އަބަދާއި އަބަދު ކުރީ ސަރުކާރުގެ ވާހަކަދެއްކުމުގެ ބަދަލުގައި ގައުމުގައި ހުރި ބޮޑެތި މައްސަލަތައް ހައްލުކުރުމަށް މަސައްކަތް ކުރުން މާރަނގަޅުވާނެ ކަމަށް ރާއްޖޭގެ ފުރަތަމަ ޔޫތު އަދި އަންހެނުންގެ މިނިސްޓަރު، ރާޝިދާ ޔޫސުފް ވިދާޅުވެއްޖެ އެވެ.
ކުރީގެ ރައީސް މައުމޫންގެ ވެރިކަމުގެ ދުވަސްވަރު ވަޒީރުކަމުގެ އިތުރުން، ނޫ އަދި ފެހި ގާނޫނުއަސާސީ އެކުލަވައިލުމުގެ މަސައްކަތް ކުރި ހާއްސަ މަޖިލިސްތަކުގައި ވެސް މެންބަރުކަން ކުރެއްވި ރާޝިދާ ފޭސްބުކްގައި ކުރެއްވި ޕޯސްޓެއްގައި ވަނީ މިހާރު އަބަދާއި އަބަދު ކުރީ ސަރުކާރުގެ ވާހަކަދައްކާތީ އެކަމަށް ފާޑުވިދާޅުވެފަ އެވެ.
"މިހާރު މިއޮތީ މިދިޔަ ސަރުކާރެއް ނޫން، މިހާރު ިއީ އެމްޑީޕީ މެޖޯރިޓީ މަޖިލީހެއް ވެސް ނޫން. މިހާރު މިއީ ޕީއެންސީގެ މެންބަރަކު ގައުމުގެ ހުންގާނުގައި ހުންނެވި ދައުރެއް،" ރާޝިދާ ކުރެއްވި ޕޯސްޓުގައި ލިޔުއްވާފައި އެވެ.
"ވީމާ އަބަދު އެމްޑީޕީއޭ ކުރީ ސަރުކާރޭ ކިޔައި ވަގުތު ބޭކާރު ނުކޮށް ގައުމުގައި ހުރި ބޮޑެތި މައްސަލަތައް ހައްލު ކުރެވޭތޯ ބެލުން މާރަނގަޅުވާނެ."
ދެވަނަ ޓިކްޓޮކް ހަދައިގެންވެސް ފާޑުކިޔުންތަކުން ސައީދު ސަލާމަތެއް ނުވި
ތަކެތީގެ އަގުބޮޑުވުން ދިފާއުކުރައްވައި މިނިސްޓަރު ސައީދު އާންމުކުރެއްވި ވީޑިއޯތަކަށް އާންމުންގެ ބޮޑެތި ފާޑުކިޔުންތަކެއް ވަނީ އަމާޒުވެފައި. އާންމުން ބުނަމުންދަނީ ތަކެތީގެ އަގުބޮޑުކަން އިހުސާސްވަމުންދާ ކަމަށާއި، ކުރީ ސަރުކާރުގެ ބަހަނާ ނުދައްކައި މިހާރުގެ ދަތިތަކަށް ހައްލު ހޯދައިދޭން ޖެހޭ ކަމަށް.
ތައުލީމީ ދާއިރާގައި ވެސް ގިނަ ދުވަސްތަކެއްވަންދެން ހިދުމަތް ކުރެއްވި ރާޝިދާގެ އިތުރުން ބައެއް އެހެން މީހުން ވެސް ދަނީ އެ މައުލޫގައި ސަރުކާރަށް ފާޑުކިޔަމުންނެވެ.
އެގޮތުން ތަކެތީގެ އަގު ބޮޑުވާ މައްސަލައިގައި ހުރި ކަންބޮޑުވުންތައް ދޮގުކޮށް އިކޮނޮމިކް މިނިސްޓަރު، މުހައްމަދު ސައީދު އާންމުކުރެއްވި ވީޑިއޯތަކަށް ވެސް އާންމުން ވަނީ ހަމަ އެ މޭރުމުން ފާޑުކިޔައިފަ އެވެ.
