ޑޮލަރު ތާށިކަމުގެ މައްސަލައިގައި ސަރުކާރުން އާންމުންނާއި ވިޔަފާރިތަކަށް ތުހުމަތުގެ އިނގިލި ދިއްކުރަމުންދާއިރު، ޑޮލަރު ކާރިސާ ލައިގަތީ ސަރުކާރަށް ލިބުނު ބައިވަރު ޑޮލަރުތައް އިސްރާފުކުރުމުން ކަމަށް ކުރީގެ ފިނޭންސް މިނިސްޓަރު އިބްރާހިމް އަމީރު މިއަދު ވިދާޅުވެއްޖެ އެވެ.
އެމްޑީޕީގެ މެކްރޯއިކޮނޮމިކް ކޮމިޓީން ބޭއްވި ނޫސްވެރިންގެ ބައްދަލުވުމެއްގައި، އަމީރު ވަނީ ޑޮލަރު މައްސަލައިގައި ސަރުކާރާއި މަރުކަޒީ ބޭންކު، މޯލްޑިވްސް މަނިޓަރީ އޮތޯރިޓީ (އެމްއެމްއޭ) އަށް ވަރަށް ބޮޑަށް ފާޑުވިދާޅުވެފަ އެވެ.
އެ ގޮތުން އަމީރު ވަނީ މި ހާލަތަށް ކަންކަން ދިޔަ ސަބަބުތައް ކަމަށް ބުނެ ރުފިޔާގެ ސަޕްލައި ކޮންޓްރޯލް ކުރަން ނުކުޅެދުމާއި، ފައިސާ ޗާޕުކުރުމާއި، ބަޖެޓަށް ބޭރުން ފައިނޭންސިން ނުހޯދުމުގެ އިތުރުން ސަރުކާރުގެ ދެކޮޅު ނުޖެހޭ ސިޔާސަތުތައް ފާހަގަކުރައްވާފަ އެވެ.
ރުފިޔާގެ ސަޕްލައިގެ މައްސަލައިގައި އަމީރު ވިދާޅުވީ، މި ހިސާބަަށް ކަންކަން ދިޔައީ ސަރުކާރުން ބޭނުންވާހާ ގޮތަކަށް އެމްއެމްއޭގެ ގަވަރުނަރު ކަންކަން ކުރަމުން ގެންދާތީ ކަމަށެވެ. މީގެ ހެއްކަކީ، އަމީރު ވިދާޅުވި، ކޮންޓްރެކްޓަޝަނަރީ މަނިޓަރީ ޕޮލިސީއެއް ހިންގަން ޖެހޭ ކަމަށް ބުނުމަށް ފަހު އޭ ދިމާ އިދިކޮޅަށް މަނިޓަރީ ސިޔާސަތުތައް ހިންގަމުން ދިޔުމެވެ.
މި ސަރުކާރުން ފައިސާ ޗާޕުކުރި ކަމަށް އަމީރާއި އެމްޑީޕީން ތުހުމަތުކުރަނީ އެމްއެމްއޭއިން ބޭންކުތަކާއި ޕެންޝަން އޮފީސް މެދުވެރިކޮށް، ސަރުކާރުގެ ސެކިއުރިޓީސްތަކަށް އިންވެސްޓުކުރުވާފައި ވާތީ އެވެ. އަމީރު ވިދާޅުވީ މި ގޮތަށް ބޭންކުތައް މެދުވެރިކޮށް، 3.7 ބިލިއަން ރުފިޔާ އަދި ޕެންޝަން އޮފީސް މެދުވެރިކޮށް 2.4 ބިލިއަން ރުފިޔާ ހިމަނައިގެން 6.1 ބިލިއަން ރުފިޔާ ޗާޕުކޮށްފައިވާ ކަމަށެވެ.
"ސަރުކާރުން ބޭރުން ފައިސާ ހޯދާނެ ކަމަށް ބަޖެޓުގައި ހިމަނާފައި ވިޔަސް، އެ ފައިސާ ނުހޯދި، ސަރުކާރުން އެތެރޭގެ މާކެޓުން ފައިސާ ޗާޕުކޮށްގެން ކުރިއަށްދާތަން،" އޭނާ ވިދާޅުވި އެވެ.
ފައިސާ ޗާޕުކުރުމުގެ ވާހަކައިގެ ތެރެއިން އަމީރު ވަނީ، އެމްޑީޕީ ސަރުކާރުގައި އަށް ބިލިއަން ރުފިޔާ ޗާޕުކުރިއިރުގެ ހާލަތާއި، މިހާރާ އަޅައިނުކިޔޭނެ ކަމަށް ވިދާޅުވެފަ އެވެ. މި ސަރުކާރުން ބުނާ ގޮތުގައި ޑޮލަރުގެ ރޭޓު މިހާ ބޮޑަށް އުފުލުނު މައްސަލައިގައި މުލުގައި އޮތީ އެމްޑީޕީ ސަރުކާރުގައި ޗާޕުކުރި ފައިސާތަކެވެ.
