މާލޭގެ ވިޔަފާރި ބަނދަރު ފުރިގެން، ސްރީލަންކާގެ ކޮލަމްބޯގައި 4،200 ކޮންޓެއިނަރު ތަށިވެފައި އެބަހުރި ކަމަށް އިކޮނޮމިކް މިނިސްޓަރު މުހައްމަދު ސައީދު އިއްޔެ ވިދާޅުވެއްޖެ އެވެ.
ރާއްޖެއަށް ގެންނަ ގިނަ މުދާ ކޮންޓެއިނަރު ގެންނަނީ ކޮލަމްބޯ މަގުންނެވެ. ކޮލަމްބޯއިން ބޯޓު ފުރަނީ މާލޭގެ ވިޔަފާރި ބަނދަރުން ޖާގަ ލިބޭ މިންވަރަކުންނެވެ.
ރައީސް އޮފީހުގައި ބޭއްވި ނޫސްވެރިންގެ ބައްދަލުވުމެއްގައި ސައީދު ވިދާޅުވީ މިދިޔަ އަންގާރަ ދުވަހުގެ ނިޔަލަށް ރާއްޖެ ނުގެނެވި 4،000 ކޮންޓެއިނަރު ކޮލޮމްބޯގައި ތާށިވެފައި ހުރިއިރު، އެ އަދަދު އިއްޔެގެ ނިޔަލަށް 4،200 އަށް އަރާފައިވާ ކަމަށެވެ.
"މިއަދު ހެނދުނު އަޅުގަނޑަށް ލިބުނު ފިގާއަކީ 4،200 ކޮންޓެއިނަރު ކޮލޮމްބޯގައި އެބަހުރިކަން ސްޓަކްވެފައި އެނގޭތޯ. ނުވަތަ އައުމުގެ މަގުމަތީގައި. އަބަދުވެސް އަންނަމުންދަނީ. އެހެންނަމަވެސް މިވަގުތު ކޮލޮމްބޯގައި 4،200 ކޮންޓެއިނަރު އެބަހުރިކަން،" ސައީދު ވިދާޅުވި އެވެ.
ސައީދު ވިދާޅުވީ ވަކި ވައްތަރެއްގެ މުދާތައް ރާއްޖެއަށް ނުގެނެވި ލަންކާގައި ތާށިވުމުގެ ސަބަބުން ދިމާވާ ދަތިތައް ހައްލުކުރަން އިކޮނޮމިކް މިނިސްޓްރީން ވިޔަފާރިވެރިންނާއި މުދާ އެތެރެކުރާ ފަރާތްތަކާއެކު މަސައްކަތްކުރަމުންދާ ކަމަށެވެ.
މިގޮތުން ލަންކާގައި ތާށިވެފައި ހުރި ސަންފްލާވާ ތެޔޮ އަދި ކިރު ކޮންޓެއިނަރުތައް ތަންކޮޅެއް އަވަހަށް ރާއްޖެ ގެނެވޭނެ އިންތިޒާމު ހަމަޖައްސަން ވިޔަފާރިވެރިން އެދުމުން އެ ދެ ބާވަތް ވީހައިވެސް އަވަހަކަށް ގެނެވޭތޯ މަސައްކަތް ކުރަމުންދާ ކަމަށް ސައީދު ވިދާޅުވި އެވެ.
"މިނިސްޓްރީން މިއަދު ހެނދުނު ވިދާޅުވީ ދެ ޕްރޮޑަކްޓެއް ތަންކޮޅެއް އަވަސްކުރަން ބާޒާރުން އަޅުގަނޑުމެންނަށް ރިކުއެސްޓްކޮށްފައި އެބައިނޭ. އެހެންވީމަ އެ ދެބާވަތްވެސް އަޅުގަނޑުމެން މިގެންދަނީ އަވަސް ކުރަމުން،" ސައީދު ވިދާޅުވި އެވެ.
މާލެއަށް ބަނދަރުކުރާ އާގުބޯޓަކުން މުދާ ހުސްކުރަން 17 ދުވަސް, ވިޔަފާރިތަކަށް މާލީ ބޮޑެތި ގެއްލުންތަކެއް!
