ސަރުކާރުގެ ފަސް ކުންފުންޏެއްގެ އެންމެ އިސްވެރިޔާގެ މަގާމު ހުހަށް ހުންނަތާ ދުވަސްތަކެއް ފާއިތުވެއްޖެ އެވެ.
ކުންފުނީގެ އެންމެ އިސްވެރިޔާގެ މަގާމު މިވަގުތު ހުހަށް އޮތީ ސްޓެލްކޯ، ފެނަކަ ކޯޕަރޭޝަން، އެމްޑަބްލިއުއެސްސީ، މޯލްޑިވްސް ޕޯޓްސް ލިމިޓެޑް (އެމްޕީއެލް)، އެގްރޯ ނެޝަނަލް ކޯޕަރޭޝަން އަދި މިފްކޯގެ އެވެ.
ސްޓެލްކޯގެ އެމްޑީގެ މަގާމު ހުސްވީ އެ މަގާމުގައި ހުންނެވި އަހްމަދު ޝަމާހު ރަޝީދު މިދިޔަ ޖެނުއަރީ މަހު މަގާމުން ވަކިކުރުމުންނެވެ. އޭނާ އެ މަގާމަށް އައްޔަންކުރީ އެ މަގާމުގައި ކުރިން ހުންނެވި ހުސައިން ފަހުމީ ވަކިކޮށް ސެޕްޓެމްބަރު 7، 2025، ގަ އެވެ.
އޭނާ މަގާމުން ވަކިކުރިފަހުން ކޮރަޕްޝަންގެ މައްސަލަތަކެއް އެންޓި ކޮރަޕްޝަން ކޮމިޝަން (އޭސީސީ) އަށް ވެއްދި އެވެ. ނަމަވެސް މިހާތަނަށް ވެސް އެ މައްސަލަތަކާ ގުޅިގެން އެއްވެސް މައުލޫމާތެއް އޭސީސީން ހާމަކޮށްފައެއް ނުވެ އެވެ.
ސަމާހު ވަކިކުރުމަށްފަހު ކުންފުންޏެއްގެ އިސްވެރިޔަކަށް ދެން ވަކިކުރީ ލޯކަލް ކައުންސިލް އިންތިހާބު ނިމުނުތާ ދެވަނައަށްވީ ދުވަހު ފެނަކަ ކޯޕަރޭޝަންގެ އެމްޑީ މުހައްމަދު ނަޖާހު އެވެ.
ފެނަކައިގެ އެމްޑީއަކަށް ނަޖާހު އައްޔަނު ކުރީ މި ސަރުކާރުގައި އެންމެ ފުރަތަމަ އެ މަގާމަށް އައްޔަންކުރި އިބްރާހިމް މުއާޒް ރަޝީދު އިސްތިއުފާ ދިނުމުންނެވެ.
ފެނަކައިން ވަކި ކުރި ނަޖާހު ވިދާޅުވީ މަގާމުން ވަކިކުރި ސަބަބެއް އޭނާއަށް ނޭނގޭ ކަމަށެވެ. އުސޫލުތަކާއި ހިލާފަށް މަގާމުގައި ހުންނަވައިގެން އެއްވެސް ކަމެއް ކޮށްފައި ނުވާނެ ކަމުގެ ޔަގީންކަން އޭނާ ދެއްވި އެވެ.
އޭގެއިތުރުން ހަމަ އެ ދުވަހު އެގްރޯގެ އެމްޑީ ހުސައިން ދީދީ ވަކިކޮށްފައިވާއިރު، އެމްޕީއެލްގެ ސީއީއޯ މުހައްމަދު ރިޝްވާން ވަނީ މަގާމުން އިސްތިއުފާ ދެއްވައިފަ އެވެ. ރިޝްވާން މަގާމާ ހަވާލުވީ ފެބްރުއަރީ، 2025، ގަ އެވެ.
އެމްޕީއެލްގެ އެމްޑީއަކަށް ރިޝްވާން އައްޔަނުކުރީ އެ މަގާމުގައި އެއިރު ހުންނެވި މުހައްމަދު ވަޖީހު އިބްރާހިމް ވަކިކުރުމަށް ފަހުގަ އެވެ. ވަޖީހު އެ މަގާމުން ވަކިކުރީ ރައީސް މުހައްމަދު މުއިއްޒު އާއި ރައްޔިތުންގެ މަޖިލީހުގެ ރައީސް އަބްދުއްރަހީމްއާ މައްސަލަ ޖެހުނު ދުވަސްވަރުގަ އެވެ.
މިފްކޯގެ ސީއީއޯގެ މަގާމުން ފަރުހަތު ޝަހީރު އަދި އެމްޑަބްލިއުއެސްސީގެ އެމްޑީ އަބްދުލް މަތީން އިސްތިއުފާ ދެއްވީ އިއްޔެގެ ވަގުތެއްގަ އެވެ.
ކުންފުނިތަކުން އެމްޑީންނާއި ސީއީއޯއިން ވަކިކުރި ސަބަބެއް އަދި އިސްތިއުފާ ދެއްވި ސަބަބެއް މިހާތަނަށް ހާމަކުރައްވާފައެއް ނުވެ އެވެ. ނަމަވެސް އޭގެތެރެއިން ސްޓެލްކޯ އެމްޑީ ފިޔަވައި ބާކީ ތިއްބެވި ވެރިން އިސްތިއުފާ ދެއްވީ އަދި މަގާމުން ވަކިކުރީ އިންތިހާބުގައި ޕީއެންސީއަށް ލިބުނު ނާކާމިޔާބީއާ ގުޅިގެން ކަމަށް ވަނީ ބެލެވިފަ އެވެ.
ކައުންސިލް އިންތިހާބާ ދިމާކޮށް ސަރުކާރުގެ ކުންފުނިތަކުން ވަނީ އިންތިހާބަށް ނުފޫޒު ފޯރުވުމުގެ ގޮތުން ގިނަ އަދަދެއްގެ ވަޒީފާ އުފައްދާފަ އެވެ. އެގޮތުން ބައެއް ކުންފުނިތަކުން އިންތިހާބަށް 24 ގަޑިއިރުވެފައި އޮއްވައި ވެސް މުވައްޒަފުން ނަގައި، ގިނަ އަދަދެއްގެ ޕްރޮމޯޝަންތަކެއް ވެސް ދީފައިވާކަން ފާހަގަކުރެވެ އެވެ.
