ގައުމު ހަމަ މަގަށް އެޅުވުމުގެ ތަސައްވުރެއް އަދި ގާބިލްކަމެއް ރައީސް މުހައްމަދު މުއިއްޒުގެ ކިބައިގައި ނެތް ކަމަށް ވިދާޅުވެ އެމަނިކުފާނަށް ކުރީގެ ރައީސް އަބްދުﷲ ޔާމީން ވަރަށް ބޮޑަށް ފާޑުވިދާޅުވެއްޖެ އެވެ.
ސަންގު ޓީވީން ރޭ ގެނެސްދިން ޕްރޮގްރާމެއްގައި ވާހަކަ ދައްކަވަމުން ޔާމީން ވިދާޅުވީ، އިގުތިސާދީ އަދި މާލީ ގޮންޖެހުންތަކުން ގައުމު ސަލާމަތްކުރުމުގެ ހިކުމަތް މި ސަރުކާރުގައި ނެތް ކަމަށެވެ. އަދި މިހާރު ދިމާވެގެން އުޅޭ ޑޮލަރުގެ މައްސަލަ އާއި ތަކެތީގެ އަގު އުފުލުމުގެ މައިގަނޑު ސަބަބަކީ ސަރުކާރުގެ މިސްމެނޭޖްމަންޓާއި ހަރަދު ބޮޑުވުން ކަމަށް އެމަނިކުފާނު ފާހަގަކުރެއްވި އެވެ.
ޑޮލަރުގެ އަގާއި އިގުތިސާދީ މިސްމެނޭޖްމަންޓް
ޑޮލަރުގެ އަގު އުފުލިގެން ދިޔަ ސަބަބުތުތަކަށް އަލިއަޅުއްވާލައްވަމުން ޔާމީން ވިދާޅުވީ، ދަރަންޏަކީ އޭގެ ޒާތުގައި އަމިއްލައަށް އުފެދޭ އެއްޗެއް ނޫން ކަމަށާއި އެއީ ސަރުކާރުގެ ސިޔާސަތުތަކުގެ ނަތީޖާ ކަމަށެވެ.
"ދަރަންޏަކީ ސަރުކާރުގެ ސިޔާސަތު. ހޭދަކުރުމަކީ ހަރަދުކުރުމަކީ ސަރުކާރުގެ ސިޔާސަތު. އެހެންވީމަ ހަރަދު ބޮޑުވެގެން ދިޔައީމަ، ދަރަނި ބޮޑުވެގެން ދިޔުމާއި ދަރަނި އުފެދުމާއި ދަނަރި މެނޭޖު ނުކުރެވުމާއި އެއީ ސަރުކާރު ފުރިހަމައަށް ޒިންމާ އުފުލަންޖެހޭ ކަމެއް،" ޔާމީން ވިދަޅުވި އެވެ.
ކުރީ ސަރުކާރުގެ ދަރަނިތައް ދައްކަންޖެހުނު ކަމަށް މި ސަރުކާރުން ބުނާ ބުނުމަށް ރައްދު ދެއްވަމުން ޔާމީން ވިދާޅުވީ، ކޮންމެ ސަރުކާރެއް ނިމޭއިރު ވެސް ދަރަނި އޮންނާނެ ކަމަށާއި، ސަރުކާރަކީ ހިނގަހިނގާ އޮންނަ އޮގަނައިޒޭޝަނެއް ކަމަށެވެ. މުއިއްޒު ނޫނަސް ކޮންމެ ރައީސަކު އަންނައިރުވެސް ކުރީގެ ދަރަނި އޮންނާނެ ކަން ފާހަގަކުރެއްވި އެވެ.
ތަކެތީގެ އަގު މައްޗަށް ދިއުމާ ގުޅޭގޮތުން ޔާމީން ވިދާޅުވީ، ދިވެހި ރުފިޔާގެ އަގު ދަށްވުމަކީ ސަރުކާރުގެ ފެއިލިއާއެއް ކަމަށެވެ.
"ދިވެހި ރުފިޔާގެ އަގު ދަށްވުމަކީ ސަރުކާރުގެ ފެއިލިއާ. ސަރުކާރަކީ ރުފިޔާގެ އަގު ހިފަހައްޓަން އޮތް ބައެއް. ދިވެހި ރުފިޔާގެ އަގު ދައްކަވަމުންދާ ކަމަށް ވަންޏާ ތަކެތީގެ އަގު މައްޗަށް ދާނެ. ޑޮލަރުގެ އަގު ބޮޑުވާނެ،" ޔާމީން ވިދާޅުވި އެވެ.
މިހާރު ކަޅުބާޒާރުގައި ޑޮލަރެއްގެ އަގު 21.85ރ. އަށް އަރާފައިވާ އިރު، ޔާމިން ވިދާޅުވީ ކުރިއަށް އޮތް 3-4 މަސްދުވަހުގެ ތެރޭގައި ނުވަތަ މި އަހަރުގެ ނިޔަލަށް ވެސް ސަރުކާރަށް ޑޮލަރުގެ އަގު ހިފެހެއްޓޭނެ ކަމަށް އަންދާޒާ ނުކުރެއްވޭ ކަމަށެވެ.
