ކަސަބްލަންކާ، މޮރޮކޯ (އޮގަސްޓް 7) - ފީފާގެ ރައީސް ޖިއާނީ އިންފަންޓީނޯގެ ލީޑަޝިޕާއި ފީފާގެ މުބާރާތްތައް ބޮއިކޮޓް ކުރުމުގެ ވިސްނުން ޔޫރަޕްގެ މައި ފުޓްބޯޅަ އިދާރާ ޔުއެފާ އިން ދަމަހައްޓާފައިވާކަން އިއުލާނުކޮށްފައިވަނިކޮށް، އެފްރިކާގެ ފުޓްބޯޅަ ފެޑެރޭޝަން، ކާފް އިން އިންފަންޓީނޯ އަށް ސަޕޯޓް އޮތްކަން އިއުލާނުކޮށްފި އެވެ.
ފީފާ ފޯވާޑް އެންޓަޕްރައިސް (އެފްއެފްއީ)ގެ ނަމުގައި، ޕްރައިވެޓް އިންވެސްޓަރުންނަށް ފީފާ ވޯލްޑް ކަޕް ހިމެނޭހެން، ފީފާ މުބާރާތްތަކުގެ، 21 ޕަސެންޓް ހިއްސާ ވިއްކާލަން އުޅުނު ޑީލުގެ ތެރެއިން ގޯސްތަކެއް ހެދިފައިވާތީވެ، ފީފާގެ ރައީސް، އިންފަންޓީނޯ މައާފަށް އެދިވަޑައިގަތެެވެ.
ތިން ވަނަ ދައުރަކަށް ފީފާގެ ރައީސްކަން ކުރައްވަމުން އަންނަ އިންފަންޓީނޯ އަށް މަގާމުގައި ދެމިހުރުމަށްޓަކައި ދަތިތަކެއް ވަނީ ކުރިމަތިވެފަ އެވެ. މަގާމުގައި ދެމިހުރުމަށްޓަކައި، އަދި، އަންނަ އަހަރު މާޗް މަހު ބާއްވާ ފީފާގެ އިންތިހާބު ކާމިޔާބުކުރުމުގެ މަސައްކަތުގެ ތެރެއިން، އިންފަންޓީނޯ ވަނީ ފީފާގެ ލީޑަޝިޕްގެ އެކި ފަރާތްތަކާ އެކު، މޮރޮކޯގައި ބުދަ ދުވަހު ބައްދަލުވުމެއް ބާއްވައިފަ އެވެ.
ފީފާގެ ރައީސް އިންފަންޓީނޯ މައާފަށް އެދިއްޖެ
ފީފާ ވޯލްޑް ކަޕް ހިމެނޭހެން މުބާރާތްތަކުގެ ހިއްސާ އަމިއްލަ އިންވެސްޓަރުންނަށް ވިއްކާލަން އުޅުނު ޑީލުގައި ގޯސްތަކެއް ހެދިފައިވާތީ ފީފާގެ ރައީސް ޖިއާނީ އިންފަންޓީނޯ މައާފަށް އެދިއްޖެ. މި ޑީލާ ގުޅިގެން ފީފާގެ އިތުބާރު ގެއްލެމުންދާ ކަމަށް ބުނެ ފާޑުކިޔުންތައް އަމާޒުވެފައިވާއިރު، ޔުއެފާ އިން ދަނީ އިންފަންޓީނޯ މަގާމުން ދުރުކުރުމަށް މަސައްކަތް ކުރަމުން
އެ ބައްދަލުވުމަށް ފަހު، ފީފާގެ މެމްބަރު 211 ގައުމަށް އިންފަންޓީނޯ އާއި ފީފާގެ ޖެނެރަލް ސެކްރެޓަރީ، މަޓިއަސް ގްރަފްސްޓްރަމް ސޮއިކުރައްވައި ސިޓިއެއް ފޮނުވައިފަ އެވެ. އެ ސިޓީގައި އިންފަންޓީނޯ ވަނީ، އެފްއެފްއީގެ ޑީލްގެ ކަންކަމުގައި ގޯސްތަކެއް ހެދިފައިވާ ކަމަށާއި އެކަމާ މައާފަށް އެދޭ ކަމަށް ވިދާޅުވެފަ އެވެ. އަދި، އެފްއެފްއީގެ ކަންތައްތައް ކުރިއަށްގެންދިޔައިރު، އެސޯއިއޭޝަންތަކަށް ފުރިހަމަ މައުލޫމާތު ފޯރުކޮށްނުދެވުން އެއީ ހެދުނު ގޯހެއް ކަަމަށާއި އެ ފަދަ ކަމެއް ދެން ތަކުރާރުނުވާނެ ކަމަށެވެ.
