ވެރިންނަށް ވަނަން ހަދައި، އެބޭފުޅުންގެ އަގު ވައްޓާލުމަކީ ގައުމާ ދެކޮޅަށް ކުރެވޭނެ މަސައްކަތެއް ކަމަށް ރައީސުލްޖުމްހޫރިއްޔާ މުހައްމަދު މުއިއްޒު ވިދާޅުވެއްޖެ އެވެ.
ޓީވީއެމް އިން ގެނެސްދޭ "ނޭޝަން ޗެޓް" ގައި ވާހަކަ ދައްކަވަމުން މުއިއްޒު ރޭ ވިދާޅުވީ، ވެރިންގެ އަގު ވައްޓާލަން މީގެ ކުރިން ރޭވިގެން ކެމްޕެއިން ކޮށްފައިވާ ކަމަށާއި އެފަދަ ކަންކަމަކީ ގައުމާ ދެކޮޅަށް ކުރެވޭ މަސައްކަތެއް ކަމަށެވެ.
"އެއިރުގައި އެކި ނަންމުގައި ހެދި ވެބްސައިޓުގައި ލިޔަމުންދިޔަ އެއްޗެހި، އަޅުގަނޑުމެންގެ ވެރިންނަށް ތިބި މީހުންނަށް ގޮވަމުންދިޔަ އެއްޗެހި، އެކި ކަހަލަ ވަނަންތައް ހަދައިގެން އެމީހުންގެ އަގު ވައްޓާލައި، އެމީހުންގެ ދަރިންނާ ބެހި، ދަރިންގެ އަގު ވައްޓާލާ މުޅި މުޖްތަމައުގައި ވެރިންނަށް ތިބޭ މީހުންނަށް އިހްތިރާމް ކުރުން ކުޑަކޮށްލައި، މިހެން ގޮސް ކުރަމުންދިޔަ ކޮންމެ ކަމަކީ ގައުމާ ދެކޮޅަށް ކުރަމުން އައި ކަންކަން،" ރައީސް ވިދާޅުވި އެވެ.
އޭގެ އިތުރުން، ފިކުރީ ގޮތުންނާއި ބުނާ ބަހަކުންނާއި ލިޔެވޭ އެއްޗަކުން ވެސް ގައުމާ ދެކޮޅުވެވިދާނެ ކަމަށް މުއިއްޒު ރޭ ވިދާޅުވި އެވެ.
"ގައުމާ ދެކޮޅުވެވިދާނެ ފިކުރީ ގޮތުން ވެސް، އަތުން ލިޔެވޭ އެއްޗަކުން ވެސް، ބުނެވޭ ބަހަކުން ވެސް، ކުރެވޭ އަމަލަކުން ވެސް. ދެން މިހެން ގޮސް އެކި ގޮތްގޮތުން ވެސް ގައުމާ ދެކޮޅު ވެވިދާނެ،" އެމަނިކުފާނު ވިދާޅުވި އެވެ.
ރޭގެ ޕްރޮގްރާމުގައި ވާހަކަ ދައްކަވަމުން މުއިއްޒު ވަނީ، ގައުމާ ދެކޮޅަށް އެންމެ ގިނައިން މަސައްކަތް ކުރަނީ ސިޔާސީ މައިދާނުގައި ކަމަށް ވިދާޅުވެފަ އެވެ.
"އަމިއްލަ އެދުމުން ފޯވެގެން ގޮސް ހަމަ ކޮންމެ ފަދަ ކަމެއް ވެސް ކޮށްފާނެކަން އަޅުގަނޑުމެންނަށް ހަމަ މާ ދުރު ނޫން މާޒީގައި ވެސް ފެންނަން އެބަހުރި،" މުއިއްޒު ވިދާޅުވި އެވެ. "ސިޔާސީ ގޮތުން ހާއްސަކޮށް މިކަހަލަ ކަންކަން ދިމާވަނީ. ސިޔާސީ ބޭނުމެއްގައި، އަމިއްލަ އެޖެންޑާއެއް ކުރިއަށްގެންދިޔުމުގައި ހަމަ ގައުމާ ދެކޮޅަށް ކޮންމެ ފަދަ ވާހަކައެއް ވެސް ދައްކަފާނެ."
ވެރިންނަށް އިހްތިރާމް ނުކުރުމާ ދެކޮޅަށް މުއިއްޒު ވާހަކަ ދެއްކެވިއިރު އެމަނިކުފާނުގެ މަގުބޫލުކަން ވަނީ ވަރަށް ބޮޑަށް ވެއްޓިފަ އެވެ. މިފަހުން ބޭއްވި އެތެރޭގެ ތިން އިންތިހާބުގައި ވެސް މުއިއްޒަށް ލިބިވަޑައިގެންނެވީ ނާކާމިޔާބީ އެވެ. އަދި އެމަނިކުފާނާ ގުޅުވައި ސިޔާސީ މައިދާނުގައި ވަނަމެއް ވެސް ވަނީ ހަރުކޮށްފަ އެވެ.
