ދިމާވާ ބޭރުގެ އެކި ފަރާތްތަކުން އެމަނިކުފާނަށް ވަރަށް ތައުރީފު ކުރައްވާ ކަމަށް ރައީސް މުހައްމަދު މުއިއްޒު ރޭ ވިދާޅުވެއްޖެ އެވެ.
ވެރިކަން ކުރާ ޕީއެންސީން އއ. އުކުޅަހުގައި ބޭއްވި ޖަގަހަ ޖަލްސާއެއްގައި ވާހަކަ ދައްކަވަމުން މުއިއްޒު ވިދާޅުވީ، ސިޔާސީ ގޮތުން މަގުބޫލުނުވި ނަމަވެސް ގައުމަށް ފައިދާވާ ނިންމުން ނިންމަވާތީ ބިދޭސީން އެމަނިކުފާނަށް ތައުރީފު ކުރައްވާ ކަމަށެވެ.
"ވަރަށް ގިނަ ފަރާތްތަކުން ބޭރުގެ ފަރާތްތަކުން ވެސް އަޅުގަނޑާ ދިމާވެގެން ބުނޭ ތިގޮތުގައި މަސައްކަތްކުރާ ވެރިން ވަރަށް މަދޭ މުޅި ދުނިޔޭގައި ބަލާއިރުގައި ވެސް. ގައުމު އިސްކޮށް އެއީ ސިޔާސީ ގޮތުން ބަލައިފިއްޔާ އެހާ ޕޮޕިއުލާ ގޮތެއް ނޫން. އެހެންނަމަވެސް ގައުމަށް އެންމެ ރަނގަޅު ގޮތެއް މާނަވީ ގޮތެއްގައި ދެމެހެއްޓެނިވި ގޮތެއްގައި ގައުމަށް ވާނީ އޭގެއިން އަންނަން އޮތް އެތައް ޒަމާނަކަށް ފައިދާއޭ. އެކަހަލަ ކަންކަން އިސްކުރަނީ ވަރަށް މަދު ފަރާތްތަކެކޭ،" މުއިއްޒު ވިދާޅުވި އެވެ.
މުއިއްޒު ވިދާޅުވީ ގައުމަށް ފައިދާވާނެތީ ގިނަ ބަޔަކު ނުރުހުނަސް ބައެއް ނިންމުންތައް ނިންމާފައި ހުންނާނެ ކަމަށާއި އެއާއެކު ގައުމުގެ އިޖުތިމާއީ ފޭރާމާއި ގައުމުގެ އެހެން ހުރިހާ ކަމެއް ރަނގަޅު ކުރުމަށް މަސައްކަތްތަކެއް ކުރަމުންދާ ކަމަށެވެ.
ބޭރު މީހުން މުއިއްޒަށް ތައުރީފްކޮށް ވާހަކަދައްކަވާ ކަމަށް އެމަނިކުފާނު ވިދާޅުވިއިރު، އެމަނިކުފާނުގެ ބައެއް ނިންމުންތަކާ ގުޅިގެން ބޭރުގެ އެކި ޖަމިއްޔާތަކުން ކަންބޮޑުވުން ފާޅުކޮށް ކުށްވެރި ވެސް ކޮށްފައި އެބަހުއްޓެވެ. އޭގެއިތުރުން މޮރިޝަސް އާއި ރާއްޖެއާ އޮތް ގުޅުން ވެސް ކެނޑިފައިވަނީ އެމަނިކުފާނުގެ ނިންމުންތަކާ ގުޅިގެންނެވެ.
މުއިއްޒު އުކުޅަހަށް ވަޑައިގެންނެވީ ސްމޯލް އައިލެންޑް ޑިވެލޮޕިން ސްޓޭޓްސް ސުޕްރީމް އޮޑިޓް އިންސްޓިޓިއުޝަންސް ސިމްޕޯޒިއަމް ނިންމުމާއި، އިންޓޮސާއީ ޑިވެލޮޕްމެންޓް އިނީޝިއޭޓިވް ގްލޯބަލް ސަމިޓް ފެށުމުގެ ރަސްމިއްޔާތަށެވެ. ނަމަވެސް އެމަނިކުފާނު ވަނީ ތަރައްގީގެ ބައެއް މަޝްރޫއުތައް ފައްޓަވައިދެއްވާ ނިންމުން ފާހަގަކޮށް، ޕީއެންސީގެ ޖަލްސާގައި ވެސް ބައިވެރިވެވަޑައިގެންފަ އެވެ.
