ފެންނަ ނުފެންނަ ވޯޓު (ރެފެރެންޑަމް) އާއި ލޯކަލް ކައުންސިލް އިންތިހާބުގެ ވޯޓު ނަގަން އަށް ގަޑިއިރަށް ވުރެ ކުޑަތަން ވެފައި ވަނިކޮށް، 11 ގަޑިއިރުގެ ތެރޭގައި ވަޒީފާތަކަށް ކުރިމަތިލުމުގެ ސުންގަޑި ހަމަވާ ގޮތަށް އެމްޓީސީސީން 48 ވަޒީފާއަށް ކުރިމަތިލާން ހުޅުވާލި މައްސަލައެއް ފެންމަތިވެއްޖެ އެވެ.
އެމްޓީސީސީން ވަކިވަކިން ރޭ 23:45 ގެ ފަހުން ކުރި އިއުލާންތަކުގައި ވަނީ، ވލާންކުރި ވަޒީފާތަކަށް ޝައުގުވެރިވާ ހުރިހާ އެންމެން އެ ކުންފުނީގެ ޖޮބް އެޕްލިކޭޝަން ޕޯޓަލް މެދުވެރިކޮށް މިއަދު 11:00 ޖެހުމުގެ ކުރިން އެޕްލިކޭޝަން ހުށަހަޅަންޖެހޭނެ ކަމަށެވެ.
މި ވަޒީފާތަކަށް ޝޯޓްލިސްޓު ކުރެވޭ މީހުންނާ އިންޓަވިއު ކުރާނީ އެޕްރީލް 5، އިން ފެށިގެން އެޕްރީލް 30، އާ ދެމެދު ކަމަށް އެމްޓީސީސީން ބުންޏެވެ.
އެމްޓީސީސިން އިއުލާންކުރި ގިނަ ވަޒީފާތައް ހުރީ ކޮންސްޓްރަކްޝަން އެންޑް ޑްރެޖިން ޑިވިޝަނުންނެވެ. އެއީ އެ ކުންފުނިން ކަނޑައަޅާ ސައިޓެއްގައި މަސައްކަތް ކުރާ ގޮތަށެވެ.
އެމްޓީސީސީން ރޭ އިއުލާންކުރި ވަޒީފާތައް:
- ކޮންސްޓްރަކްޝަން އެންޑް ޑްރެޖިން ޑިވިޝަން - 44 މުވައްޒަފުން
- ޓްރާންސްޕޯޓް ސާވިސް ޑިވިޝަން - ނ. ހޮޅުދޫ - އެންމެ މުވައްޒަފެއް
- ޕްރޮކިއުމަންޓް ޑިވިޝަން - އެންމެ މުވައްޒަފެއް
- ކޯޕަރޭޓް ބިއުރޯ އެންޑް އެޑްމިނިސްޓްރޭޝަން ޑިވިޝަން - އެންމެ މުވައްޒަފެއް
ކޮންސްޓްރަކްޝަން އެންޑް ޑްރެޖިން ޑިވިޝަނަށް ނަގާ 31 މުވައްޒަފުންގެ ޝަރުތަކީ އަސާސީ ތައުލީމު ނިންމާފައިވުމެވެ. އޭގެ ތެރެއިން 30 މުވައްޒަފުންނަށް މުސާރައާއި އިނާޔަތް ގޮތުގައި 10،000ރ. ކަނޑައަޅާފައިވާއިރު، އެއް މުވައްޒަފުގެ މުސާރައާއި އިނާޔަތަކީ 15،400ރ. އެވެ.
ކޮންސްޓްރަކްޝަން އެންޑް ޑްރެޖިން ޑިވިޝަނަށް ނެގި ބައެއް މުވައްޒަފުންގެ ތަޖުރިބާއަށް ބަލައި 10،000ރ. އާއި 13،300ރ. އާ ދެމެދުގެ އަދަދެއްގެ މުސާރައެއް ދިނުމަށް ވަނީ ކަނޑައަޅާފަ އެވެ.
ޓްރާންސްޕޯޓް ސާވިސް ޑިވިޝަނަށް ނަގާ މުވައްޒަފުގެ އަސާސީ އަސާސީ ތައުލީމީ ފެންވަރު އަދި ކަސްޓަމަރުންނަށް އިހުތިރާމާއިއެކު މުއާމަލާތު ކުރުމުގެ ހުނަރު ލިބިފައިވުން ހިމަނާފައިވާއިރު، މުސާރަ އާއި އިނާޔަތަށް ކަނޑައަޅާފައިވަނީ 10،000ރ. އެވެ.
ކޯޕަރޭޓް ބިއުރޯ އެންޑް އެޑްމިނިސްޓްރޭޝަން ޑިވިޝަނަށް ނަގާ މުވައްޒަފުގެ ޝަރުތަކީ އަސާސީ ތައުލީމް ކަމަށްވާއިރު، މުސާރައާއި އިނާޔަތަށް ހަމަޖެހިފައިވަނީ 11،400ރ. އެވެ.
ޕްރޮކިއުމަންޓް ޑިވިޝަނަށް ނަގާ މުވައްޒަފުގެ ޝަރުތަކަށް އޯލެވެލް ތިން މާއްދާއިން ފާސްވުން ނުވަތަ ލެވެލް 3 ގެ ސަނަދެއް ހާސިލުކޮށްފައިވުން ވަނީ ކަނޑައަޅާފަ އެވެ. އެ މުވައްޒަފުގެ މުސާރަ އާއި އިނާޔަތަށް ކަނޑައަޅާފައިވަނީ 15،400ރ. އެވެ.
މިއަދު ކުރިއަށްދާ ފެންނަ ނުފެންނަ ވޯޓާއި ކައުންސިލް އިންތިހާބާ ދިމާކޮށް ސަރުކާރުގެ ކުންފުނިތަކުން ގިނަ އަދަދެއްގެ ވަޒީފާއަށް ކުރިމަތިލާން ހުޅުވާލި އެވެ. ބައެއް ކުންފުނިތަކަށް މުވައްޒަފުން ނެގީ އިއުލާން ވެސް ނުކޮށެވެ.
މި ކަންބޮޑުވުންތައް ހުރި ނަމަވެސް ކޮރަޕްޝަން ހުއްޓުވުމުގެ ޒިންމާ މަތިކުރެވިފައިވާ އެންޓި ކޮޮރަޕްޝަން ކޮމިޝަން (އޭސީސީ) އިން އެއްވެސް އެއްޗެއް ނުބުނެ އެވެ. ނަމަަވެސް، އިންތިހާބުގެ ތެރޭގައި ކޮރަޕްޝަނެއް ނުހިނގާކަން ކަށަވަރުކުރުމުގެ ޒިންމާ މަތިކޮށްފައިވާ އިލެކްޝަންސް ކޮމިޝަން (އީސީ) އިން ވަނީ މީގެ ތިން މައްސަލައެއް އޭސީސީއަށް ހުށަހަޅާފައިވާ ކަމަށް ބުނެފަ އެވެ.
