ފުލުހުންގެ އިދާރީ ހިންގުން ހަރުދަނާކޮށް، މަސައްކަތުގެ ފެންވަރު މަތިކުރުމަށްޓަކައި އޮނިގަނޑަށް ބަދަލުތަކެއް ގެނެސްފައިވާ ކަމަށް އެ އިދާރާއިން ހާމަކޮށްފި އެވެ.
މި ބަދަލުތައް ގެނެސްފައިވަނީ އިއްޔެއިން ފެށިގެންނެވެ. މި ބަދަލުތަކާ ގުޅިގެން، އައު އޮނިގަނޑާ އެއްގޮތަށް މަގާމުތަކަށް އޮފިސަރުން އައްޔަންކުރުމުގެ މަސައްކަތް މިހާރު ވަނީ ފަށާފަ އެވެ.
އައު އޮނިގަނޑުގައި ކޮމާންޑް ލެވެލްގައި ހިމެނޭ މައިގަނޑު ބައިތަކުގެ ތެރޭގައި ކޮމިޝަނާސް އޮފީސް، ނޭޝަނަލް ކޮލެޖް އޮފް ޕޮލިސިން، ޕްރޮފެޝަނަލް ސްޓެންޑާޑްސް، ނޭޝަނަލް އިންޓެލިޖެންސް ސާވިސް، އަދި އިންޓާނަލް ސެކިއުރިޓީ އެންޑް އޮޕަރޭޝަނަލް ސަޕޯޓް ހިމެނެ އެވެ.
އޭގެ އިތުރުން ފޮރެންސިކް ސާވިސަސް، ސެންޓްރަލް އިންވެސްޓިގޭޝަންސް، މާލޭ ޕޮލިސް، ހުޅުމާލޭ ޕޮލިސް، ނޮދަން ޕޮލިސް، ސަދަން ޕޮލިސް، ސާވިސް ޑިވެލޮޕްމަންޓް، ސާވިސް ސަޕޯޓް އަދި ޑިޖިޓަލް ޑޭޓާ އެންޑް ޓެކްނޮލޮޖީ ހިމެނެ އެވެ.
އެ މަގާމުތަކަށް އައްޔަނުކުރަނީ ކޮން އޮފިސަރުންތަކެއް މިހާތަނަށް ހާމަކޮށްފައެއް ނުވެ އެވެ.
މި އޮނިގަނޑާ އެއްގޮތަށް ހންގުމުގެ ސިޔާސަތުތަކަށް ގެންނަންޖެހޭ ބަދަލުތައް ގެނެސް، އައު އޮނިގަނޑު ތަންފީޒުކުރުމުގެ އަމަލީ މަސައްކަތްތައް ފަށާފައިވާ ކަމަށް ވެސް ފުލުހުން ބުނެ އެވެ.
މި އޮނިގަނޑު ފަރުމާކޮށްފައިވަނީ ތަފާތު ދާއިރާތަކުގެ މެދުގައި އޮންނަ ގުޅުން ބަދަހިކޮށް، އޮޕަރޭޝަނަލް ހިންގުން ހަރުދަނާކުރުމާއެކު، ރައްޔިތުންނާ ގާތުން ހިދުމަތް ފޯރުކޮށްދޭ ފުލުހުންގެ ނިޒާމެއް ގާއިމުކުރުމަށް ކަމަށް އެ އިދާރާއިން ބުނެ އެވެ.
މިދިޔަ އެޕްރީލް މަހުގެ ތެރޭގައި ފުލުހުންގެ އިދާރާއަށް ވަނީ މުޅިން އައު ކޮމިޝަނަރެއް އައްޔަނުކޮށްފަ އެވެ. އެއީ ފުލުހުންގެ ވަޒީފާއިން މީގެކުރިން ކަނޑާލާފައި ހުރި އަހުމަދު މުހައްމަދު (ޓޫފޯ) އެވެ. މި ބަދަލުތަކަކީ ޓޫފޯ އެ މަގާމާ ހަވާލުވުމަށް ފަހު އިދާރީ ހިންގުމަށް ގެންނަ އެންމެ ބޮޑެތި ބަދަލުތަކެވެ.
މިދިޔަ ސަރުކާރުގައި ޓޫފޯ މަގާމުން ވަކި ކުރީ، ބޮޑެތި ކުށްތަކަށް ތުހުމަތު ކުރެވޭ ފުލުހުންގެ ސީނިއާ އޮފިސަރުން މަގާމުން ވަކި ކުރަންޖެހޭނެ ކަމަށް ފުލުހުންގެ އާ ގާނޫނުގައި ބަޔާންކޮށްފައި އޮތުމުންނެވެ.
ފުލުހުންގެ ލޯންޗުތަކެއް ގަތުމުގައި ޓޫފޯ ކޮރަޕްޝަން ހިންގައި ފައިސާތަކެއް ނެގި ކަމަށް ބުނާ މައްސަލައެއް ވެސް ފުލުހުން ބެލި އެވެ. އެ މައްސަލަ މިފަހުން އަނެއްކާ އެންޓި ކޮރަޕްޝަން ކޮމިޝަނަށް ވެސް ވަނީ ހުށަހަޅައިފަ އެވެ. ނަމަވެސް، އެ މައްސަލަ ކުރިއަށްނުދެ އެވެ.
ފުލުހުންގެ ހިދުމަތުން އޭނާ ވަކިކުރަން އޯގަސްޓު 9، 2021، ގައި ޕޮލިސް ބޯޑުން ލަފާދިނީ ފުލުހުންގެ ފައިސާއިން ރިޝްވަތު ނެންގެވި މައްސަލައަށް ވެސް ރިއާތަތް ކުރުމަށްފަހު ކަމަށް މި ނޫހަށް އެނގިފައިވެ އެވެ. އެ ލަފަޔާ އެއްގޮތަށް ޓޫފޯ ވަޒީފާއިން ވަކިކުރީ އޮކްޓޫބަރު 10، 2021، ގަ އެވެ.
އައު އޮނިގަނޑަކަށް އަމަލުކުރަން ފުލުހުން ފަށާފައިވާއިރު އެ އިދާރާއަށް އަމާޒުވަމުންދާ ފާޑުކިޔުން ވެސް ވަނީ ވަރަށް ބޮޑުތަނުން އިތުރުވެފަ އެވެ.
