ކަސަބްލަންކާ، މޮރޮކޯ (އޮގަސްޓް 6) - ފީފާ ފޯވާޑް އެންޓަޕްރައިސް (އެފްއެފްއީ)ގެ ނަމުގައި، ޕްރައިވެޓް އިންވެސްޓަރުންނަށް ފީފާ ވޯލްޑް ކަޕް ހިމެނޭހެން، ފީފާ މުބާރާތްތަކުގެ، 21 ޕަސެންޓް ހިއްސާ ވިއްކާލަން އުޅުނު ޑީލުގެ ތެރެއިން ގޯސްތަކެއް ހެދިފައިވާތީވެ، ފީފާގެ ރައީސް، ޖިއާނީ އިންފަންޓީނޯ މައާފަށް އެދިއްޖެ އެވެ.
ތިން ވަނަ ދައުރަކަށް ފީފާގެ ރައީސްކަން ކުރައްވަމުން އަންނަ އިންފަންޓީނޯ އަށް މަގާމުގައި ދެމިހުރުމަށްޓަކައި ދަތިތަކެއް ވަނީ ކުރިމަތިވެފަ އެވެ. މަގާމުގައި ދެމިހުރުމަށްޓަކައި، އަދި، އަންނަ އަހަރު މާޗް މަހު ބާއްވާ ފީފާގެ އިންތިހާބު ކާމިޔާބުކުރުމުގެ މަސައްކަތުގެ ތެރެއިން، އިންފަންޓީނޯ ވަނީ ފީފާގެ ލީޑަޝިޕްގެ އެކި ފަރާތްތަކާ އެކު، މޮރޮކޯގައި އިއްޔެ ބައްދަލުވުމެއް ބާއްވައިފަ އެވެ.
އެމެރިކާގެ ރައީސް ޑޮނާލްޑް ޓްރަމްޕްގެ ހިއްސާ އޮތް ތުރައިވް އެޓާނަލް އަށް އެފްއެފްއީގެ ތެރެއިން، ވޯލްޑް ކަޕްގެ ހިއްސާ ހިމެނޭ މި ޑީލް ދިނުން ހުއްޓުވީ، ޔޫރަޕްގެ މައި ފުޓްބޯޅަ އިދާރާ، ޔުއެފާގެ އިސް ނެގުމާ އެކު، އެ އަށް، އުތުރު/ސެންޓްރަލް އެމެރިކާގެ ފުޓްބޯޅަ އިދާރާ ކޮންކަކަފް އަދި އޭޝިއާގެ ފުޓްބޯޅަ އިދާރާ، އޭއެފްސީން ބާރު އަޅައިގެންނެވެ.
ފީފާގެ ލީޑަޝިޕަށް ގިނަ ފާޑުކިޔުންތަކެއް އަމާޒުވެފައިވަނިކޮށް، މިދިޔަ އަންގާރަ ދުވަހު، ފީފާގެ ޖެނެރަލް ސެކްރެޓަރީ، މަޓިއަސް ގްރަފްސްޓްރަމް، ފީފާގެ އެކި ފަރާތްތަކަށް ފޮނުއްވި އިންޓާނަލް މެމޯއެއްގައި ބުނެފައިވަނީ، މި ފަހުން މި ހިނގައިދިޔަ ކަންތައްތަކުގެ ސަބަބުން ފުޓްބޯޅަ ދުނިޔޭގެ ކުރިމަތީގައި ފީފާގެ އިތުބާރު ގެއްލެމުންދާ ކަމަށެވެ.
އެއާ އެކު، އިއްޔެ، ފީފާގެ ސީނިއާ ވެރިންގެ ބައްދަލުވުމެއް މޮރޮކޯގައި ކުރިއަށްގެންގޮސް، ފީފާގެ މެމްބަރު 211 ގައުމަށް ވަނީ ސިޓިއެއް ފޮނުވައިފަ އެވެ. އެ ސިޓީގައި އިންފަންޓީނޯ ވަނީ، އެފްއެފްއީގެ ޑީލްގެ ކަންކަމުގައި ގޯސްތަކެއް ހެދިފައިވާ ކަމަށާއި އެކަމާ މައާފަށް އެދޭ ކަމަށް ވިދާޅުވެފަ އެވެ.