އެއާ އެކު، ޔުއެފާ އިން ބަޔާނެއް ނެރެ ބުނެފައިވަނީ، އިންފަންޓީނޯއާ މެދު އެ ފެޑެރޭޝަނުން ދެކޭ ގޮތް ބަދަލުނުވާ ކަމަށާއި ފީފާގެ މުބާރާތްތައް މިހާރު އޮތް ލީޑަޝިޕްގެ ދަށުން ކުރިއަށްދާނަމަ، ޔޫރަޕްގެ ގައުމުތަކުން ބޮއިކޮޓްކުރުން ކުރިއަށްދިއުމުގެ ފުރުސަތު އެބައޮތް ކަމަށެެވެ.
ޔުއެފާގެ މި ބަޔާނަށް ފަހު، އެފްރިކާގެ ފުޓްބޯޅަ ފެޑެރޭޝަން ކާފް އާއި ދެކުނު އެމެރިކާގެ ފުޓްބޯޅަ ފެޑެރޭޝަން، ކޮންމެބޯލް އިން ވަނީ އިންފަންޓީނޯ އަށް ސަޕޯޓް އޮތްކަން އިއުލާނުކޮށްފަ އެވެ.
ފީފާގެ މެމްބަރު 54 ގައުމު ހިމެނޭ އެފްރިކާ އަކީ، 2016 ވަނަ އަހަރު އިންފަންޓީނޯ، ފީފާގެ ރައީސަަކަށް އެންމެ ފުރަތަމަ އިންތިހާބުވި ހިސާބުން ފެށިގެން އޭނާ އަށް އެންމެ ސަޕޯޓް ބޮޑު ބައްރެވެ.
ކާފްގެ ރައީސް، ޕެޓްރީސް މޮޓްސެޕޭ ވިދާޅުވީ، އެފްރިކާގެ ފުޓްބޯޅަ ކުރިއެރުވުމަށްޓަކައި، އިންފަންޓީނޯގެ ލީޑަޝިޕުން ގިނަގުނަ މަސައްކަތްތަކެއް ކުރައްވަމުން އަންނަ ކަމަށެވެ. އެ ގޮތުން، 2030 ވަނަ އަހަރުގެ ވޯލްޑް ކަޕް ޔޫރަޕާ ގުޅިގެން އެފްރިކާގައި ހޯސްޓްކުރަން ފީފާ އިން ދިން ފުރުސަތަކީ ވެސް އެފްރިކާ ފުޓްބޯޅަ އަށް ހާއްސަ އަހައްމިއްޔަތުކަމެއް ދޭ ކަމުގެ ހެއްކެއް ކަމަށް މޮޓްސެޕޭ ވިދާޅުވި އެވެ.
ދެން އޮތް ވޯލްޑް ކަޕް، 2030 ވަނަ އަހަރު އޮތީ ޕޯޗުގަލް، ސްޕެއިން އަދި މޮރޮކޯގަ އެވެ.
ރިޕޯޓްތައް ބުނާގޮތުގައި، އެ ވޯލްޑް ކަޕްގެ ފައިނަލް މެޗު މޮރޮކޯގައި ކުޅޭގޮތަށް ނިންމުމަށްޓަކައި، އޭގެ ބަދަަލަކަށް، އިންފަންޓީނޯ ވަނީ އޭނާ އަށް ދެން އޮތް ފީފާގެ އިންތިހާބުގައި ސަޕޯޓްކުރަން މޮރޮކޯ އަށް ހުށަހަޅައިފަ އެވެ. އެކަމަކު، ފީފާ އިން ވަނީ އެ ވާހަކަ ދޮގުކޮށްފަ އެވެ.
މި ފަހަރު އެމެރިކާ އާއި މެކްސިކޯ އަދި ކެނަޑާގައި ބޭއްވި ވޯލްޑް ކަޕްގެ ސިޓީތަކަށް ފީފާ އިން ދޭން އެއްބަސްވެފައިވާ ފައިސާ ހަމަޖައްސައި ނުދޭ މައްސަލަ އާއި މިދިޔަ އަހަރު އެމެރިކާގައި ހޯސްޓްކުރި ފީފާ ކްލަބް ވޯލްޑް ކަޕްގެ ޕޭމަންޓްތަކެއް ލަސްވެފައިވާ މައްސަލައިގައި ފީފާ އަށް ގިނަ ފާޑުކިޔުންތަކެއް އަންނަނީ އަމާޒުވަމުންނެެވެ.
