އޭޕްރިލް 18، ވަނަ ދުވަހުގެ ރޭ ހ. ފެންޓެނޯއީ ގޭގެ ނުވަވަނަ ފަންގިފިލާއިން ހައްވާ ޔުމްނު ރަޝީދު، 21، ވެއްޓުނު ހާދިސާގެ ތަހުގީގަށް ހައްޔަރުކޮށްފައި ހުރި ރައުދު އަހުމަދު ޒިލާލް، 22، ބަންދުގައި ބެހެއްޓުމަށް ކްރިމިނަލް ކޯޓުން ކުރި އަމުރުތަކުގައި އިޖުރާއީ މައްސަލަތަކެއް އުޅޭ ކަމަށް ބުނެ އެނާ ދޫކޮށްލުމުގެ ބާރު ފުލުހުންނަށް ލިބިގެން ނުވާ ކަމަށް އެ ކޯޓުން ބުނެފި އެވެ.
އަދަދު އަށް އެނގިފައި ވާގޮތުގައި ކްރިމިނަލް ކޯޓުން އެހެން ބުނީ ދެވަނަ ފަހަރަށް ރައުދު ހައްޔަރުކޮށް ބަންދުގެ މުއްދަތު ޖެހުމަށް މިދިޔަ ހުކުރު ދުވަހު ކޯޓަށް ހާޒިރު ކުރުމުން ބޭއްވި މަޖިލީހުގަ އެވެ.
ރައުދު ބަންދުގައި ބަހައްޓަން އަމުރެއް އޮއްވައި އޭނާ ދޫކޮށްލި ސަބަބު ސާފުކޮށްދިނުމަށް ދިފާއުން އެދުމުން ހުކުރު ދުވަހު ބޭއްވި މަޖިލީހުގައި ފުލުހުން ބުނެފައި ވަނީ އޭނާ ދޫކޮށްލީ ރައުދު ބަންދުގައި ބެހެއްޓުމަށް ކްރިިމިނަލް ކޯޓުން ކުރި އަމުރުތަކުގައި އިޖުރާއީ މައްސަލަތަކެއް ހުރި ކަމަށް އެ މުއައްސަސާއަށް ގަބޫލު ކުރެވޭތީ ކަމަށެވެ.
ނަމަވެސް މުއްދަތު މަޖިލިސް އިންސާފުވެރި ކުރެއްވި ކްރިމިނަލް ކޯޓުގެ ފަނޑިޔާރު އެ މަޖިލީހުގައި ވިދާޅުވީ ކްރިމިނަލް ކޯޓުގެ އަމުރެއްގައި އިޖުރާއީ މައްސަލައެއް އޮތް ކަމަށް ކަނޑައެޅުމުގެ ބާރު ދިވެހި ފުލުހުންނަށް ލިބިގެން ނުވާ ކަމަށެވެ. އަދި އެ ކޯޓުގެ އަމުރެއްގައި އިޖުރާއީ މައްސަލައެއް އޮތް ކަމަށް ކަނޑައެޅުމުގެ ބާރު ލިބިގެން ވަނީ ދިވެހިރާއްޖޭގެ ހައި ކޯޓަށާއި ސުޕްރީމް ކޯޓަށް ކަމަށް ފަނޑިޔާރު ވިދާޅުވި އެވެ.
ޔުމްނު ވެއްޓުނު ހާދިސާގެ ތަހުގީގަށް ހައްޔަރު ކޮށްފައި ހުރި ރައުދު ފުލުހުން ބަންދުން މެއި 22، ގައި ދޫކޮށްލީ 20 ދުވަހު އެނާ ބަންދުގައި ބެހެއްޓުމަށް ކްރިމިނަލް ކޯޓުން މެއި 15، ގައި އަމުރު ކޮށްފައި ވަނިކޮށެވެ.
ފުލުހުންގެ ބަންދުން ރައުދު ދޫކޮށްލިއިރު، އޭނާ ބަންދުގައި ބަހައްޓަން މެއި 10، ގައި ކްރިމިނަލް ކޯޓުން ނެރުނު އަމުރު ހައި ކޯޓުގައި އިސްތިއުނާފު ކުރި މައްސަލަ އެ ދުވަހުގެ މެންދުރުފަހު 1:00 އަށް އޮތީ ތާވަލުކޮށްފަ އެވެ.
