ރާއްޖޭގެ އެއްވެސް ގައުމީ ޓީމެއްގަައި ހިމެނޭ އެތުލީޓުންނަކީ ދުންފަތުގެ އިސްތިއުމާލު ކުރުމާ ދުރު އެތުލީޓުންނަށް ހެދުމުގެ އަމާޒަކާ އެކު ސަރުކާރުން ނިންމުމެއް ނިންމުމަކީ ރަނގަޅު މަގުސަދަކާ އެކު ކުރަން ޓާގެޓް ކަނޑައެޅި ކަމެއް ކަމަށް ރައީސް، ޑރ. މުހައްމަދު މުއިއްޒު ވިދާޅުވެއްޖެ އެވެ.
މި މަހުގެ 18 ވަނަ ދުވަހުގެ ކެބިނެޓް ބައްދަލުވުމުގައި، ދުންފަތާއި ނިކޮޓިންގެ ނުރައްކަލާ ގުޅުންހުރި މުހިންމު ނިންމުންތަކާއި، ސަރުކާރުން ކުރިއަށްގެންދާ އެހެނިހެން މަޝްރޫޢުތަކާ ގުޅޭ މުހިންމު ނިންމުންތަކަކާ ގުޅޭގޮތުން މަޝްވަރާކުރި އެވެ. އެ ބައްދަލުވުމުގައި، އެއްވެސް ގައުމީ ޓީމެއްގައި ބައިވެރިވެވޭނީ، ދުންފަތުގެ އިސްތިއުމާލުކުރުމާ އެއްކޮށް ދުރުވެފައި ތިބި އެތުލީޓުންނަށް ހެދުމުގެ ޓާގެޓު ހާސިލުކުރުމަށްޓަކައި، އެތުލީޓުންނަކީ ދުންފަތުގެ އިސްތިޢުމާލުކުރުމާ ދުރުވެފައި ތިބި ބަޔަކަށް ހެދުމަށް ހާއްސަ އަމާޒުތަކެއް ކަނޑައަޅައި މަސައްކަތްކުރަން ނިންމި އެވެ.
ސަރުކާރުގެ މި އަމާޒާ ބެހޭގޮތުން، ރައީސް، މުއިއްޒުއާ، ދައުލަތުގެ މީޑިއާ ޕީއެސްއެމްގެ "ނޭޝަން ޗެޓް"ގައި ވަނީ ސުވާލު އަމާޒުކޮށްފަ އެވެ.
"އެއީ (ދުންފަތާ ދުރު ގައުމީ އެތުލީޓުން ތިބުން) އެންޑް ރިޒަލްޓަކީ އިނގޭތޯ. އެ ހާލަތު ހާސިލްކުރަންށޭ ބޭނުންވަނީ، މިއަދަކު އަޅުގަނޑުމެންނަށް ކުއްލިއަކަށް މި މަނާ ނުކޮށްލެވޭނެތާ، އެހެންވީމަ، އަޅުގަނޑުމެން ބޭނުންވަނީ އެ ނަތީޖާ ހާސިލްކުރަން. ދުންފަތު އިސްތިއުމާލުކުރުމުން އެއްކޮށް ދުރުވެފައި ތިބި އެތުލީޓުންތަކެއް އަޅުގަަނޑުމެންގެ ހުރިހާ ގައުމީ ޓިމުތަކެއްގައި ތިބުން. އެ ޓާގެޓަށް ދަންޏާ، ކުރަންޏާ ދެން ކުރަންޖެހޭ މަސައްކަތްތަކެއް ނޫންތޯ ހުންނާނީ،" ރައީސް މުއިއްޒު ވިދާޅުވި އެވެ.
"އެހެންވީމަ، ސްޕޯޓްސް މިނިސްޓްރީއާ ދެން ހުރިހާ ޖަމިއްޔާ ޖަމާއަތްތަކާ ގުޅިގެން ކުރެވޭ މަސައްކަތްތަކުން ހިތްވަރުދީގެން، އިންސެޓިވައިޒްކޮށްގެން ނޫނިއްޔާ، ގޮތްގޮތް މަގުފަހިކޮށްދީގެން އަޅުގަނޑުމެން ބަލަންޖެހޭނީ އެތުލީޓުން ދުންފަތުގެ އިސްތިއުމާލުކުރުމާ ދުރުކުރުމަށް. އެ އެތުލީޓުންގެ ސިއްހަތަށް ވެސް، އެ ކުދިންގެ ޕާފޯމަންސް ވެސް ރަނގަޅުވާނެ އޭރުން އެހެންވީމަ، އެ މަގުސަދު ހާސިލްކުރުމަށްޓަކައި އެ ޓާގެޓް ކަނޑައެޅީ. އިރާދަކުރެއްވިއްޔާ އޭގެ ނަތީޖާ ހާސިލްވެގެންދާނެ،"
ރާއްޖޭގެ އެކި ކުޅިވަރުތަކުގެ ގައުމީ ޓީމުތަކުގައި ހާއްސަކޮށް ފިރިހެން ޓީމުތަކުގައި ނިސްބަތުން ދުންފަތުގެ އިސްތިއުމާލުކުރާ ކުޅުންތެރިން ގިނަ އެވެ.
މިދިޔަ ޖޫން މަހު ރައީސް އޮފީހުގައި ބޭއްވި ނޫސްވެރިންގެ ބައްދަލުވުމުގެ ތެެރެއިން، ރައީސް، ޑރ. މުހައްމަދު މުއިއްޒު ވަނީ، ކުޅިވަރު ކުޅުމަށް ހަދާފައި ހުންނަ ސަރުކާރުގެ ކުޅިވަރު އިމާރާތްތަކާއި ތަންތަނުގައި ނަމާދު ވަގުތަށް ކުޅިވަރުތައް މެދުކަނޑާލަން ޖެހޭ ގޮތް ހެދުމުގެ މަސައްކަތް ކުރަމުން އަންނަ ކަމަށް ވިދާޅުވެފަ އެވެ.
އެކަން ތަންފީޒުކުރަން ގެންގުޅުއްވާ ހިޔާލުތަކެއްގެ ގޮތުގައި، ރައީސް މުއިއްޒު ވިދާޅުވީ، ކުޅިވަރު ކުޅޭ ތަންތަނުގައި ކުޅިވަރު ކުޅެން ހުންނަ ވަގުތުގެ ތެރޭގައި ނަމާދު ގަނޑި ގެެއްލުނަނުދިނުމަށްޓަކައި ގޮސް ނަމާދުކުރެވޭ ގޮތަށް ހަމަޖެއްސުމާއި ނަމާދަށް މިސްކިތްތަކުން ބަންގި ގޮވާ ގަޑިން ފެށިގެން ކަނޑައެޅޭ ވަކި ވަގުތުކޮޅެއް ވަންދެން، ގާތްގަނޑަކަށް 20 މިނިޓަށް ނަމަވެސް، ހުރިހާ ކުޅިވަރުތަކެއް މެދުކަނޑާލަންޖެހޭ ގޮތަށް ހެދުމެވެ.
އެކަމަކު، އޭގެ ފަހުން މި ވީ މުއްދަތުގެ ތެރޭގައި، ނަމާދު ވަގުތުތަކުގައި ވެސް ކުޅިވަރު ކުޅޭ ތަންތަނުގައި، އެ ހަރަކާތްތައް މެދުކަނޑާލުމެއް ނެތި ވަނީ ކުރިއަށް ގެންގޮސްފަ އެވެ.
