ސްރީ ލަންކާގެ ސިފައިން އަނިޔާ ކުރާތީ ބޯޓެއްގައި އެ ގައުމުން ފިލި 60 ތަމަޅައިގެން ގްރޫޕުގައި ހިމެނޭ އެންމެ ފަހު މީހާ ޑިއެގޯ ގާސިއާއިން ދިވެހިރާއްޖެއަށް ގެނެސްފި އެވެ.
މީގެ ފަސް އަހަރު ކުރިން 2021 ވަނަ އަހަރު ލަންކާއިން ފިލި ގްރޫޕު ކަނޑުމަތީގައި ހާލުގައި ޖެހިފައި ތިއްބާ ސަލާމަތްކޮށްގެން ޑިއެގޯ ގާސިއާއަށް ގެންދިޔައީ އިނގިރޭސި މަނަވަރަކުންނެވެ.
ޑިއެގޯ ގާސިއާއަށް އެމީހުން ގެންދިޔުމުން އެތަނުގައި ހިމާޔަތް ހޯދި އެވެ. އަދި ދިވެހިރާއްޖެ ގެނައި ކޭޕީ، 34، ފިޔަވައި އެހެން އެންމެން އިނގިރޭސިވިލާތަށް ގެންދިޔުމަށް އެ ގައުމުގެ ސަރުކާރުން އެއްބަސްވި އެވެ.
އެމީހުންނާއެކު ކޭޕީ އިނގިރޭސިވިލާތުން ބަލައިނުގަތީ އޭނާއާ ދެކޮޅަށް ހުޅުޖެހުމުގެ މައްސައަކާއި ޖިންސީ ކުށުގެ މައްސަލައެއް ސާބިތުވެފައިވާތީ އެވެ.
ކޭޕީ ރާއްޖެ ގެނައީ މިދިޔަ މާޗު މަހުގެ ތެރޭގައި، އިނގިރޭސި ސަރުކާރާއެކު ވި އެއްބަސްވުމެއްގެ ދަށުން ކަމަށް ޓެލެގްރާފް ނޫހުގައި ރިޕޯޓުކޮށްފައިވެ އެވެ. އޭނާގެ ހުރިހާ ހަރަދުބަރަދެއް ބަލަހައްޓާނީ އިނގިރޭސި ސަރުކާރުންނެވެ.
ޑިއެގޯ ގާސިއާއިން ކޭޕީ ބޭލުމުގެ މަސައްކަތް ފެށީ މެދުއިރުމަތީގައި ކުރިއަށްދާ ހަނގުރާމައާ ގުޅިގެން ޑިއެގޯ ގާސިއާއަށް ބޮން އަޅަން އިރާނުން މަސައްކަތް ކުރުމުންނެވެ.
އެ ރަށުގައި ހަރަކާތްތެރިވާ ވަރަށް ގިނަ މުވައްޒަފުން އެ ތަން ދޫކޮށް ދިޔުމަށް ވެސް އިނގިރޭސި ސަރުކާރުން ވަނީ އަންގައިފަ އެވެ.
އޭނާ ދިވެހިރާއްޖެއަށް ގެނައީ ލަންކާއަށް ނުފޮނުވާލާނެ ކަމުގެ ޔަގީންކަން ދިވެހި ސަރުކާރުން ދިނުމުން ކަމަށް ވެސް ނޫސްތަކުގައި ރިޕޯޓްކޮށްފައިވެ އެވެ.
