މެދުއިރުމަތީގައި ކުރިއަށްދާ ހަނގުރާމައާ ގުޅިގެން ރާއްޖެއަށް ކުރާ އަސަރު ކުޑަކުރުމަށް ބުނެ އެންމެފަހުން ޕްރޮސެކިއުޓާ ޖެނެރަލް އޮފީސް (ޕީޖީ) އިން ފިޔަވަޅުތަކެއް އަޅަން އިއްޔެ ނިންމައިފި އެވެ.
ޕީޖީ އޮފީހުން ވަނީ ހަރަދު ކުޑަކުރުމުގެ ގޮތުން މުވައްޒަފުން ގޭގައި ތިބެގެން މަސައްކަތް ކުރާ ދުވަހެއް ހަމަޖައްސައި، އޮފީސް ހުޅުވާފައި ހުންނަ ވަގުތުތައް މަދުކުރަން ނިންމާފަ އެވެ. މި ފިޔަވަޅުތައް އަޅަން ޕީޖީން ނިންމީ މިއަދުން ފެށިގެން އަންނަ މަހުގެ ނިޔަލަށެވެ.
އެ މުއްދަތުގައި ކޮންމެ އަންގާރަ ދުވަހަކު ޕީޖީން މުވައްޒަފުން އާންމު އުސޫލެއްގެ ގޮތުން ގޭގައި ތިބެގެން މަސައްކަތް ކުރި ނަމަވެސް، ކޮންމެހެން އޮފީހަށް ހާޒިރުވެގެން ނޫނީ ނުކުރެވޭނެ މަސައްކަތްތައް އޮފީހަށް ހާޒިރުވެ ކުަމުން ގެންދާނެ ކަމަށާއި ކޯޓު އަޑުއެހުންތަކަށް ގަވާއިދުން ހާޒިރުވާން ވާނެ ކަމަށް ވެސް އެ އޮފީހުން ބުންޏެވެ.
އޭގެ އިތުރުން ރަސްމީ ބައްދަލުވުންތަކުގެ ތެރެއިން އޮންލައިންކޮށް ކުރިއަށް ނުގެންދެވޭނެ ބައްދަލުވުންތަކާއި، އޮންލައިންކޮށް ކުރިއަށް ގެންދިއުމުގެ ސަބަބުން ބައްދަލުވުމުން ނެރެވިދާނެ ނަތީޖާއަށް އުނިކަމެއް އައިސްދާނެ ކަމަށް ބެލެވޭ ބައްދަލުވުންތައް ހާޒިރުވެގެން ކުރިއަށް ގެންދެވޭ ގޮތަށް ވަނީ އިސްތިސްނާކޮށްފަ އެވެ.
ހަރަދު ކުޑަކުރުމުގެ ގޮތުން ޕީޖީ އޮފީހުން އަޅާ އެހެން ފިޔަވަޅުތައް
- ކަރަންޓަށް ކުރާ ހޭދަ ކުޑަކުރުމަށް މުވައްޒަފުން އޮފީހަށް ހާޒިރުވާ ދުވަސްތަކުގައި ވެސް މެންދުރު 14:00 ގެ ފަހުން ގޭގައި ކުރެވޭ މަސައްކަތްތައް ގޭގައި ތިބެގެން ކުރުމަށް ބާރުއަޅައި، އޮފީސް ބަންދުކުރާ ގަޑި 18:00 އަށް އަވަސްކުރުން
- ޕީޖީ އޮފީހުގެ މަސައްކަތްތައް މުޅިން ޑިޖިޓައިޒްކޮށް ކަރުދާސް ބޭނުންކުރުން ހުއްޓާލުމަށް ގެންގުޅޭ ސިޔާސަތުގެ ދަށުން، އެ އޮފީހުން ކަރުދާސް ބޭނުންކުރާ މިންވަރު މަދުކުރުމަށް ހާއްސަ ފިޔަވަޅުތަކެއް އެޅުން
- އޮފީސް ވެހިކަލް ބޭނުންކުރާ މިންވަރު މަދުކުރުން
މި ބަދަލުތަކުގެ ސަބަބުން ޕީޖީން ދޭ ހިދުމަތްތަކަށް އެއްވެސް އުނިކަމެއް ނުވަތަ ލަސްކަމެއް ނާންނާނެކަމުގެ ޔަގީންކަން އެ އޮފީހުންދެ އެވެ. ޕީޖީގެ އޮންލައިން ޕްލެޓްފޯމް މެދުވެރިކޮށް ހިދުމަތްތައް ހޯދުމަށްވެސް އެ އޮފީހުން އެދެ އެވެ.
ސަރުކާރުގެ އެކި ކުންފުނިތަކާއި އިދާރާތަކުން ހަރަދު ކުޑަކުރަން ފިޔަވޅުތައް އަޅަން ފަށާފައި މިވަނީ ކައުންސިލް އިންތިހާބާއި ފެންނަ ނުފެންނަ ވޯޓު ނިމުމާއެކުގަ އެވެ. އިންތިހާބުތަކުގެ ކުރިން ހަރަދު ކުޑަކުރަން ފިޔަވަޅުތައް ކުރީބައިގައި ނާޅާތީ އެކަމާ ގުޅިގެން ރައްޔިތުންގެ ހިތްހަމަނުޖެހުންތަކެއް އޮތެވެ.
