އިރާނު ހަނގުރާމަ ފެށި ފަހުން އިގުތިސޯދީ ފިއްތުންތައް އިތުރުވަމުން ދިޔަ އިރު ވެސް ހަރަދު ކުޑަކުރުމުގެ އެއްވެސް ފިޔަވަޅެއް ނާޅައި ތިބުމަށް ފަހު, އެ ހަނގުރާމަ މެދުކަނޑާލި ފަހުން ހަރަދު ކުޑަކުރުމުގެ ފިޔަވަޅުތަކެއް އަޅަން ޕްރައިވަޓައިޒޭޝަން އެންޑް ކޯޕަރަޓައިޒޭޝަން ބޯޑު (ޕީސީބީ) އިން ސަރުކާރު ކުންފުނިތަކަށް މިއަދު އަންގައިފި އެވެ.
ޕީސީބީން އާންމުކޮށް ޝާއިއުނުކޮށް، ސީދާ ކުންފުނިތަކަށް ފޮނުވި ސާކިއުލާގައި ވަނީ މިހާރުގެ ހާލަތަށް ރިއާޔަތްކޮށް ހަރަދު ކުޑަކުރުމުގެ އިތުރު ފިޔަވަޅުތައް އަޅަން އަންގާފަ އެވެ. މިއީ ސަރުކާރު ހިއްސާވާ ކުންފުނިތަކާއި އެ ކުންފުނިތަކުގެ ސަބްސިޑަރީތަކުން ވެސް އަޅަން ޖެހޭ ފިޔަވަޅުތަކެކެވެ.
ހަރަދު ކުޑަކުރުމުގެ ގޮތުން އަޅަން ޖެހޭ ފިޔަވަޅުތައް
- ކުންފުނިތަކުގެ މުވައްޒަފުންގެ މުސާރައާއި އިނާޔަތްތަކަށް ކުރާ ހަރަދު ބޮޑުތަނުން ކުޑަރުމަށް އަޅަންޖެހޭ އެންމެހައި ފިޔަވަޅުތައް އެޅުން.
- ރަސްމީގަޑީގައި މަސައްކަތްތައް ނިންމޭނެ ގޮތަކަށް ކުންފުނީގެ މަސައްކަތްތައް ރޭވުމާއި، ރަސްމީގަޑީގެ ބޭރުން ކޮންމެހެން ކުރަންޖެހޭ މަސައްކަތެއް ކުރުމަށް މެނުވީ އިތުރުގަޑީގައި މަސައްކަތްނުކުރުން.
- މުވައްޒަފުންނަށް މަގާމުގެ ކުރިއެރުން ދިނުން މި ވަގުތަށް ހުއްޓާލުމާއި އަދި ކުންފުނިން މިހާރު ފާސްކޮށްފައިވާ އިދާރީ އޮނިގަނޑުގައި ހިމެނޭ މަގަމެއްކަމުގައި ވީނަމަވެސް، ކުންފުނީގެ އޮޕަރޭޝަންތައް ނުހުއްޓި ކުރިއަށް ގެންދިއުމަށް ކޮންމެހެން ނަގަންޖެހޭ މުވައްޒަފުން ފިޔަވައި އިތުރު މުވައްޒަފުން މަގާމުތަކަށް ނުނެގުން.
- ކުންފުނީގެ ކޭޝްފުލޯ ދަތިނުވެ، ދެމެހެއްޓެނިވިގޮތަކަށް ކޭޝްފުލޯ މެނޭޖުކުރުމަށްޓަކައި، މުވައްޒަފުންގެ މުސާރައިގެ ހަރަދުތައް މެނޭޖުކުރުމުގައި އަޅަންޖެހޭ އެންމެހާ އެހެނިހެން ފިޔަވަޅުތައް އެޅުން.
- ކުންފުނީގެ ހިންގާ ގަވާއިދާއި، އަސާސީ ގަވާއިދުގައި ބަޔާންކޮށްފައިވާ މަސްއޫލިއްޔަތުތައް އަދާކުރުމަށްޓަކައި ކޮންމެހެން ކުރަންޖެހޭ ހަރަދުތައް ފިޔަވައި އެހެނިހެން ހަރަދުތައް ކުންފުނިން ނުކުރާކަން ޔަގީންކުރުމަށްޓަކައި އަޅަންޖެހޭ އެންމެހާ ފިޔަވަޅުތައް އެޅުން.
- މެދުއިރުމަތީގެ ހަމަނެޖެހުންތަކާއި ގުޅިގެން އިގުތިސޯދަށް ކުރާނެ އަސަރުތަށް ދިރާސާކޮށް ފިޔަވަޅުތައް އެޅުމާއި، ރައްޔިތުންނަށް ކޮށްފާނެ މާލީ ބުރަތަކަށް ވިސްނައިގެން ފިޔަވަޅުތައް އެޅުމަށް ސަމާލުކަންދިނުން.