އެ ސިޓީގައި އިންފަންޓީނޯ ވިދާޅުވީ، އެފްއެފްއީގެ ކަންތައްތައް ކުރިއަށްގެންދިޔައިރު، އެސޯއިއޭޝަންތަކަށް ފުރިހަމަ މައުލޫމާތު ފޯރުކޮށްނުދެވުން އެއީ ހެދުނު ގޯހެއް ކަަމަށާއި އެ ފަދަ ކަމެއް ދެން ތަކުރާރުނުވާނެ ކަމަށެވެ.
ޔުއެފާ އިން މިހާރު އަންނަނީ އިންފަންޓީނޯ މަގާމުން ދުރުކުރުމަށްޓަކައި މަސައްކަތް ކުރަމުންނެވެ. އަދި، އެފްއެފްއީގެ ތަހުގީގެއް ކުރުމަށްޓަކައި ވެސް ޔުއެފާ އިން އިސްނަގާފައިވާއިރު، މި ހުރިހާ ކަމެއްގެ މައިގަނޑު ބޭނުމަކަށް އޮތީ، އަންނަ އަހަރުގެ މާޗް މަހުގައި އޮތް ފީފާގެ އިންތިހާބުގައި، އިންފަންޓީނޯ ނޫން ފަރާތަކަށް ފީފާގެ ރައީސްކަން ދިނުމަށެވެ.
އިންފަންޓީނޯ އަށް އޮތް ސަޕޯޓް ދެއްކުމަށްޓަކައި، އޭޝިއާގެ ގިނަ ގައުމުތަކުން އަންނަނީ، އެފްއެފްއީ ކުރިއަށް ނުގެންދަން، ފީފާ އިން ނިންމި ނިންމުމަށް މަރުހަބާ ކިޔައި، އިންފަންޓީނޯގެ ލީޑަޝިޕަށް ޝުކުރު އަދާކުރަމުންނެވެ. އަދި، މި ކަމުގައި، އެފްރިކާ އާއި ދެކުނު އެމެރިކާގެ ބައެއް ގައުމުތަކުން ވެސް އަންނަނީ ބައިވެރިވަމުންނެވެ.
ކުރިއަށް އޮތް ފީފާގެ އިންތިހާބުގަޔާއި، މިހާރު ވެސް ފާޅުގައި އިންފަންޓީނޯ އަށް ސަޕޯޓް ނުކުރާނެ ކަމަށް އިއުލާނުކުރި ގައުމުތަކަށް ބަލާއިރު، ވޭލްސް އާއި އިންގްލެންޑްގެ ފުޓްބޯޅަ އެސޯސިއޭޝަން ހިމެނެ އެވެ.
ފީފާ ވޯލްޑް ކަޕް، 2030 ވަނަ އަހަރު ބާއްވަނީ، ސްޕެއިން، މޮރޮކޯ އަދި ޕޯޗުގަލް ގުޅިގެންނެވެ. ރިޕޯޓްތައް ބުނާގޮތުގައި، އެ ވޯލްޑް ކަޕްގެ ފައިނަލް މެޗު މޮރޮކޯގައި ކުޅޭގޮތަށް ނިންމުމަށްޓަކައި، އޭގެ ބަދަަލަކަށް، އިންފަންޓީނޯ ވަނީ އޭނާ އަށް ދެން އޮތް ފީފާގެ އިންތިހާބުގައި ސަޕޯޓްކުރަން މޮރޮކޯ އަށް ހުށަހަޅައިފަ އެވެ. އެކަމަކު، ފީފާ އިން ވަނީ އެ ވާހަކަ ދޮގުކޮށްފަ އެވެ .
