ވޯޓުލާންދާ ހުރިހާ އެންމެން ވެސް މިއަދު ކުރިއަށްދާ ދެ އިންތިހާބާއި ރައްޔިތުންގެ ހިޔާލު ހޯދުމުގެ އާންމު ވޯޓުގެ ކަރުދާސްކޮޅުތައް ނެގުމަށް ޓްރާންސްޕޭރެންސީ މޯލްޑިވްސްއިން އިލްތިމާސްކޮށްފި އެވެ.
ޓްރާންސްޕޭރެންސީން ދާދި ދެންމެއަކު ނެރުނު ނޫސްބަޔާނެއްގައި ބުނީ، މިއަދުގެ ވޯޓުލުމުގެ ކަންކަން އެ ޖަމިއްޔާއިން ވަރަށް ގާތުން ބަލަމުންދާ ކަމަށެވެ. އެގޮތުން މާލޭގެ އިތުރުން، 15 އަތޮޅެއްގައި އެ ޖަމިއްޔާގެ މޮނީޓަރުން ހަރަކާތްތެރިވަމުންދާ ކަމަށް އެ ޖަމިއްޔާއިން ބުންޏެވެ.
ޓްރާންސްޕޭރެންސީން ބުނީ ވޯޓުލާންދާ މީހަކު ދެ އިންތިހާބާއި ފެންނަ ނުފެންނަ ވޯޓުގެ ތެރެއިން އެއް ވޯޓު ނުލާން ބޭނުންވާ ހާލަތުގައި އެމީހެއްގެ މައުލޫމާތު އާންމު ކުރަން ރޭ އިލެކްޝަންސް ކޮމިޝަނުން ނިންމި ނިންމުމަކީ ވޯޓުގެ ސިއްރުކަން ގެއްލޭނެ ކަމެއް ކަމަށެވެ.
އެ ނިންމުމަކީ ކުރިއާލައި ރައްޔިތުންނަށާއި އިންތިހާބުގެ މަސްލަހަތުވެރިންނަށާއި އިންތިހާބު ރާވައި ހިންގުމުގެ މަސްއޫލިއްޔަތު އަދާކުރާ އޮފިޝަލުންނަށް ތަމްރީނުތަކުގައި ކިޔާދެވިފައި ނުވާ ކަމެއް ކަމަށް އެ ބަޔާނުގައި ބުންޏެވެ.
އެ ނިންމުމުގެ ސަބަބުން އެކި ވޯޓުލާ މަރުކަޒުތަކުގެ އިދާރީ ރޭވުންތަކާއި ވޯޓުގެ އިޖުރާއަތުގައި ތަފާތުތަކެއް ހުރެ އޮޅުންއެރުމުގެ ފުރުސަތު ބޮޑުވެ ރައްޔިތުންގެ ވޯޓުގެ ސިއްރުކަން ގެއްލުމަކީ ޓްރާންސްޕޭރެންސީން ނުހަނު ކަންބޮޑުވާ ކަމެއް ކަމަށް ވެސް ޓްރާންސްޕޭރެންސީގެ ބަޔާނުގައި ބުންޏެވެ.
"ޓްރާންސްޕޭރެންސީ މޯލްޑިވްސް ބާރުއަޅަނީ ވޯޓުލާން ދާ ފަރާތްތަކުން ހުރިހާ ވޯޓު ކަރުދާހެއް ހޯދުމަށް އެދި، އެ ފަރާތްތަކުގެ ވޯޓުލާން ބޭނުންވާ ގޮތް ވޯޓުލާ ބޫތުގައި އިހުތިޔާރު ކުރުމަށެވެ. ވޯޓުގެ ސިއްރުކަން ކަށަވަރު ކުރުމަށްޓަކައި ވޯޓުލާ މީހަކު ވޯޓުލުމަށް ނުވަތަ ނުލާން ނިންމާ ނިންމުމެއް، ވޯޓުލާ އޮފިޝަލުންނަށް އަންގާ އޮބްޒާވަރުންނަށް އިއުލާނުކުރާކަށް ނުޖެހޭނެކަން ފާހަގަ ކުރަން،" ޓްރާންސްޕޭރެންސީގެ ބަޔާނުގައި ބުންޏެވެ.
ވޯޓުލުމުގެ ހައްގު ލިބިފައިވާ ވީހާ ވެސް ގިނަ މީހުން ނުކުމެ، ވޯޓުލުމުގެ ހައްގު އަދާކުރުމަށް ޓްރާންސްޕޭރެންސީން ވަނީ އިލްތިމާސްކޮށްފަ އެވެ. މިއަދުގެ ވޯޓުލުމަށްފަހު ވެސް ސުލްހަވެރިކަމާއެކު ހަމަޖެހުން ގާއިމުކުރެވިފައި އޮތްކަން ކަށަވަރު ކުރުަމަށް ކަމާބެހޭ އިދާރާތަކަށް ޓްރާންސްޕޭރެންސީން އިލްތިމާސްކުރި އެވެ.
