އޭޕްރީލް 18، ގައި މާލޭގެ އުސް އިމާރާތަކުން ފުރާޅެއްގެ މައްޗަށް ވެއްޓިފައި އޮއްވައި ފެނުނު ހައްވާ ޔުމްނު ރަޝީދުގެ މައްސަލައިގައި ހައްޔަރު ކުރި ރައުދު އަހުމަދު ޒިލާލް ބަންދުން ދޫކޮށްލައިފި އެވެ.

ރައުދު، 21، ދޫކޮށްލީ ފުލުހުން އަމިއްލައަށް މިއަދު ހެނދުނުގެ ވަގުތެއްގަ އެވެ. ރައުދު ބަންދުން ދޫކޮށްލި އިރު، އޭނާ ބަންދު ކުރަން ދަށު ކޯޓުން ނެރުނު އަމުރު އިސްތިއުފާނު ކުރުމުން މިއަދަށް އޮތީ ހައި ކޯޓުގައި އަޑުއެހުމެއް ތާވަލުކޮށްފަ އެވެ.

ރައުދު ހައްޔަރު ކޮށްފައި ވަނީ ޔުމްނު ވެއްޓުނުތާ ހަ ދުވަސް ފަހުން އޭޕްރީލް 24، ގަ އެވެ. އެކަމަކު، ރައުދު ހައްޔަރު ކުރުމުގެ އަމުރެއް އޭގެ ކުރިން ހަމަ ޔުމްނު ވެއްޓުނު ދުވަހު ވެސް ދަށު ކޯޓުން ނެރުނެވެ. ނަމަވެސް އެ އަމުރު ފުލުހުން ތަންފީޒެއް ނުކުރެ އެވެ.

ޔުމްނު ވެއްޓިފައި އޮއްވައި ފެނުނު މައްސަލައިގައި ފުލުހުން ފުރަތަމަ ބުނީ، ޔުމްނު ވެއްޓުމުގައި އެހެން އެއްވެސް މީހެއްގެ ބައިވެރިވުމެއް އޮތް ކަމަށް ނުބެލެވޭ ކަމަށެވެ. އެކަމަކު ރައުދު ހައްޔަރު ކުރުމަށްފަހު ފުލުހުން ބުނީ ޔުމްނު ވައްޓާލުމުގައި ރައުދުގެ ބައިވެރިވުމެއް އޮތް ކަމަށް ތުހުމަތު ކުރެވޭ ކަމަށެވެ. އަދި ޔުމްނު ވެއްޓުނުކަން ރައުދަށް އެނގޭ ކަމަށް ވެސް ފުލުހުން ތުހުމަތު ކުރި އެވެ.

ފުރަތަމައިނުން ރައުދު ހައްޔަރު ނުކުރި ނަމަވެސް ޕޮލިސް ސްޓޭޝަނަށް ގެންގޮސް އޭނާއާ ވަނީ ސުވާލުކޮށްފަ އެވެ. އޭނާގެ ކުޑަކަމުދާތަކެތި ޓެސްޓު ކުރުމުން މަސްތުވާތަކެއްޗަށް އެއިރު ޕޮޒިޓިވް ވެފައިވެ އެވެ. އެކަމަކު، އެވަރުން ވެސް ފުލުހުން އޭނާ ހައްޔަރެއް ނުކުރި އެވެ.

ރައުދު ހައްޔަރު ކުރީ ޔުމްނުގެ މައްސަލައިގައި ފުލުހުން ހިންގަމުން އަންނަ ތަހުގީގަށް ވަރަށް ބޮޑަށް ފާޑުކިޔުން އަމާޒުވާން ފެށުމުންނެވެ. އެ މައްސަލައިގައި ފުލުހުން ހަދާފައި ހުރި ވަރަށް ބޮޑެތި ގޯސްތަކެއް ވެސް ވަނީ ފެންމަތިވެފަ އެވެ.

ފުލުހުން ހެދި ގޯސްތަކުގެ ތެރޭގައި، ޔުމްނު ވެއްޓުނު ހ. ފެންޓެނޯއީ ގޭގެ ބައެއް ފަންގިފިލާތަކުގައި ކެމެރާ ހުރި އިރު ވެސް ކެމެރާ ނެތް ކަމަށް ބުނެ ދޮގު ހެދުން ހިމެނެ އެވެ. އަދި ޔުމްނު ވެއްޓުނު ހާދިސާއާ ގުޅޭ ތަންތަން ބަލައި ފާސް ކުރަން ފުލުހުން ވަނީ ފަސްޖެހިފަ އެވެ. އޭގެ ތެރޭގައި ޔުމްނު އާއި އޭނާއާއެކު އުޅުނު ބަޔަކު ދިޔަ މިނިސްޓަރު މުހައްމަދު އަމީން ދިރިއުޅޭ ގެ އާއި އެ މައްސަލައިގައި ހިމެނޭ އިތުރު މީހެއްގެ ގެ ހިމެނެ އެވެ.

އެތަންތަން ބަލައި ފާސް ކުރުމަށް ފުލުހުން ދިޔައީ ހަ ދުވަސް ފަހުންނެވެ. ބަލައި ފާސް ކުރުމަށްފަހު ފުލުހުން ބުނީ މައްސަލައާ ގުޅޭ އެއްވެސް އެއްޗެއް އެ ދެ ގެއިން ފެނިފައިނުވާ ކަމަށެވެ. އަދި މިނިސްޓަރު އަމީން ދިރިއުޅޭ ގޭގެ ވީޑިއޯ ފުޓޭޖް ހަލާކުވެފައިވާތީ، ލިބިފައިނުވާ ކަމަށް ފުލުހުން ވަނީ ބުނެފަ އެވެ.

ޔުމްނު ވެއްޓުނު ހާދިސާ ތަހުގީގު ކުރުމަށް ރައީސް މުހައްމަދު މުއިއްޒު ވަނީ ރިޔާސީ ކޮމިޝަނެއް އުފައްދައިފަ އެވެ. އެ ކޮމިޝަނުގެ މައިގަނޑު ބޭނުމަކީ ޔުމްނު ވެއްޓުނު ހާދިސާގެ ހަގީގަތް ހޯދުމެވެ. އެ ކޮމިޝަން އުފެއްދީ އޭޕްރީލް 26، ގަ އެވެ.