އެހެން ނަމަވެސް، އަމީރު ވިދާޅުވީ އޭރުގެ ހާލަތާއި މިހާރުގެ ހާލަތާ އަޅާނުކިޔޭނެ ކަމަށެވެ. އަދި، އޭރު ޗާޕުކުރި ފައިސާތަކުގެ ވާހަކަ ދެއްކުމަކީ ޒިންމާދާރު ކަމެއް ނޫން ކަމަށް ވެސް އޭނާ ވިދާޅުވި އެވެ. ޑޮލަރުގެ ރޭޓު މަތިވާ އަސްލު ސަބަބަކީ، އަމީރު ވިދާޅުވި ގޮތުގައި، ސަރުކާރުގެ ތާކުންތާކު ނުޖެހޭ، ދޯހަޅި ސިޔާސަތުތައް ފެއިލުވުން ކަމަށެވެ.
އެ ގޮތުން މިހާރު ސަރުކާރުން ގެންގުޅޭ ސިޔާސަތުތަކަކީ ހުދުމުހުތާރު ގައުމުތަކުން ފެންނަ ސިޔާސަތުތައް ކަމަށް ސިފަކުރައްވަމުން އަމީރު ވިދާޅުވީ، މިއީ ފެއިލްވެފައިވާ އިގުތިސޯދުތަކުގައި އަޅާ ކަހަލަ ފިޔަވަޅުތަކެއް ކަމަށެވެ. އަދި، މި ކަހަލަ ފިޔަވަޅެއް އަޅައިގެން މާލީ ދަތިކަމުން އަރައިގަނެވުނު އެއްވެސް ގައުމެއް ނެތް ކަމަށް އޭނާ ވިދާޅުވި އެވެ.
އަމީރު ވިދާޅުވީ، މި ސަރުކާރުން ދަނީ އަޅަން ޖެހޭ ފިޔަވަޅުތައް ނޫން އެހެން ހުރިހާ ފިޔަވަޅުތަކެއް އަޅަމުން ކަމަށެވެ. މި ކަމުގައި ސަރުކާރުން ނުކުރާ ކަމަކީ، އޭނާ ވިދާޅުވި ގޮތުގައި، ގެންނަން ޖެހޭ ރިފޯމްތައް ނުގެނެވުމެވެ.
"ހަގީގަތުގައި ނުކުރާ ކަމަކީ ހަރަދު ކުޑަކުރުން. އެހެން ހުރިހާ ކަމެއް ސަރުކާރުން އެބަކުރޭ." އަމީރު ވިދާޅުވި އެވެ.
މީގެ ބައެއް މިސާލުތަކުގެ ގޮތުގައި ރަސްމާލެ ޕްރޮޖެކްޓާއި ޑްރޯންތައް ގަތުން އަމީރު ނަންގަތެވެ. މި ކަންތައްތަކަށް ސަރުކާރުން 285 މިލިއަން ޑޮލަރު ހަރަދުކޮށްފައިވާ ކަމަށް އޭނާ ވިދާޅުވި އެވެ. މި ހުރިހާ އިސްރާފުތަކެއް ކުރަމުން އަންނަ އިރު، އަމީރު ވިދާޅުވީ، ބޭރުން އެއްވެސް ފައިސާއެއް ނުހޯދޭ ކަމަށެވެ.
މި ސަރުކާރުން ވަނީ ވޭތުވި އަހަރުތަކުގެ ބަޖެޓުގައި ބޭރުން ފައިނޭންސިންގެ ގޮތުގައި 2.6 ބިލިއަން ޑޮލަރުގެ ފައިނޭންސިން ހޯދާނެ ކަމަށް ޖަހާފަ އެވެ. ނަމަވެސް މި ސަރުކާރުން އަންދާޒާ ކުރި ވަރަ ގާތަށް ވެސް ފައިސާ ނުހޯދެ އެވެ. އަމީރު ވިދާޅުވީ، މި ސަރުކާރުގެ ދެ އަހަރާ ބައިގެ ތެރޭގައި ލިބުނު 800 މިލިއަން ޑޮލަރުގެ ތެރޭގައި މާ ކުރިން ހަމަޖައްސާފައި ހުރި ޕްރޮޖެކްޓު ފައިނޭންސިން ކަަމަށެވެ. އަދި، ޑޮލަރުގެ ޕްރެޝަރުތައް ބޮޑު ވަމުން އަންނަނީ މި ކަހަލަ ކަންކަމާ ހުރެ ކަމަށް އޭނާ ވިދާޅުވި އެވެ.