- ކޮންމެހެން ބާއްވަންޖެހޭ ހަފްލާތައް މެނުވީ ނުބޭއްވުމާއި، އަދި ހަފްލާތައް ބޭއްވުމުގައި ވަސީލަތްތައް ހުރި ކުންފުނިތަކުން އެހެން ކުންފުނިތަކަށް ވަސީލަތްތައް ހިއްސާކުރުމާއި، ހަފްލާތަކަށް ކުރާ ހަރަދު ވީހާ ވެސް ކުޑަކުރުން.
މި ފިޔަވަޅުތަކާއެކީ، ދެމެހެއްޓެނިވި ގޮތެއްގައި ކުންފުނީގެ ހަރަދުތައް މެނޭޖްކުރުމަށްޓަކައި މި ނޫނަސް އެޅުން މުހިންމު އެހެނިހެން ފިޔަވަޅުތައް އަޅަން ޕީސީބީން ވަނީ ކުންފުނިތަކުގެ ބޯޑަށް އަންގާފަ އެވެ.
އިރާނު ހަނގުރާމައަށް 40 ދުވަސް ފަހުން ހަރަދުކުޑަކުރަން ވަރުގަދަ ފިޔަވަޅުތަކެއް އަޅަން ސަރުކާރު ކުންފުނިތަކަށް އެންގިއިރު، މިދިޔަ ހަފުތާ ބަންދުގައި އިންތިހާބުތަކާއި ރިފަރެންޑަމް ވޯޓު ނެގުމާ ހަމައަށް އެ ކުންފުނިތަކުން ދިޔައީ ގިނަ އަދަދަކަށް މުވައްޒަފުން ނަގަމުންނެވެ.
މީގެ ކުރިން ޕީސީބީން އެޅި ހަމައެކަނި ފިޔަވަޅަކީ، ސަރުކާރުން ވެސް ހަރަދު ކުޑަކުރަން ކަމަށް ބުނެ އަޅައިގެން އުޅޭ ދަތުރުތަކަށް ކުރާ ހަރަދުތައް ކުޑަކުރުމުގެ ފިޔަވަޅު އެކަންޏެވެ. ދަތުރު ކުރުމުގެ ހަރަދުތައް ކުޑަކުރަން އެންގީ ވެސް މިދިޔަ މަހުގެ 30 ގައި، ނެރުނު ސާކިއުލާއެއްގައި އެވެ.
މިކަމާ ގުޅިގެން ސަރުކާރާ ސުވާލު ކުރިމަތިކުރުމުން ތަކުރާރުކޮށް ބުނަމުން ދިޔައީ، މުވައްޒަފުން ނަގަމުން ދިޔައީ ބަޖެޓުކޮށްފައި ހުރި ޕްރޮޖެކްޓުތަކަށް ބޭނުންވާ ވަރަށް ކަމަށެވެ. އަދި، މިއީ އިންތިހާބާ ގުޅިގެން ދޭ ވަޒީފާތަކަށް ނޫން ކަމަށް ރައީސް މުހައްމަދު މުއިއްޒު އާއި ވަޒީރުން ވެސް ވަނީ ތަކުރާރުކޮށް ބުނެފަ އެވެ.
ހަމަ އެހެންމެ، ހަރަދު ކުޑަކުރުމުގެ ފިޔަވަޅުތައް ނާޅަނީ އިންތިހާބު ބޯމަތިވެފައި އޮތުމުންތޯ އެހި ސުވާލުތަކަށް ޖަވާބުދެމުުން ވެސް މުއިއްޒު އާއި ވަޒީރުން ވަނީ އެ ކަން ދޮގުކޮށްފަ އެވެ.
"އިންތިހާބު ނިމިގެން އަޅަން ބަހައްޓާފައި ހުރި ފިޔަވަޅެއް ނުހުންނާނެ، އަޅުގަނޑުމެން މިދަނީ ވީކްލީ މީޑިއާ މެދުވެރިކޮށް ފިޔަވަޅުތައް، އަޅަން ގަސްތުކުރާ ސިޔާސަތުތައް އިއުލާން ކުރަމުން،" މުއިއްޒު ވިދާޅުވި އެވެ.
މިހެން ނަމަވެސް، އިންތިހާބާއި ރެފަރެންޑަމް ވޯޓުން ސަރުކާރަށް ލިބުނު ބޮޑު ބައްޔަށް ފަހު ހަރަދު ކުޑަކުރަން މަސައްކަތްތަކެއް ކުރަން ވަނީ ފަށާފަ އެވެ. ނަމަވެސް ގިނަ ފިޔަވަޅުތައް އަޅަމުން ދަނީ ސިއްރިއްޔާތުގައި، އެތެރޭގެ އެންގުންތަކުންނެވެ. މީގެ ކުރިން ފިނޭންސް މިނިސްޓަރު މޫސާ ޒަމީރު ވަނީ މިހެން އަޅާ ފިޔަވަޅުތައް ހާމަނުކުރާނެ ކަމަށް ވިދާޅުވެފަ އެވެ.
