ސީލައިފް ފްލެޓްތަކުގެ މައްސަލާގައި އެ ކުންފުނީގެ އެމްޑީ ވ. ތިނަދޫ، ރެޑްހައުސް، އަހުމަދު މޫސާ މުހައްމަދު (އަންމަޓީ)ގެ މައްޗަށް އުފުލި 42 ދައުވާ ސާބިތު ނުވާ ކަމަށް ކްރިމިނަލް ކޯޓުން މިއަދު ހުކުމްކޮށްފި އެވެ.
ޕްރޮސެކިއުޓާ ޖެނެރަލް (ޕީޖީ) އޮފީހުން ބުނެފައިވާ ގޮތުގައި މި މައްސަލާގައި އޭނާގެ މައްޗަށް ދައުވާ ސާބިތުނުވީ މިއީ ޖިނާއީ އަދުލުގެ ނިޒާމަށް ވުރެ މަދަނީ އަދުލުގެ ނިޒާމުގެ ތެރެއިން ފިޔަވަޅު އަޅަން ޖެހޭ މައްސަލައެއް ކަމަށް ފަނޑިޔާރުންނަށް ފެނިވަޑައިގުމުން ކަމަށެވެ.
ނަމަވެސް، އޭނާގެ މައްޗަށް އުފުލި ދައުވާގައި ގާނޫލުންއުގޫބާތުގައި ބުނާ ހިޔާނާތްތެރިވުމުގެ ކުށުގެ އުންސުރުތައް ފުރިހަމައަށް ހަމަވާ ކަމަށް ދެކޭ ކަމަށް ޕީޖީ އޮފީހުން ބުނެ އެވެ. އަދި މި މައްސަލަ ހައި ކޯޓުގައި އިސްތިއުނާފު ކުރުމަށް ގަސްތުކުރާ ކަމަށް ވެސް އެ އޮފީހުން ބުނެފައިވެ އެވެ.
އެޗްޑީސީ އާއި ސީލައިފް ގްލޯބަލް އިންކް ޕްރައިވެޓް ލިމިޓެޑާ ދެމެދު ވެފައިވާ އެއްބަސްވުމެއްގެ ދަށުން ހުޅުމާލޭގައި 3000 ހައުސިން ޔުނިޓް އެޅުމަށް، ހަވާލުކޮށްފައި ވަނިކޮށް އެއްބަސްވުމުގައިވާ މުއްދަތުގައި ހައުސިން ޔުނިޓްތައް އެޅުމުގެ އަމަލީ މަސައްކަތް ފުރިހަމަނުކޮށް، މަކަރާއި ހީލަތުން އެކި މީހުން އަތުން ބޮޑެތި އަދަދުތަކުން ފައިސާ ނަގައި، އެ ފައިސާއަށް ހިޔާނާތްތެރިވެފައިވާ ކަަމުގެ ތުހުމަތު އަންމަޓީގެ މައްޗަށް ކުރެވެ އެވެ.
އެ މައްސަލާގައި އޭނާ އުޅުނީ ރާއްޖޭން ބޭރުގައި ފިލައިގެންނެވެ. އެ ތުހުމަތުގައި އޭނާ ހޯދުމަށް ރެޑް ނޯޓިސް ވެސް ނެރެފައިވަނިކޮށް އޭނާ ހައްޔަރުކުރީ ލަންކާގައި ފިލައިގެން އުޅެނިކޮށެވެ.
ލަންކާއިން އޭނާ ހައްޔަރުކޮށްގެން ގެނެސް ހިންގި ތަހުގީގު ނިންމައި، ފުލުހުން ޕްރޮސިކިއުޓާ ޖެނަރަލްގެ އޮފީހަށް ފޮނުވީ، އެނގިފައިވާ ގޮތުގައި މެއި 2021، ގަ އެވެ.
އަންމަޓީގެ މައްޗަށް އުފުލި ދައުވާތައް
ހިޔާނާތްތެރިވުމުގެ 12 ދައުވާއެއް އުފުލާފައިވަނީ ގާނޫނުލްއުގޫބާތުގެ 215 ވަނަ މާއްދާގެ (ހ) އާއި، އެ މާއްދާގެ (ށ) ގެ (2) ވަނަ ނަންބަރުގެ (i)އާ ހަވާލާދީ، އެ ގާނޫނުގެ 210 ވަނަ މާއްދާގެ (ށ)ގެ (3) ވަނަ ނަންބަރުގެ ދަށުންނެވެ.
ހިޔާނާތްތެރިވުމުގެ ކުށުގެ 25 ދައުވާއެއް އުފުލީ، ގާނޫނުލްއުގޫބާތުގެ 215 ވަނަ މާއްދާގެ (ހ) އާއި، އެ މާއްދާގެ (ށ) ގެ (2) ވަނަ ނަންބަރުގެ (i) އާ ހަވާލާދީ، އެ ގާނޫނުގެ 210 ވަނަ މާއްދާގެ (ށ) ގެ (2) ވަނަ ނަންބަރުގެ ދަށުންނެވެ.
ދެން އޮތް ހިޔާނާތްތެރިވުމުގެ ކުށުގެ ފަސް ދައުވާ އުފުލާފައިވަނީ ގާނޫނުލްއުގޫބާތުގެ 215 ވަނަ މާއްދާގެ (ހ) އާއި، އެ މާއްދާގެ (ށ) ގެ (2) ވަނަ ނަންބަރުގެ (i) އާ ހަވާލާދީ، އެ ގާނޫނުގެ 210 ވަނަ މާއްދާގެ (ށ) ގެ (1) ވަނަ ނަންބަރުގެ ދަށުންނެވެ.
މި ކުށްތަކަށް ގާނޫނުގައި ކަނޑައަޅާފައިވާ އަދަބަށް ބަލާއިރު، މި ދައުވާތައް ސާބިތުވެއްޖެނަމަ 65 އަހަރު ދުވަހުގެ ޖަލު އަދަބެއް ކަނޑައެޅޭނެ އެވެ. މިއީ އެކެއްގެ މައްޗަށް ހިޔާނާތުގެ މިހާ ގިނަ ދައުވާތަކެއް އެއް މައްސަލައެއްގައި އުފުލި ފުރަތަމަ ފަހަރެވެ.
