އިންތިހާބުތައް ތަރުތީބުކުރެވިފައިވާ ގޮތަށް ބަދަލު އައިސްދާނެ ކަމަކާ ގުޅޭ ގޮތުން ހިޔާލު ހޯދުމުގެ ވޯޓެއް ނަގަމުން އަންނައިރު، މި މުހިންމު ވޯޓުގައި ބައިވެރިވާން ރައްޔިތުންނަށް ބާރުއަޅަން އިލެކްޝަންސް ކޮމިޝަން (އީސީ) އިން އެކަށީގެންވާ މަސައްކަތެއް ނުކުރާތީ ކުރީގެ ރައީސް އަބްދުﷲ ޔާމީން އެ ކޮމިޝަނަށް މިއަދު ފާޑުވިދާޅުވެއްޖެ އެވެ.
ވޯޓު ލެއްވުމަށް ފަހު ޗެނަލް 13 އަށް ދެއްވި އިންޓަވިއުއެއްގައި މި ވޯޓަކީ މިއީ ރާއްޖޭގެ ސިޔާސީ ކުރިމަގު ބައްޓަން ވެގެން ދާނެ ވޯޓު ގޮތަށް ސިފަކުރައްވަމުން ޔާމީން ވިދާޅުވީ މި ވޯޓުގައި ރައްޔިތުން ބައިވެރިކުރަން ދައުލަތާއި އީސީން މަސައްކަތްކޮށްގެން މީހުން ނެރެން ޖެހޭ ކަމަށެވެ. ނަމަވެސް، ރައްޔިތުންނަށް އެދެވޭ ގޮތެއްގައި މި މައުލޫމާތު ފޯރުކޮށްދޭން އީސީން މަސައްކަތް ނުކުރާ ކަމަށެވެ.
އޭގެ އިތުރުން، ވޯޓަކީ ވީހާ ވެސް ގިނަ ބަޔަކަށް ބައިވެރިވެވޭ ގޮތަށް ކުރިއަށް ގެންދަން ޖެހޭ ކަމަކަށް ވީ ނަމަވެސް، ރާއްޖޭން ބޭރުގައި ދިރިއުޅޭ ބޮޑެތި އާބާދީތަކަށް ވޯޓުގައި ބައިވެރިނުވެވޭ މައްސަލަ ވެސް ޔާމީން ފާހަގަކުރެއްވި އެވެ. މީގެ މިސާލުތަކުގެ ގޮތުގައި މެލޭޝިއާ އާއި އިންޑިއާ އާއި ލަންކާ ނަންގަންނަވަމުން ޔާމީން ވިދާޅުވީ އެ ތަންތަނުގައި ދިރިއުޅޭ ދިވެހިން ވޯޓުގައި ބައިވެރިކުރަން "އެފަޓެއް" ލާން ޖެހޭނެ ކަމަށެވެ.
"އިލެކްޝަންސްގެ ބޭނުމަކަށް ވާނީ ގިނަ ރަައްޔިތުން، ނޫނީ ނުކުންނާން ތިބި ހުރިހާ ރައްޔިތުން މިކަމުގައި އެދެނީ ކިހިނެއްތޯ. އިލެކްޝަނުން ނެތް އެ މަސައްކަތްކޮށްފަ. އޭގެ ބަދަލުގައި ވަރަށް ކަން ފަސޭހަ ގޮތަކަށް ރީރަޖިސްޓްރީ ކުރުމުގެ އިންޓްރެސްޓެއް މީހުންގެ ނެތޭ. އެހެންވެ ތިމަންނަމެންގެ އިންޓްރެސްޓް ނެތިއްޔޭ" އެމަނިކުފާނު ވިދާޅުވި އެވެ.
"މީގަ ވަކިވަކި ފަރުދުންގެ އިންޓްރެސްޓަށް ވުރެ ބޮޑު ވާން ވާނީ ދައުލަތުގެ މުއައްސަސާތަކުގެ އިންޓްރެސްޓް"
ޔާމީން ވަނީ މިއީ އިހުތިޔާރީ ވޯޓަކަށް ނަހަދާ، ވީހާ ވެސް ގިނަ ރައްޔިތުންތަކެއް ނިކުމެ މި ވޯޓުގައި ބައިވެރިވާން ބާރުއަޅާފަ އެވެ.
މި ވޯޓަށް ހޭލުންތެރި ނުކުރާ މައްސަލައިގައި ޔާމީންގެ އިތުރުން ކުރީގެ ފަނޑިޔާރުންނާއި ގާނޫނީ ވަކީލުންނާއި މި ބަދަލާ ދެކޮޅު ސިޔާސީ ޕާޓީތަކުން ވަނީ ކަންބޮޑުވުން ފާޅުކޮށްފަ އެވެ. ނަމަވެސް އީސީން ވަނީ މި ތުހުމަތުތައް ދޮގުކޮށް، ހޭލުންތެރިކުރަން އެކަށީގެންވާ މަސައްކަތްތަކެއްކޮށްފައިވާ ކަމަށް ގަބޫލުކުރެވޭ ކަމަށް ބުނެފަ އެވެ.