ނަމަވެސް ހަމަ އެ ދުވަހުގެ ހަވީރު ފުލުހުން ވަނީ އާ ކޯޓު އަމުރެއްގެ ދަށުން ރައުދު އަނެއްކާ ވެސް ހައްޔަރު ކޮށްފަ އެވެ. ޖެހިގެން އައި ހުކުރު ދުވަހު ކްރިމިނަލް ކޯޓުން ވަނީ އޭނާ ފަސް ދުވަހު ބަންދުގައި ބެހެއްޓުމަށް އަމުރު ކޮށްފަ އެވެ.
ބަންދުގެ މައްސަލަ އިސްތިއުނާފު ކުރި ސަބަބު
ރައުދު ބަންދުގައި ބަހައްޓަން މެއި 10، ގައި ކްރިމިނަލް ކޯޓުން ކުރި އަމުރު ހައި ކޯޓުގައި އިސްތިއުނާފު ކުރީ ބަންދުގެ މުއްދަތު އެ ކޯޓުން ޖެހީ ގާނޫނާ ހިލާފަށް ކަމަށް ބުނެ އެވެ.
އެ ދުވަހު މުއްދަތުގެ މަޖިލީހަށް ރައުދު ހާޒިރު ކުރުމުން ފުލުހުން އެންމެ ފުރަތަމަ ކޯޓުގައި އެދުނީ ޖިނާއީ އިޖުރާއަތުގެ ގާނޫނުގެ 60 ވަނަ މާއްދާގެ ބ. އަށް ރިއާޔަތްކޮށް އޭނާގެ ބަންދުގެ މުއްދަތު އިތުރު ކޮށްދިނުމަށެވެ.
އެ އަކުރުގައި ބަޔާން ކޮށްފައި އޮންނަނީ ކުށެއްގެ ތުހުމަތުގައި ބަންދުކޮށްފައިވާ މީހާ ބަންދުކޮށްފައި ވަނީ ގާނޫނާ އެއްގޮތްވާ ގޮތުގެ މަތިން ނުވަތަ ނޫންކަން ކަނޑައެޅުމުގައި އެ ކުށް ކުރިކަމަށް ތުހުމަތު ކުރެވޭ މިންވަރަށް އެކަށީގެންވާ ހެކި އެ ވަގުތު ނެތްކަމުގައި ވާނަމަ އެ މާއްދާގެ ށ. ގައި ބަޔާންކުރާ ސަބަބުތަކުގެ ތެރެއިން ސަބަބެއް އޮވެފައި ތުހުމަތު ކުރެވޭ މީހާގެ މައްޗަށް ކޮންމެވެސް ވަރެއްގެ ހެކި ހުރެއްޖެ ނަަމަ އަމަލު ކުރެވިދާނެ ގޮތެވެ.
titledesc
ނަމަވެސް ރައުދު ފުރަތަމަ ހައްޔަރު ކުރީ ވެެސް ޔުމްނު ވެއްޓުނު ހާދިސާގައި އޭނާގެ ބައިވެރިވުމެއް އޮތް ކަމަށް ތުހުމަތުކޮށް ހާދިސާ ހިނގިތާ ހަ ދުވަސްފަހުން ކަމަށްވެފައި، ފުލުހުން އޭރު ވެސް ކުރި ތުހުމަތުތަކާ ގުޅިގެން ހެކި ހުށަހަޅާފައި ހުރުމުން، އެ އަކުރުގެ ދަށުން އޭނާ ބަންދުގައި ނުބެހެއްޓޭނެ ކަމަށް ދިފާއީ ވަކީލުންގެ ފަރާތުން ވަކާލާތު ކުރުމުން ދެން ފުލުހުން އެދުނީ އެ މާއްދާގެ ޅ. ގެ ދަށުން ބަންދުކޮށްދިނުމަށެވެ.
އެ އަކުރުގައި ބަޔާން ކޮށްފައި އޮންނަނީ ބަންދުކުރެވޭ މީހާގެ މައްޗަށް ތުހުމަތުކުރެވޭ ކުށަކީ ޖިނާއީ ބޮޑު ކުށެއް ކަމަށް ވާނަމަ އަމަލު ކުރެވޭނެ ގޮތެވެ. އެހެންކަމުން ދިފާއުން ވަކާލާތު ކުރީ އެ މާއްދާގެ ދަށުން ވެސް އޭނާ ބަންދުގައި ނުބެހެއްޓޭނެ ކަމަށެވެ.
