ޓޫރިޒަމް ސިނާއަތުގައި ހަރަކާތްތެރިވާ ޕަބްލިކް ކުންފުނި، މޯލްޑިވްސް ޓޫރިޒަމް ޑިވެލޮޕްމަންޓް ކޯޕަރޭޝަން (އެމްޓީޑީސީ) ގެ އަހަރީ އާންމު ޖަލްސާ މި މަހުގެ 31 ވަނަ ދުވަހު ބާއްވަން ތާވަލުކޮށްފި އެވެ.
އެމްޓީޑީސީން ނެރުނު އިއުލާނެއްގައި ވަނީ، މި ޖަލްސާ އޮންނަނީ 31 ވަނަ ދުވަހުގެ ރޭގަނޑު 8:30 ގައި ހޮޓެލް ޖެންގެ ބޯލްރޫމްގައި ކަމަށެވެ. މި ޖަލްސާގައި އެ ކުންފުނީގެ ހިއްސާދާރުންނާއި ޕްރޮކްސީ ހޯލްޑަރުންނަށް ހާޒިރުވެގެންނާއި، މޯލްޑިވްސް ސެކިއުރިޓީސް ޑިޕޮސިޓަރީގެ "ފަހިވޯޓު" ބޭނުންކޮށްގެން އޮންލައިިންކޮށް ބައިވެރިވެވެ އެވެ.
އެމްޓީޑީސީގެ އަހަރީ އާންމު ޖަލްސާ ބާއްވަން އުޅޭއިރު، އެ ކުންފުންޏަށް ކުއްޔަށް ދޫކޮށްފައިވާ ގދ. މަގުއްދުވާގެ ހެޑް ލީސް ތުރުކީގެ އަހުމެތު އައިޑެނިޒް ކުންފުންޏަކަށް ވިއްކާލަން އުޅޭ މައްސަލަ އޮތީ ވަރަށް ހޫނުވެފަ އެވެ.
އަހުމަތު އައިޑެނިޒްއަކީ އެމްޓީޑީސީ އަތުން މަގުއްދުވާ ސަބްލީސްކުރުމަށް ފަހު، އެ ރަށް ތަރައްގީކުޮށްގެން އަޔާޑާ މޯލްޑިވްސްގެ ނަމުގައި ރިސޯޓު ހިންގަމުން އަންނަ ކުންފުންޏެވެ. މި ކުންފުންޏާއި އެމްޓީސިއާ ދެމެދު ސޮއިކޮށްފައިވާ އެއްބަސްވުމުގެ ދަށުން ކޮންމެ ކުއާޓަރެއްގައި ކުލީގެ ގޮތުގައި އެމްޓީޑީސީއަށް އެތައް މިލިއަން ޑޮލަރެއް ދައްކަން ޖެހެ އެވެ.
މަގުއްދުވާގެ ހެޑް ލީސް ހޯލްޑަރަކީ އެމްޓީޑީސީ އެވެ. ލީސްގެ މުއްދަތު ހަމަވާނީ 2031 އަށެވެ. މީގެ ކުރިން ލީސް ދޫކޮށްލަައިފި ނަމަ އެމްޓީޑީސީއަށް 20 މިިލިއަން ޑޮލަރުގެ އާމްދަނީއެއް ގެއްލިގެން ދާނެ އެވެ.
އަޔާޑާ ނުއަގުގައި ވިއްކާލުމުގެ ޑީލަށް މަގުފަހި ކުރަން އެމްޓީޑީސީގެ އިތުރު ހިއްސާ ވިއްކަނީ
ސަރުކާރުގެ އަތުގައި އޮންނަނީ އެމްޓީޑީސީގެ 47 ޕަސެންޓު ހިއްސާ އެވެ. ބާކީ 53 ޕަސެންޓު ހިއްސާއަކީ އާންމުންނަށް ވިއްކާފައިވާ ހިއްސާ އެވެ. ރައިޓްސް އިޝޫއަކަށް ގޮސް އިތުރު ހިއްސާ ވިއްކުމުން ސަރުކާރަށް މެޖޯރިޓީ ހިއްސާ ގަތުމުގެ ފުރުސަތެއް އޮވެދާނެ އެވެ. އިތުރު ކުރާ ހިއްސާ މިހާރުގެ ހިއްސާދާރުން ނުގަނެފި ނަމަ އެ ފުރުސަތު ދެން ލިބޭނީ ސަރުކާރަށެވެ.
މި މައްސަލަ ފެންމަތިވީ ފަހުން އެމްޓީޑީސީން ވަނީ މަގުއްދުވާ ހިމެނޭހެން އެ ކުންފުނީގެ އެއްވެސް އެސެޓެއް ވިއްކާލަން މަސައްކަތް ނުކުރާ ކަމަށް ބުނެފަ އެވެ. އަދި އެ ކަހަލަ މުއާމަލާތެއް ވެސް ނުކުރެވޭ ކަމަށް އޭރު ބުންޏެވެ.
މިހެން ބުނުމަށް އެމްޓީޑީސީން ވަނީ އެ ކުންފުނީގެ ހިއްސާދާރުންނަށް އިތުރު ހިއްސާ ވިއްކާ ގޮތަށް ރައިޓްސް އިޝޫއަކަށް ދާން ހުށަހަޅަން ނިންމާފަ އެވެ. މި ކަން މި މަހު ފަހުކޮޅު އޮންނަ އޭޖީއެމްގައި ހިއްސާދާރުންނަށް ހުށަހަޅަން އެ ކުންފުނީގެ ބޯޑުން ވަނީ ފާސްކޮށްފަ އެވެ.
މި ކަމުގެ މައުލޫމާތު އެނގޭ މީހުން އަދަދު ނޫހަށް މައުލޫމާތު ދިން ގޮތުގައި އިތުރު ހިއްސާ ވިއްކުމުގެ މަސައްކަތް ކުރަމުން ދަނީ، އަޔާޑާ ނުއަގުގައި ވިއްކާލުމުގެ ޑީލަށް ފަހިކުރަން، އެ ކުންފުނީގެ މެޖޯރިޓީ ސަރުކާރަށް ނެގުމުގެ ގޮތުންނެވެ.
އެމްޓީޑީސީއަށް މި ވަގުތު އާމްދަނީ ލިބޭ ޕްރޮޕަޓީތަކުގެ ތެރޭގައި ހިމެނެނީ މަގުއްދުވާގެ އިތުރުން އަނަންތާރާ ކިހަވައް ވިލާސް ހިނގާ ބ. ކިހަވައް ހުރަވަޅި އެވެ. އެ ކުންފުނިން މި ވަގުތު ހިންގަމުން އަންނަ ޕްރޮޖެކްޓުތަކުގެ ތެރޭގައި ބީއެމްއެލްއިން ލޯނެއް ނަގައިގެން ތަރައްގީކުރަމުން އަންނަ ހދ. ނާގޮއްޓާއި، ހުޅުމާލޭގައި ތަރަައްގީކުރަމުން އަންނަ އޮފީސް އިމާރާތް ހިމެނެ އެވެ.
