އިރާނުގެ މަތިން ދަތުރުކުރަމުންދިޔަ އެމެރިކާގެ އަސްކަރިއްޔާގެ ފައިޓަރު ޖެޓެއް ވައްޓާލައިފި އެވެ.
މިއީ ފަސް ހަފުތާ ވެފައިވާ ހަނގުރާމައިގައި އިރާނުގެ ވައިގެ ސަރަހައްދުން އެމެރިކާގެ ޖެޓަކަށް ހަމަލާދީ ވައްޓާލި ފުރަތަމަ ފަހަރެވެ. ވައްޓާލީ އެފް-15 މަރުކާގެ ޖެޓެކެވެ.
އެ ޖެޓުން ދަތުރުކުރި ޕައިލެޓުން ހޯދުމުގެ މަސައްކަތް ފަށާފައިވާއިރު އޭގެ ތެރެއިން އެކަކު މިހާރު ވަނީ ހޯދާފަ އެވެ. ދެވަނަ މީހާ ހޯދުމުގެ މަސައްކަތް ވެސް ކުރަމުންދާ ކަމަށް އެމެރިކާއިން ބުނެ އެވެ.
އިރާނުން ވެސް އަންނަނީ އެ މީހުން ހޯދުމުގެ މަސައްކަތް ކުރަމުންނެވެ. އެމެރިކާގެ ޕައިލެޓަކު ހޯދާ މީހަކަށް ހާއްސަ އިނާމެއް ދޭނެ ކަމަށް ވެސް އިރާނުން ވަނީ ބުނެފަ އެވެ.
މިހާތަނަށް މި ހަނގުރާމައިގައި އެމެރިކާގެ 13 ސިފައިން ވަނީ މަރުވެފަ އެވެ. އަދި ޒަހަމްވި ސިފައިންގެ އަދަދު ވަނީ 300 ހުރަސްކޮށްފަ އެވެ.
އިރާނުގެ އަސްކަރިއްޔާ އެއްކޮށް ފުނޑުފުނޑުކޮށްލާފައިވާ ކަމަށް އެމެރިކާގެ ރައީސް ޑޮނާލްޑު ޓްރަމްޕު ތަކުރާރުކޮށް ވިދާޅުވަމުން ގެންދެވި ނަމަވެސް އިރާނުގެ އަސްކަރި ބާރު ކަނޑުވާލެވިފައެއް ނުވެ އެވެ.