މީގެ ކުރިން ހަފްތާއެއްހާ ދުވަހުގެ ތެރޭގައި މުދާ ބޯޓުން ބާލައި ބާޒަރަށް ނެރެވޭއިރު އެ މުއްދަތު އިތުރުވުމާއެކު ވިޔަފާރިތަކުގެ ސްޓޮކަށް ވެސް އަސަރުކުރަން ވަނީ ފަށާފަ. އެއާއެކު އާމްދަނީ ވެސް ދަށްވާން ފަށާފައިވާ ކަމަށް ވިޔަފާރިތަކުން ބުނޭ.
މާލޭ ވިޔަފާރި ބަނދަރަށް ބަނދަރުކުރާ އާގުބޯޓުފަހަރުން މުދާ ހުސްކުރުމަށް ގިނަ ދުވަސްތަކެއް ހޭދަވާތީ ލިބޭ މާލީ ގެއްލުންތަކާ ގުޅިގެން ވިޔަފާރިވެރިން ދަނީ ކަންބޮޑުވުން ފާޅުކުރަމުންނެވެ.
މާލޭ ވިޔަފާރި ބަނދަރާއި ހުޅުމާލެ ޓާމިނަލްގެ ކެޕޭސިޓީއަކީ 2،750 ކޮންޓެއިނަރެވެ. ދޭތެރެދޭތެރެއިން މުދާ ހުސްކުރުމުގައި ގިނަ ދުވަސްތަކެއް ހޭދަވި ނަމަވެސް، މިހާރު އެވްރެޖުކޮށް ބޯޓަކުން މުދާ ހުސްކުރަން 17 ދުވަސް ހޭދަވެ އެވެ.
ހުސް ކޮންޓެއިނަރު ބެހެއްޓުމަށް ތިލަފުށީގައި ގާއިމުކޮށްފައިވާ "އެމްޕްޓީ ކޮންޓޭނާ ޑީޕޯ" މިދިޔަ އަހަރުގެ ސެޕްޓެމްބަރުން ފެށިގެން އަންނަނީ ބޭނުންކުރަމުންނެވެ. އެ ތަނުގައި 3،000 ކޮންޓެއިނަރު ބެހެއްޓުމުގެ ޖާގަ ހުރެ އެވެ.
މީގެ ކުރިން ހަފްތާއެއްހާ ދުވަހުގެ ތެރޭގައި މުދާ ބޯޓުން ބާލައި ބާޒަރަށް ނެރެވޭއިރު އެ މުއްދަތު އިތުރުވުމާއެކު ވިޔަފާރިތަކުގެ ސްޓޮކަށް ވެސް އަސަރުކުރަން ވަނީ ފަށާފަ އެވެ.
ރާއްޖެއަށް ފުޅާދާއިރާއެއްގައި ކާބޯތަކެތި ގެންނަ ބައެއް ވިޔަފާރިތަކުގެ ޝިޕްމަންޓުތައް ވެސް ކްލިއާ ނުކުރެވި ހުރިކަން ވަނީ އެނގިފަ އެވެ. އޭގެ ތެރޭގައި ރިސޯޓުތަކަށް ސަޕްލައި ކުރާ ވިޔަފާރިތައް ވެސް ހިމެނެ އެވެ.
މީގެ 40 އަހަރުކުރިން ސެޕްޓެމްބަރު 1986، ގައި ހުޅުވި މާލޭ ވިޔަފާރި ބަނދަރުގެ ޖާގައަށް މިވީ މުއްދަތުގެ ތެރޭގައި މާ ބޮޑު ހައްލެއް ހޯދިފައެއް ނުވެ އެވެ. ވިޔަފާރި ބަނދަރު އެއްވަރެއްގައި އޮތްއިރު ރާއްޖެއަށް އިމްޕޯޓުކުރާ މުދަލުގެ ނިސްބަތް އަންނަނީ ކޮންމެ އަހަރަކުހެން އެތައް ގުނައަކުން އިތުރުވަމުންނެވެ.