އެއަށްފަހު ޝަރީއަތުގެ މަޖިލިސް މެދުކަނޑާލުމަށް ފަހު އަލުން ފެށުމަށް ފަހު ގާޒީ އަމިއްލައަށް ނިންމެވީ ރައުދު ދޫކޮށްލާފައި ހުރުމަކީ މުޖުތަމައުގެ ކަންކަން ހުރި ގޮތުން އެންމެ ރަނގަޅު ކަމަކަށް ނުވެދާނެތީ ޖިނާއީ އިޖުރާއަތުގެ ގާނޫނުގެ 60 ވަނަ މާއްދާގެ ށ. ގެ ދަށުން އޭނާގެ ބަންދު ފަސް ދުވަހަށް އިތުރު ކުރުމަށެވެ. އެގޮތަށް ނިންމީ ގާޒީ އަމިއްލަ އަށެވެ.
ޖިނާއީ އިޖުރާއަތުގެ ގާނޫނުގެ ހަ ވަނަ ބާބުގެ ދަށުން 60 ވަނަ މާއްދާގެ ށ. ގައި އޮންނަނީ ވަކި ހާލަތްތަކެއްގައި ޝަރީއަތް ނިމެންދެން ބަންދު ކުރަންވާނެ ކަމަށެވެ.
އެ މައްސަލަ ހައި ކޯޓުގައި އިސްތިއުނާފު ކުރީ، ށ. ގައި ބަޔާން ކޮށްފައިވާ ސަބަބުތަކުގެ ތެރެއިން ސަބަބެއް އޮތް ކަމަށް ގަބޫލު ކުރެވޭނަމަ އެ މީހަކު ޝަރީއަތް ނިމެންދެން ބަންދު ކުރަންވާނެ ކަމަށް އެ އަކުރުގައި ސާފުކޮށް ބަޔާން ކޮށްފައި އޮއްވައި އެ އަކުރާ ހަވާލާދީ ފަސް ދުވަހަށް ރައުދު ބަންދު ކުރަން ކްރިމިނަލް ކޯޓުން އަމުރު ކުރުމުންނެވެ.
އިތުރު ހެއްކެއް ނެތި ބަންދުގައި 32 ދުވަސް
މިދިޔަ މަހުގެ 24، ގައި ހައްޔަރުކުރި ރައުދު ފުލުހުންގެ ބަންދުގައި ހުންނަތާ މިއަދަށް ވަނީ 32 ދުވަސްވެފަ އެވެ. އެހާގިނަ ދުވަހު އޭނާ ބަންދުގައި ހުންނާތީ ކްރިމިނަލް ކޯޓުން ވެސް ކަންބޮޑުވުން ފާޅުކޮށްފައިވާކަން އަދަދު އަށް އެނގިފައިވެ އެވެ.
އެގޮތުން ހުކުރު ދުވަހު ބޭއްވި މުއްދަތު މަޖިލީހުގައި ކްރިމިނަލް ކޯޓުގެ ފަނޑިޔާރު ވިދާޅުވީ ރައުދުގެ މައްޗަށް ފުލުހުން ކުރާ ތުހުމަތުތައް ބަޔާންކުރާ މާއްދާތަކަށް ބަލާއިރު، ދިގު މުއްދަތަކަށް އޭނާ ބަންދުގައި ބަހައްޓައިފި ނަމަ ރައުދުގެ މައްޗަށް ކުށް ސާބިތުވާ ހާލަތުގައި އަދަބުގެ މުއްދަތު، ބަންދުގެ މުއްދަތަށްވުރެ މަދުވެދާނެ ކަމުގެ ފުރުސަތު ބޮޑު ކަމަށެވެ.
ރައުދުގެ މައްޗަށް ހެކީގެ ގޮތުގައި ފުލުހުން ހުށަހަޅާފައި ވަނީ ފުލުހުންނާއި ހެކިންގެ ބަޔާނުގެ އިތުރުން ފޮޓޯ ރިޕޯޓާއި ސީން އޮފް ކްރައިމްސް އޮފިސާސް ރިޕޯޓު އަދި އިތުރު ބައެއް ހެކި ގަރީނާ އެވެ.
ކްރިމިނަލް ކޯޓުން ބުނެފައި ވަނީ އެ ހެކި ގަރީނާތަކަށް ބެލުމުން، އެހީއަށް ބޭނުންވެފައިވާ މީހަކަށް ރައުދު އެހީތެރިކަން ފޯރުކޮށްދީފައި ނުވުމާއި މަސްތުގެ ހާލުގައި އޭނާ ހުރިކަން އެނގޭ ކަމަށެވެ.
އެ ދުވަހު ފުލުހުން ބުނެފައި ވަނީ ރައުދުގެ މައްސަލަ ވަރަށް އަވަހަށް ޕީޖީއަށް ފޮނުވޭނެ ކަމަށެވެ. އޭނާގެ ބަންދަށް ކޯޓުން ފަސް ދުވަސް އިތުރު ކުރީ އެ ސަބަބާހުރެ އެވެ.
