ރައީސް މުހައްމަދު މުއިއްޒަށް، 2028 ވަނަ އަހަރު ބާއްވާ ރިޔާސީ އިންތިހާބު ކާމިޔާބުކޮށްދިނުން ފިޔަވައި މުހިންމު ކަމެއް ނެތް ކަމަށް ރައްޔިތުންގެ މަޖިލީހުގެ ރައީސް އަބްދުއްރަހީމް އަބްދުﷲ ރޭ ވިދާޅުވެއްޖެއެވެ.
އއ. އުކުޅަހުގައި ޕީއެންސީން ރޭ ބޭއްވި ޖަގަހަ ޖަލްސާގައި އަބްދުއްރަހީމް ވިދާޅުވީ ގައުމުގެ ސަލާމަތާއި ރައްކާތެރިކަމަށްޓަކައި މުއިއްޒަށް 2028 ވަނަ އަހަރު ބާއްވާ ރިޔާސީ އިންތިހާބު ކާމިޔާބުކޮށްދޭން ހުރިހާ އެންމެން މަސައްކަތް ކުރަންޖެހޭ ކަމަށެވެ.
"މިހާރު ކުރައްވަންވީ ކަމަކީ މިރެއިން ފެށިގެން ތިބޭފުޅުން ކަމަރު ބަންނަންވީ 2028 ގެ ރިޔާސީ އިންތިހާބު ބޮޑުތަނުން ރައީސް ޑރ. މުހައްމަދު މުއިއްޒަށް ކާމިޔާބުކޮށްދޭން. އެއަށްވުރެ މުހިންމު ކަމެއް ނެތް. މި ގައުމުގެ ސަލާމަތާއި ރައްކާތެރިކަމަށްޓަކައި އެއަށްވުރެ މުހިންމު ކަމެއް ނެތް،" އަބްދުއްރަހީމް ވިދާޅުވިއެވެ.
އަބްދުއްރަހީމް ވިދާޅުވީ މުއިއްޒު ފިޔަވައި ދެން ވެރިކަމަށް ކުރިމަތިލައްވަން ތިބީ ހުސް ފެއިލްވެފައި ތިބި ބޭފުޅުން ކަމަށާއި އެމްޑީޕީއަށް ދެފަހަރެއްގެ މަތިން ވެރިކަން ދިނުމުން މުޅި ގައުމު ހަލާކުކޮށްލި ކަމަށެވެ.
ކޮންމެ ރައްޔިތަކީވެސް އެ ރައްޔިތަކަށް ހިތްހަމަޖެހިގެން ރައްކާތެރިކަމާއެކީގައި ނިދާލެވޭނެ ކަމުގެ ޔަގީންކަން އޮތް ރައްޔިތަކަށް ހަދައިދޭންކަން ފާހަގަކުރައްވައި އަބްދުއްރަހީމް ވިދާޅުވީ އެ ފުދުންތެރި ދިރިއުޅުން ހޯދައިދޭން މުއިއްޒު މަސައްކަތް ކުރައްވާ ކަމަށެވެ.
މި ސަރުކާރުން ވެރިކަމާ ހަވާލުވެގެން ތިން މަސް ނުވަނީސް ބަނގުރޫޓުވާނެ ކަމަށް ބުނި ނަމަވެސް، މިއަދާ ހިސާބަށް އައިއިރު ހުރިހާ ކަމެއް ދަނީ ރަނގަޅަށް ކަމަށް އަބްދުއްރަހީމް ވިދާޅުވިއެވެ. އޭނާ ވިދާޅުވީ އެކަމަށްޓަކައި މުއިއްޒަށް ސެލިއުޓް ކުރަންޖެހޭ ކަމަށެވެ.
"ތިން އަހަރަށް ދިޔައިރު ބަނގުރޫޓެއް ނުވޭ. މުސާރަ ބަރާބަރަށް ދެވޭ. ކާޑުގެ ބާވަތްތައް ބަރާބަރަށް ލިބޭ. ތެޔޮ ބަރާބަރަށް ލިބޭ. އަސާސީ ހުރިހާ ހިދުމަތްތަކެއް ބަރާބަރަށް ލިބޭ. ތަރައްގީގެ މަޝްރޫއުތައް އެބަ ހިނގަމުންދޭ،" އަބްދުއްރަހީމް ވިދާޅުވިއެވެ.
"ދަރަނި އެބަ ދައްކާ. ލޯނެއް ނުނަގާ. ފައިސާއެއްޗެއް ޗާޕެއް ނުކުރޭ. އެހެންވީމާ ސެލިއުޓް ކުރަންޖެހެނީ ރައީސް ޑރ. މުހައްމަދު މުއިއްޒަށް. އެހެންވެގެން 2028 އަޅުގަނޑުމެން ޑރ. މުއިއްޒަށް ކާމިޔާބުކޮށްދޭން ޖެހެނީ."
އަބްދުއްރަހީމް މިހެން ވިދާޅުވި ނަމަވެސް އަސާސީ ގިނަ ހިދުމަތްތައް ރައްޔިތުންނަށް ނުދެވި، ތަރައްގީގެ ގިނަ މަޝްރޫއުތައް ހުއްޓި، މުވައްޒަފުންނަށް މުސާރަ ދިނުމުގައިވެސް ލަސްތަކެއް ދިމާވަމުންދާކަން ފާހަގަކުރެވެއެވެ.
މީގެއިތުރުން ޑޮލަރުގެ އަގު ނުއުފުލޭނެ ކަމަށް ސަރުކާރުން ބުނި ނަމަވެސް އިންތިހާއަށް އަގު ވަނީ އުފުލިފައެވެ. އެއާއެކު ތަކެތީގެ އަގު އިންތިހާއަށް ބޮޑުވުމުން އެކަމާ ރައްޔިތުން ދަނީ ކަންބޮޑުވުން ފާޅުކުރަމުންނެވެ.
