އައްޑޫ ސިޓީގެ ކަރަންޓު މަޝްރޫއަށް ބޭނުންވާ ޖެނެރޭޓަރުތައް ރާއްޖެއިން ބޭރުގައި އުފައްދަމުންދާ ކަމަށް ފެނަކަ ކޯޕަރޭޝަންގެ މެނޭޖިން ޑިރެކްޓަރު މުހައްމަދު އަފީފް ހުސައިން މިއަދު ވިދާޅުވެއްޖެ އެވެ.
އައްޑޫ ކަރަންޓު މަޝްރޫއާ ގުޅޭގޮތުން އަފީފް އަދަދު އަށް ވިދާޅުވީ މަޝްރޫ ހިންގާ ސައިޓު ސާވޭކޮށް، ސައިޓުގައި މަސައްކަތް ފެށުމަށް ތައްޔާރުވަމުންދާ ކަމަށެވެ. އޭގެއިތުރުން ޓެކްނިކަލް ކޮމިޓީތަކުގައި އެކި މަޝްވަރާތައްވެސް ކުރިއަށްދާ ކަމަށް އޭނާ ވިދާޅުވި އެވެ.
"ޕްރޮޖެކްޓުގައި ރާއްޖެއިން ބޭރުގައި ޖެނެރޭޓަރުތައް އުފެއްދުމުގެ މަސައްކަތް ކުރިއަށްދަނީ. ޕްރޮޖެކްޓް ކުރިއަށް އެބަދޭ އެނގޭތޯ. ދެން މިހާރު އައްޑޫ ސަރަހައްދުގައި ސައިޓް ސާވޭ ކުރުމާއި، ސައިޓު މަސައްކަތްތައް ފެށުމަށްޓަކައި ތައްޔާރުވަމުންދަނީ އެނގޭތޯ. ދެން އަޅުގަނޑުމެން ޓެކްނިކަލް ކޮމިޓީތަކުގައި މަޝްވަރާތައް އޮންލައިންކޮށް ރާއްޖެއިން ބޭރުގެ ފަރާތްތަކާވެސް ގުޅިގެން ހިންގަމުންދަނީ،" އޭނާ ވިދާޅުވި އެވެ.
ކައުންސިލް އިންތިހާބަށް ޕީއެންސީން މިދިޔަ މާޗު މަހު ކުރިއަށްގެންދިޔަ "ގްރޭޓާ އައްޑޫ" ކެމްޕޭނުގައި ރައީސް މުހައްމަދު މުއިއްޒު ވިދާޅުވީ ފެނަކައިން ކުރިއަށްގެންދާ މަޝްރޫއުއަކީ ކުރިއަށް އޮތް 20 އަހަރަށް އައްޑޫ ސިޓީގެ ކަރަންޓުގެ މައްސަލަ ހައްލުވާނެ މަޝްރޫއެއް ކަމަށާއި އެ މަޝްރޫއު އަންނަ އަހަރުގެ ޖުލައި މަހަށް ނިންމާލެވޭނެ ކަމަށެވެ.
"26 މެގަވޮޓުގެ ކަރަންޓު ފޯރުކޮށްދޭނެ ނިޒާމު އިރާދުކުރެއްވިއްޔާ މި އެއްބަސްވުމުގެ ދަށުން ގާއިމު ކުރެވިގެންދާނެ. މި އަންނަ އަހަރުގެ ޖުލައި މަހާ ހަމައަށް ދާއިރު މުޅިން އެކުގައި މި މަޝްރޫއު ނިމި ކުރިއަށް އޮތް 20 އަހަރަށް އައްޑޫ ސިޓީގެ ކަރަންޓުގެ މައްސަލަ ހައްލުވެގެންދާނެ،" މުއިއްޒު ވިދާޅުވި އެވެ.
ސިޓީބިޓީ: އިންތިހާބީ ކަޑައަކުން އައްޑުއަށް ކަރަންޓެއް ނުލިބޭނެ
ނަމަވެސް އަފީފް ވިދާޅުވީ މަޝްރޫއުގެ މަސައްކަތް ނިންމާލެވޭނެ ކަމަށް ލަފާކުރެވެނީ 2028 ވަނަ އަހަރުގެ މެދުތެރޭގައި ކަމަށެވެ. މަޝްރޫއު ނިންމަން މުއިއްޒު ދެއްވި ތާރީހު ލަސްވި ސަބަބެއް އޭނާ ހާމައެއް ނުކުރައްވަ އެވެ.
