ވިލިމާލެއިން ގިރިލަންކަންފުއްޓަށް ދަތުރުކުރި "ޓުއާ ގާޑް" ނަމަކަށް ކިޔާ ލޯންޗެއް އެކްސިޑެންޓުވެ އޭގެއިން ދަތުރުކުރި ދެ މީހުންނަށް ލިބުނު އަނިޔާތަކަށް އައިޖީއެމްއެޗް ހޮސްޕިޓަލުގައި ފަރުވާދޭން ފަށައިފި އެވެ.
އެމްއެންޑީއެފް އިން ބުނީ ލޯންޗުން ދަތުރުކުރި ދެ ފަޅުވެރިން އައިޖީއެމްއެޗް ހޮސްޕިޓަލަށް ގެންދިޔައީ ބޮޑެތި ހާނިކަތަކެއް ލިބިގެން ކަމަށެވެ.
މިކަމާ ގުޅިގެން އައިޖީއެމްއެޗްގެ މީޑިއާ އޮފިޝަލް އިން އަދަދު އަށް ވިދާޅުވީ އަނިޔާވި ދެ މީހުންނަށް އެމަޖެންސީގައި ފަރުވާ ދެމުންދާ ކަމަށެވެ. އިތުރު މައުލޫމާތެއް އޭނާ ނުދެއްވަ އެވެ.
މި ހާދިސާގައި އަނިޔާވީ އުމުރުން 38 އަހަރުގެ ދިވެހި ފިރިހެނަކާއި 30 އަހަރުގެ ބިދޭސީއަކަށެވެ.
ލޯންޗު އެކްސިޑެންޓުވިކަމުގެ މައުލޫމާތު ލިބުނީ ވިލިމާލެއާ ވަރަށް ކައިރީގައި އޮއްވާ ކަމަށާއި ލޯންޗު އެކްސިޑެންޓުވީ ގޮތް ފުލުހުން ތަހުގީގު ކުރަމުންދާ ކަމަށް އެމްއެންޑީއެފް އިން ބުންޏެވެ.
ސޯޝަލް މީޑިއާގައި ދައުރުވަމުންދާ ފޮޓޯތަކުންނާއި ވީޑިއޯތަކުން ފެންނަ ގޮތުގައި ލޯންޗަށް ވަނީ ބޮޑެތި ގެއްލުންތަކެއް ލިބިފަ އެވެ.
