ޖާގައެއް ނޯންނާނެ ކަމަށް ޔާމީން ވިދާޅުވި އެވެ.
"މުއިއްޒުގެ ސިޔާސަތުތަކަށް އަޅުގަނޑުމެން ފާޑުކިޔަނީ. ދެން މުއިއްޒުގެ އަރިހުގައި ވައްކަންކުރަން އެ އުޅޭ ބޮޑެތި މީހުންނަށް އަޅުގަނޑު އިންތިހާއަށް ނަފުރަތު ކުރަން. އެ މީހުންނަކަށް އަޅުގަނޑުގެ ކައިރިޔަކު ޖާގައެއް ނޯންނާނެ. ހަމަ ޝައްކެއް ވެސް ނެތް ގޮތުގައި،" ޔާމީން ވިދާޅުވި އެވެ.
ޕީޕީއެމް/ޕީއެންސީ ސަރުކާރުގެ މަގާމުތަކުގައި ކުރިން ތިއްބެވި، އަދި މިހާރު ވެސް ތިއްބެވި ބޭފުޅުން އަލުން ގެނައުމަކީ ރަނގަޅު ގޮތަކަށް ދެކެވަޑައިގަންނަވާ ކަމަށާއި ކަމަށާއި ދެން އެމަނިކުފާނު އެކުލަވާލާ ކެބިނެޓެއްގައި ޒުވާނުން ތިއްބަވާނެ ކަމަށް ޔާމީން ވިދާޅުވި އެވެ.
މުއިއްޒާ މެދު ރުޅިވެރިކަމެއް ނެތްކަން ހާމަކުރައްވަމުން ޔާމީން ވިދާޅުވީ، އެ މަނިކުފާނުގެ ރުޅިވެރިކަން އޮތީ ނާއިންސާފުން ޖަލަށް ލުމުން ކުރީގެ ރައީސް އިބްރާހީމް މުހައްމަދު ސޯލިހަށް އެކަނި ކަމަށެވެ.
"އެހެން މީހުންނާމެދު ރުޅިވެރި ކަމެއް ނެތް. މުއިއްޒުއާމެދު ރުޅިވެރިކަމެއް އަމުދުން ނެތް. އެއީ އަޅުގަނޑުމެންގެ ތެރެއިން ވަޑައިގެންނެވި ބޭފުޅެއް. އަޅުގަނޑު ގަބޫލެއް ނުކުރަން މުއިއްޒުއަކީ އަނިޔާވެރި ބޭފުޅަކަށް ވެދާނެ ކަމަކަށް. އެހެންވީމަ އަޅުގަނޑު ޖަލަށް ގެންދަވަފާނެ ކަމަށް އަޅުގަނޑު ގަބޫލެއް ނުކުރަން،" ޔާމީން ވިދާޅުވިއެވެ.
