ރާއްޖޭގައި އެކި ކަންކޮޅުތަކުގައި 11 މިސްކިތެއް އެޅުމުގެ ޕްރޮޖެކްޓު، ނަރުދަމާ އާއި ކަރަންޓުގެ ހިދުމަތް ދިނުމަށް އުފައްދާފައިވާ ފެނަކަ ކޯޕަރޭޝަންއާ ހަވާލުވީ ކީއްވެގެންތޯ ރައްޔިތުންގެ މަޖިލީހުގައި ސުވާލު ކުރުމުން އެއަށް ޖަވާބު ދެއްވަން އިސްލާމިކް މިނިސްޓަރު މުހައްމަދު ޝަހީމް އަލީ ސައީދު ދެކޮޅު ހައްދަވައިފި އެވެ.
މިސްކިތްތައް އަޅަން ފެނަކައާ ހަވާލު ކުރީ ކީއްވެތޯ ސުވާލު ކުރެއްވީ ކެންދޫ ދާއިރާގެ މެންބަރު މައުރޫފް ޒާކިރެވެ. ނަމަވެސް އެއީ މިއަދުގެ މައުލޫއާ ގުޅޭ ސުވާލެއް ނޫން ކަމަށް ވެސް މައުރޫފްގެ ސުވާލަށް ޖަވާބު ދެއްވަން ޝަހީމް ވަނީ ދެކޮޅު ހައްދަވައިފަ އެވެ.
"ތިޔަ ސުވާލަކީ ސީދާ ކުޑަރިކިލު، ރަށާ ގުޅުންހުރި ސުވާލަކަށްނުވާތީވެ އަޅުގަނޑު ދެކެނީ އެހެން މަގާމެއްގައި ތި ސުވާލަށް ޖަވާބު ދެވިގެންދާނެ ކަމަށް. ވަރަށް ބޮޑަށް ޝުކުރިއްޔާ،" ޝަހީމް ވިދާޅުވި އެވެ.
އެ ސުވާލު ކުރައްވަމުން މައުރޫފް ވިދާޅުވީ، ފެނަކައަކީ ނަރުދަމާ އަޅަން ވެސް ކަމުނުދާ ކުންފުންޏެއް ކަމަށް ކޮންސްޓްރަކްޝަން މިނިސްޓަރު އަބްދުﷲ މުއްތަލިބު އިއްޔެ މަޖިލީހުގައި ވިދާޅުވެފައިވާ ކަމަށާއި އެފަދަ ކުންފުންޏަކަށް މިސްކިތް އެޅުމުގެ ތަޖުރިބާ ލިބިފައިވޭތޯ އެވެ.
"އިއްޔެގަ ހައުސިން މިނިސްޓަރު ވިދާޅުވި، ފެނަކައަކީ ފެނާއި ނަރުދަމާ ގާއިމް ކުރުމަށް އޮތް ކުންފުންޏެއް އެހެން ނަމަވެސް ނަރުދަމާ އެޅުމުގެ ގާބިލްކަން ނެތް ކުންފުންޏެއް ކަމަށް. ފެނަކައިގެ، މިސްކިތްތައް ގާއިމްކުރުމުގެ ކިހާ ވަރެއްގެ ތަޖުރިބާއެއް އެބަ ހުރިތޯ އަދި ފެނަކައަށް މި މިސްކިތްތައް އެޅުމަށް ބޭނުންވާ ފައިސާ ވަނީ ހަވާލުކުރެވިފައިތޯ ނުވަތަ އޭގެ އެޑްވާންސް ވަނީ ޖަމާކުރެވިފައިތޯ؟ މި މިސްކިތްތައް އެޅުމަށް ބޭނުންވާ ފައިސާ ނުވަތަ ބަޖެޓު ހަމަޖެހިފައިވޭތޯ؟،" މައުރޫފް ވިދާޅުވި އެވެ.
އިއްޔެ މަޖިލީހުގައި ވާހަކަ ދައްކަވަމުން މިނިސްޓަރު މުއްތަލިބު ވިދާޅުވީ، ށ. ނަރުދޫގެ ނަރުދަމާ ގާއިމް ކުރުމުގެ މަސައްކަތް ކުރިއަށްނުގެންދެވުނީ އެ މަސައްކަތް ކުރުމުގެ ގާބިލްކަން ފެނަކައިގައި ނެތުމުން ކަމަށެވެ.
"ފެނަކައަކީ ކުރިން ވެސް ދެންނެވި ގޮތަށް މި މަސައްކަތް ކުރުމުގައި އެ ގާބިލްކަން އެކަށީގެންވާ މިންވަރަކަށް ނެތް ކުންފުންޏަކަށްވާތީ ފެނަކައިން [ނަރުދޫގެ ނަރުދަމާގެ] މަސައްކަތް ނުކުރެވިފައި އޮތީ،" މުއްތަލިބު ވިދާޅުވި އެވެ.
މިސްކިތް އެޅުމުގެ ޕްރޮޖެކްޓުތައް ފެނަކައާ ހަވާލު ކުރީ މާޗް، 2025، ގަ އެވެ. އެ ކުންފުންޏާ ހަވާލު ކުރީ 500 މީހުންގެ ޖާގައިގެ މިސްކިތްތަކެއް އަޅާށެވެ. މިސްކިތް އަޅަނީ ހއ. ބާރަށް، ހދ. ނެއްލައިދޫ، ށ. ނޫމަރާ، ނ. ހެނބަދޫ، ރ. އިނގުރައިދޫ، ބ. މާޅޮސް، އެ އަތޮޅު ކުޑަރިކިލު، އއ. ފެރިދޫ، ތ. ވޭމަންޑޫ އާއި ހިރިލަންދޫ އަދި ސ. ފޭދޫ ގަ އެވެ.
