ސަރުކާރުގެ ހަރަދުތައް ކުޑަކުރަން ފަށާފައިވާ މަސައްކަތުގެ ދަށުން، ދައުލަތުގެ ބައެއް ކުންފުނިތައް އުވާލައި، ކުންފުނިތަކެއް ވިއްކާލަން ސަރުކާރުން ވިސްނަމުން އަންނަ ކަމަށް "އަދަދު" އަށް އެނގިއްޖެ އެވެ.
އިތުބާރު ހުރި މަސްދަރަކުން މައުލޫމާތު ދީފައިވާ ގޮތުގައި މިފަހުން ކެބިނެޓުގައި، ދައުލަތް ހިއްސާވާ ކުންފުނިތަކާ ގުޅޭ ގޮތުން ފިނޭންސް މިނިސްޓްރީން ތައްޔާރުކޮށްފައިވާ ކަރުދާހަކަށް މަޝްވަރާކުރުމަށް ފަހު ސަރުކާރުން އަންނަނީ ކުންފުނިތަކާ ގުޅޭ ބޮޑެތި ނިންމުންތަކެއް ނިންމަން ތައްޔާރުވަމުންނެވެ.
އެގޮތުން އުވާލަން މަސައްކަތް ކުރަމުންދާ އެއް ކުންފުންޏަކީ މޯލްޑިވްސް ސްޕޯޓްސް ކޯޕަރޭޝަން އެވެ. ސްޕޯޓްސް ކޯޕަރޭޝަނަކީ ކުޅިވަރު ގާނޫނުގެ ދަށުން 2016 ގައި އުފެއްދި، ސައްތައިންސައްތަ ދައުލަތުން ހިއްސާވާ ކުންފުންޏެކެވެ.
މިއީ ފުރަތަމަ ތިން އަަހަރަށް ފަހު އަމިއްލައަށް ލިބޭ އާމްދަނީން ހިންގަން ޖެހޭ ކަމަށް ގާނޫނުގައި ބަޔާންކުރާ ކުންފުންޏެކެވެ. މިހެން ނަމަވެސް މިއަދާ ހަމައަށް ވެސް މި ކުންފުނި ހިންގަމުން އަންނަނީ ދައުލަތުގެ ބަޖެޓުން ހަރަދުކޮށްގެންނެވެ. މި ކުންފުނި އުވާލަންޏާމުން ކުޅިވަރު ގާނޫނު އިސްލާހުކުރަން ޖެހޭނެ އެވެ.
މި ނޫނަސް މިގޮތަށް އެއްވެސް ފައިދާއެއް ނުވާ ގޮތަށް، އަދި އެކަށީގެންވާ އެއްވެސް ހިދުމަތެއް މަސައްކަތެއް ނުކުރެވޭ އެހެން ކުންފުނިތަކާ ދޭތެރޭ ވެސް ގޮތްތަކެއް ނިންމުން މިހާރު ކުރިއަށްދާ މަސައްކަތުގެ ތެރޭގައި ހިމެނެ އެވެ.
ޕްރައިވަޓައިޒޭޝަން މަސައްކަތުގެ ދަށުން ވިއްކާލަން މަސައްކަތް ކުރަމުންދާ ކުންފުނިތަކެއް އަދި ނިންމާފައި ނުވީ ނަމަވެސް، ބަޖެޓުން ހަރަދުކޮށްގެންނާއި ފައިދާވަމުންދާ ބައެއް ކުންފުނިތައް ވެސް ހިމެނެ އެވެ. އެގޮތުން, އެއްކޮށް ވިއްކާލާށާއި، އާންމުންނަށް ހިއްސާ ވިއްކާށާއި، ޕަބްލިކް-ޕްރައިވެޓް ޕާޓްނާޝިޕް މޮޑެލްގެ ދަށުން ކުންފުނިތަކަށް ބަދަލު ގެންނަން ސަރުކާރުން އަންނަނީ ވިސްނަމުންނެވެ.
ބަޖެޓަށް ބުރަ ކުޑަކުރަން ދައުލަތުގެ ކުންފުނިތައް ޕްރައިވަޓައިޒް ކުުރުމާއި ރީސްޓްރަކްޗާ ކުރުމަކީ ބައިނަލްއަގުވާމީ މާލީ އިދާރާތަކުން އަބަދު ވެސް ލަފާދޭ ކަމެކެވެ. މައިގަނޑު މައްސަލައަކީ ކޮންމެ އަހަރެއްގެ ބަޖެޓުން ކުރަން ޖެހޭ ހަރަދާ އެއްވަރަށް ކުންފުނިތަކަށް އާމްދަނީ ނުލިބުމާއި ޕްރޮޖެކްޓުތައް ހިންގަން ނަގާފައިވާ ދަރަނި ސަރުކާރުން އަދާކުރަން ޖެހުމެވެ.
ކުރީ ސަރުކާރުގައި ވެސް މިކަމަށްޓަކައި މަސައްކަތްތަކެއް އޭރުގެ ފިނޭންސް މިނިސްޓްރީން ކުރި އެވެ. އެގޮތުން ދައުރުގެ ކުރީކޮޅު ފާސްކުރި ބަޖެޓުތަކުގައި ކުންފުނިތައް ޕްރައިވަޓައިޒް ކޮށްގެން އާމްދަނީ ހޯދަން ޖެހި އެވެ. ނަމަވެސް ފަހުން ސަރުކާރުގެ ވިސްނުން ބަދަލުވެ އެއްވެސް ކުންފުންޏެއް ވިއްކާ ނުލާ ގޮތަށް ނިންމީ އެވެ.
ފިނޭންސް މިނިސްޓްރީން 2022 އަށް ހުށަހެޅި ބަޖެޓުގައިވާ ގޮތުގައި އެހާތަނަށް ދައުލަތް ހިއްސާވާ 32 ކުންފުންޏެއް އޮތް އޭގެ ތެރެއިން 13 ކުންފުންޏަކީ ކެޕިޓަލް އެހީ އާއި ސަބްސިީ އާއި ގްރާންޓްގެ ގޮތުގައި އެހީ ލިބެމުން އަންނަ ކުންފުނިތަކެވެ. މި ކުންފުނިތަކުގެ ތެރެއިން ބަރާބަރަށް ޑިވިޑެންޑް ދައްކަނީ 10 ކުންފުނިންނެވެ.
