ރާއްޖޭގެ ކަޅު ބާޒާރުގައި ޑޮލަރުގެ އަގު ރެކޯޑު މިންވަރަކަށް އުފުލި، ފުރަތަމަ ފަހަރަށް ޑޮލަރެއްގެ އަގު 21.80ރ. އަށް އަރައިފި އެވެ.
މިދިޔަ ޖުލައި 29، 2026 އިން ފެށިގެން ކަޅު ބާޒާރުގައި ޑޮލަރުގެ އަގު 21.70ރ. ގައި ހުރުމަށްފަހު، 21.75ރ. އަށް އުފުލުނީ އިއްޔެ އެވެ. އެއަށް ފަހު 24 ގަޑިއިރު ނުވަނީ މިވަނީ 5 ލާރި ބޮޑުވެ، ޑޮލަރެއް 21.80ރ. އަރައިފަ އެވެ.
ރިސޯޓުތަކާއި ގެސްޓުހައުސްތަކުން ޑޮލަރު މާރުކުރަން މަޖުބޫރުކޮށް ރައީސް މުހައްމަދު މުއިއްޒު ސިޔާސަތެއް ތައާރަފު ކުރުމަށް ފަހު، ސަރުކާރުން ބުނެފައި ވަނީ ޑޮލަރުގެ އަގު ދެން މައްޗަށް ނާރާނެ ކަމަށެވެ.
ނަމަވެސް މިއީ ރާއްޖޭގެ ތާރީހުގައި ވެސް ޑޮލަރުގެ އަގު މިހާ މަތީގައި ރެކޯޑު ކުރެވުނު ފުރަތަމަ ފަހަރެވެ.
ކޮވިޑު-19 ގެ ބަލިމަޑިކަމުގައި ރާއްޖޭގެ ބޯޑަރުތައް ބަންދުކޮށްފައި އޮތް ދުވަސްވަރު، ޑޮލަރުގެ އަގު އެންމެ މައްޗަށް ދިޔައީ 19.50ރ. އަށެވެ. އެއީ ވެސް ކުޑަ ދުވަސްކޮޅަކަށެވެ.
މުއިއްޒު ވެރިކަމާ ހަވާލުވެވަޑައިގެންނެވިއިރު ކަޅު ބާޒާރުގައި ޑޮލަރުގެ އަގު ހުރީ 17.45ރ. އަށެވެ.
މަރުކަޒީ ބޭންކު, އެމްއެމްއޭ އިން ޑޮލަރު ވިއްކުމަށް ކަނޑައަޅާފައިވާ ރަސްމީ ރޭޓަކީ 15.42 ރުފިޔާއެވެ.
ކަޅު ބާޒާރުގެ މިހާރުގެ އަގަށް ބަލާއިރު މިއީ ރަސްމީ ރޭޓަށްވުރެ 6.38ރ. ބޮޑު އަދަދެކެވެ. މިއީ ޕަސެންޓުން ބަލާނަމަ ރަސްމީ ރޭޓަށްވުރެ 41.37 ޕަސެންޓުގެ އިތުރުވުމެކެވެ.
ރާއްޖެއަށް އެތެރެކުރާ މުދަލަށް ބޭނުންވާ ޑޮލަރު ރަސްމީ ބޭންކިން ނިޒާމުގެ ތެރެއިން ލިބުން ދަތިވުމާއި، ބޭރުގެ ދަރަނިތައް ދެއްކުމަށްޓަކައި ބޮޑެތި އަދަދުތަކުން ޑޮލަރު ބޭނުންވުމުގެ ސަބަބުން ކަޅު ބާޒާރުގައި ޑޮލަރަށް އޮތް ޑިމާންޑު ވަނީ އިންތިހާއަށް ބޮޑުވެގެން ގޮސްފަ އެވެ.
ޑޮލަރުގެ އަގު އުފުލުމުގެ ސަބަބުން ރާއްޖޭގެ ބާޒާރުގައި މުދަލާއި ހިދުމަތުގެ އަގުތައް ވެސް ދަނީ މަތިވަމުންނެވެ.
ޑޮލަރުގެ އަގަށް އައިސްފައިވާ ބަދަލު އަދަދު ނޫހުގެ ޑޮލަރު ޓްރެކަރ އިން ބަލާލެވޭނެ އެވެ.