އައްޑޫއަށް ދިމާވެފައިވާ ކަރަންޓުގެ މައްސަލަ ހައްލުކުރުމަށް ބަޔަކާ ހަވާލުކުރި ކަމަށް ދައްކަން ބޭއްވި އިވެންޓަކީވެސް ސްކޭމެއް ކަމަށް އައްޑޫ ސިޓީގެ މޭޔަރު އަލީ ނިޒާރު މިދިޔަ އޮގަސްޓް މަހު ވިދާޅުވި އެވެ. މޭޔަރު ވިދާޅުވީ ސްކޭމެއް ކަމަށް ސިފަކުރައްވަނީ ރައްޔިތުން އޮޅުވާލުމަށް ރާވައިގެން ކަންކަން ކުރާތީ ކަމަށެވެ.
"އެވެސް ސްކޭމެއް [ކަރަންޓް މަޝްރޫއު]. ސްކޭމެކޭ މިދަންނަވަނީ ސްކޭމްތައް ރާވާ މީހުން ކަންކަން ކުރާ ގޮތަށް އެކުރަނީ. ރައްޔިތުންނަށް އޮޅުވާލައި ޕްރޮޖެކްޓްތައް ހަވާލުކުރުމަކީ އެއީ އަޅުގަނޑުމެން ދައްކާ ވާހަކައަކީ. މިއީ ބޮޑެތި ސްކޭމްތަކެއް މިއުޅެނީ. ބަޔަކު ގެންގޮސްގެން ބޮޑު ފަންކްޝަނެއް ބާއްވާފައި. ޖެނެރޭޓަރުތަކުގެ ފޮޓޯ ދައްކައި،" ނިޒާރު ވިދާޅުވި އެވެ.
އައްޑޫ ޕަވާ ސްޓޭޝަން ހަވާލުކުރި ކުންފުނީގެ އެއްވެސް މައުލޫމާތެއް ނެތް!
އަދަދު ނޫހުން މި ކުންފުންޏާ ބެހޭ މައުލޫމާތު ހޯދުމުގެ މަސައްކަތް ފެށީ 31 މިލިއަން ޑޮލަރުގެ އަގުބޮޑު ޕްރޮޖެކްޓެއް މި ކުންފުންޏާ ހަވާލުކުރުމުން، އެއީ އެ ވަރުގެ މަސައްކަތެއް ކުރެވޭ ވަރުގެ ގާބިލު ކުންފުންޏެއްތޯ ވަޒަން ކުރުމުގެ ގޮތުން
ކަރަންޓުގެ މައްސަލަ ހައްލުކުރަން ހަވާލުކުރި މަޝްރޫއުގައި ސޮއިކުރުމަށްފަހު އެ ކުންފުނީގެ ހަބަރެއްވެސް ނުވާ ކަމަށާއި އައްޑޫގައި ތަރައްގީގެ އެއްވެސް މަޝްރޫއެއް މިވަގުތު ކުރިއަށް ނުދާ ކަމަށް ނިޒާރު ކުރިން ވިދާޅުވި އެވެ.
އައްޑޫގެ ގުޅިފައިވާ ރަށްތަކަށް ދިމާވެފައިވާ ކަރަންޓު މައްސަލަ ހައްލުކުރަން އެ ސިޓީ ހިތަދޫގައި ގާއިމުކުރާ ސެންޓްރަލް ޕަވާ ސްޓޭޝަން ޕްރޮޖެކްޓު 31 މިލިއަން ޑޮލަރަށް ހަވާލުކުރި ޑެފިނިޓް ސޮލިއުޝަންސްއަކީ ވެބްސައިޓެއްހާ ހިސާބު ވެސް ނެތް ކުންފުންޏެކެވެ.
އައްޑޫ ސިޓީއަށް ދިމާވެފައިވާ ކަރަންޓު މައްސަލަ ހައްލުކުރަން ކުރާ މަސައްކަތުގެ ތެރެއިން ފެނަކަ ކޯޕަރޭޝަނުން އެ ސިޓީއަށް މިދިޔަ އަހަރުގެ އޮކްޓޯބަރު މަހު ތިން ޖެނެރޭޓަރު ގެންދިޔަ އެވެ. ނަމަވެސް މިހާތަނަށްވެސް އެ ސިޓީއަށް ދިމާވެފައިވާ ކަރަންޓު މައްސަލަ ހައްލު ނުވާއިރު، ކޮންމެ ހަފްތާއަކުވެސް އެކި ފަހަރު މަތިން އައްޑޫގެ ގުޅިފައިވާ އެކި ރަށްތަކުން ކަރަންޓު ކެނޑެ އެވެ.
