ރިޔާސީ އިންތިހާބާއި މަޖިލިސް އިންތިހާބު އެއްކޮށްލުމަށް އާންމުންގެ މެދުގައި ނަގާ ފެންނަ ނުފެންނަ ވޯޓު (ރެފެރެންޑަމް) އާއި ލޯކަލް ކައުންސިލް އިންތިހާބު އަދި އަންހެނުންގެ ތަރައްގީއަށް މަސައްކަތްކުރާ ކޮމިޓީ (ޑަބްލިއުޑީސީ) އިންތިހާބުގެ ވޯޓުލީ މާލޭ ހެންވޭރު ހުޅަނގުގެ ވޯޓު ފޮށްޓެއްގެ މައްސަލަ ހޫނުވެ، ވޯޓު ގުނުން ހުއްޓުވައިފި އެވެ.
އިލެކްޝަންސް ކޮމިޝަނުގެ ނައިބުރައީސް އަބްދުއްރަހްމާން ސޮލާހް ރަޝީދު އަދަދު އަށް ވިދާޅުވީ ހެންވޭރު ހުޅަނގުގައި މައްސަލަ ބޮޑުވެގެން އުޅެނީ ވޯޓު ފޮށްޓައް ލީ ވޯޓު ކަރުދާހެއްގެ ބާތިލު ކަމަށް ނިންމުމާ ގުޅިގެން އެކަމާ ހިޔާލު ތަފާތުވެގެން ކަމަށެވެ.
ސޯޝަލް މީޑިއާގައި ދައުރުވާ ވީޑިއޯތަކުން ފެންނަ ގޮތުގައި އެތަނުގައި ތިބި އޮބްޒާވަރު ބުނަމުންދަނީ މައްސަލަ ހައްލުނުވަނީސް އެ ވޯޓު ފޮށި އިތުރަށް ނުގުނޭނެ ކަމަށެވެ.
މިކަމާ ގުޅިގެން އިލެކްޝަންސް ކޮމިޝަނުގެ އިތުރު އޮފިޝަލުން އަންނަނީ އެ ސަރަހައްދަށް ގޮސް، އޮބްޒާވަރުންނާ މަޝްވަރާކޮށް މައްސަލަ ހައްލުކުރުމަށް މަސައްކަތް ކުރަމުންނެވެ.
މިއަދު ކުރިއަށް ގެންދިޔަ ތިން އިންތިހާބުގެ ވޯޓު ގުނަން މިހާރު ވަނީ ފަށާފަ އެވެ. އިންތިހާބުގައި ޖުމްލަ 70 ޕަސަންޓަށްވުރެ ގިނަ މީހުން ވޯޓުލި ކަމަށް އިލެކްޝަންސް ކޮމިޝަނުން ބުންޏެވެ.
ލޯކަލް ކައުންސިލް އިންތިހާބާއި އަންހެނުންގެ ތަރައްގީއަށް މަސައްކަތް ކުރާ ކޮމިޓީގެ އިންތިހާބުގައި ޖުމްލަ 1592 ކެންޑިޑޭޓުން ވާދަ ކުރެ އެވެ. އިންތިހާބާއި ފެންނަ ނުފެންނަ ވޯޓުގައި ވޯޓުލުމުގެ ހައްގު 294،937 މީހުންނަށް ލިބުނެވެ.