މަޝްރޫއުތަކުގެ ކްރެޑިޓާއި ގަވާނަންސް ތަޖުރިބާ
އެމަނިކުފާނުގެ ވެރިކަމުގައި ހިންގެވި ބޮޑެތި މަޝްރޫއުތަކުގެ (ބްރިޖާއި، ދަރުމަވަންތަ ހޮސްޕިޓަލް އަދި ސަލްމާން މިސްކިތް ފަދަ) ތަންތަނުގެ ކްރެޑިޓް ރައީސް މުއިއްޒު ނަންގަވާތީ އެކަމަށް ރައްދު ދެއްވަމުން ޔާމީން ވިދާޅުވީ، އެއިން އެއްވެސް މަޝްރޫއަކީ މުއިއްޒު އިސްނެންގެވި މަޝްރޫއެއް ނޫން ކަމަށެވެ.
"މީގެން އެއްވެސް މަޝްރޫއަކީ މުއިއްޒު އޮރިޖިނޭޓު ކުރެއްވި މަޝްރޫއެއް ނޫން... ބްރިޖުގެ ކަންކަމުގައި މުއިއްޒު ކޮން ކަމެއްތޯ ކުރައްވާނީ، އެއީ ޗައިނާ އެއިޑު. ދަރުމަވަންތަ ހޮސްޕިޓަލްގެ ކަންތަކުގައި ސިންގަޕޫރު ބަޔަކު އައިސް ކުރި މަސައްކަތް. މުއިއްޒުގެ ކޮންޓްރިބިއުޝަނެއް ނޯންނާނެ އެޔަކު،" ޔާމީން ވިދާޅުވި އެވެ.
މި ސަރުކާރު އެއްވަރު ކުރީ ހިންޏަކާ
ޔާމީން ސިފަކުރެއްވި ގޮތުގައި މި ސަރުކާރަށް ކުޑަކުޑަ ކަމެއް ފެންނަނީވެސް ބޮޑު ފަރުބަދައެއްގެ ގޮތުގަ އެވެ.
"ހިންޏަކަށް ކުޑަކުޑަ ވެލި ފުންޏެއް ވެސް ފެންނާނީ ބޮޑު ފަރުބަދައެއްގެ ގޮތުގައި. މި ސަރުކާރަށް ވެގެން އުޅެނީ އެގޮތް،" ޔާމީން ވިދާޅުވި އެވެ.
ރައީސް ޔާމީން ވިދާޅުވި ގޮތުގައި މި ސަރުކާރަށް ބޭރުގެ އެހީތެރިކަން ނުލިބެނީ މައްސަލަތައް ހައްލުކުރުމުގެ ގާބިލްކަން ހުރިކަމަށް ބޭރު ގައުމުތަކަށް ގަބޫލުނުކުރެވޭތީ އެވެ. މޫޑީސް އާއި ފިޗްގެ ރޭޓިން ދަށްވަމުންދަނީ އިންވެސްޓަރުންގެ އިތުބާރު ނެތުމުން ކަމަށް އެމަނިކުފާނު ވިދާޅުވި އެވެ.
މުއިއްޒާމެދު އަމިއްލަ ރުޅިވެރިކަމެއް ނެތްކަން ހާމަކުރައްވަމުން ޔާމީން ވިދާޅުވީ، އެމަނިކުފާނުގެ ހިތްޕުޅުގައި ރުޅިވެރިކަން އޮތީ ހަމައެކަނި ކުރީގެ ރައީސް އިބްރާހިމް މުހައްމަދު ސޯލިހާމެދު ކަމަށެވެ.
"އެއްވެސް ރުޅިވެރިކަމެއް ނެތް، ރުޅިވެރިކަން އޮތީ ސޯލިހުއަށް. އެއީ ނާއިންސާފުން ޖަލަށް ލީމަ... މުއިއްޒުއާމެދު ރުޅިވެރިކަމެއް އަމުދުން ނެތް. އެއީ އަޅުގަނޑުމެންގެ ތެރެއިން ވަޑައިގެންނެވި ބޭފުޅެއް،" ޔާމީން ވިދާޅުވި އެވެ.
މުއިއްޒުގެ ސިޔާސަތުތަކަށް ފާޑުވިދާޅުވާނެ ކަމަށާއި، ކުރިއަށް އޮތް 2028 ވަނަ އަހަރުގެ ރިޔާސީ އިންތިހާބުގެ ވޯޓުކަރުދާހުގައި އެމަނިކުފާނުގެ ނަންފުޅު އޮންނާނެ ކަމަށް ޔާމީން ވިދާޅުވި އެވެ. އަދި ރައީސް މުއިއްޒު ހޮއްވައިދެއްވަން ދެން މަސައްކަތް ނުކުރައްވާނެ ކަމަށާއި، މުއިއްޒު އަރިހުގައި ތިއްބެވި ކޮރަޕްޝަންގެ ތުހުމަތު ކުރެވޭ ބޭފުޅުންނަށް އެމަނިކުފާނުގެ ކައިރިން ޖާގައެއް ނުލިބޭނެ ކަމަށް ވިދާޅުވި އެވެ.
