Advertisement

ސަރުކާރު ކުންފުނިތައް ޕްރައިވެޓައިޒް ކުރަން މިއަހަރު ފަށާނެ

14 ޖޫން 2021 - 08:46 0

މުހައްމަދު ވިޝާމް

މުހައްމަދު ވިޝާމް

ފިނޭންސް މިނިސްޓަރު އިބްރާހިމް އަމީރު "އަދަދު"އަށް އިންޓަވިއު ދެއްވަނީ: މިއަހަރު ނިމުމުގެ ކުރިން ސަރުކާރުގެ ކުންފުނިތައް ޕްރައިވަޓައިޒް ކުރުމުގެ ޕްރޮގްރާމް ފަށާނެ ކަމަށް ވިދާޅުވި. -ފޮޓޯ: ހުސެއިން ވަހީދު/ އަދަދު


ސަރުކާރު ކުންފުނިތައް ޕްރައިވެޓައިޒް ކުރަން މިއަހަރު ފަށާނެ

14 ޖޫން 2021 - 08:46 0

ސަރުކާރުގެ ކުންފުނިތައް ޕްރައިވެޓައިޒް ކުރުމުގެ ޕްރޮގްރާމް މިއަހަރު ނިމުމުގެ ކުރިން ފެށުމަށް އަމާޒުހިފާފައިވާ ކަމަށް ފިނޭންސް މިނިސްޓަރު އިބްރާހިމް އަމީރު ވިދާޅުވެއްޖެ އެވެ.

ސަރުކާރުން އާމްދަނީ ހޯދަން މި އަހަރަށް ހުށަހަޅާފައިވާ ކަންކަމުގެ ތެރޭގައި ސަރުކާރު ކުންފުނިތައް ޕްރައިވަޓައިޒް ކުރުން ހިމެނޭއިރު ކުންފުނިތަކުގެ ހިއްސާ ވިއްކައިގެން 460 މިލިއަނެއްހާ ރުފިޔާ މި އަހަރު އާމްދަނީގެ ގޮތުގައި ލިބޭނެ ކަމަށް ސަރުކާރުން ލަފާކޮށްފައިވެ އެވެ.

އެ މަސައްކަތް ފިނޭންސް މިނިސްޓްރީން އިސްވެ ކުރަމުންދާއިރު، އެކަމުގެ ދިރާސާތައް މިހާރު ނިމިފައިވާއިރު، މި އަހަރު ނިމުމުގެ ކުރިން އެ ޕްރޮގްރާމް ފަށަން އަމާޒުހިފާފައިވާ ކަމަށް "އަދަދު"އަށް ދެއްވި ހާއްސަ އިންޓަވިއުއެއްގެ ތެރެއިން މިނިސްޓަރު ވިދާޅުވި އެވެ.

"އަޅުގަނޑުމެން ބޭނުންވަނީ ވީހާވެސް ޓްރާންސްޕޭރަންޓުކޮށް ހުރިހާ ސްޓޭކްހޯލްޑަރުން ވެސް ބައިވެރިކޮށްގެން އަދި މި މަސައްކަތަށް ހާއްސަ ބޭރުގެ ފާމެއް ވެސް ބައިވެރިކޮށްގެން މީގަ ކުރިއަށްދާނީ. މިކަމުގެ އެކްސްޕާޓުންނާއެކު އަޅުގަނޑުމެން މަސައްކަތް ކުރާނީ،" އަމީރު ވިދާޅުވި އެވެ.

އަދި އެކަމުގައި ކުރިއަށްދާނެ މަގު ޗާޓެއް ވަރަށް އަވަހަށް އިއުލާނުކުރާނެ ކަމަށާއި އަމާޒަކީ މިއަހަރު ނިމުމުގެ ކުރިން ޕްރައިވަޓައިޒް ކުރުމުގެ މަސައްކަތް ފެށުންކަން މިނިސްޓަރު ހާމަކުރެއްވި އެވެ.

އެ ޕްރޮގްރާމުގައި ވަކި ކުންފުނިތަކަކަށް އިސްކަން ދެއްވާތޯ ކުރި ސުވާލަށް ޖަވާބު ދެއްވަމުން އަމީރު ވިދާޅުވީ މިހާރު އެކުލަވާލާފައިވާ ކަރުދާހުގައި ހުރިހާ ކުންފުނިތަކަށް ވެސް ބަލައި، ޕްރައިވަޓައިޒް ކުރެވޭނީ ކޮން ކުންފުނިތަކެއް ކޮން މިންވަރަކަށްތޯ ވެސް ފާހަގަކޮށްފައިވާނެ ކަމަށެވެ.

"އޭގެ ފަހުން އިކޮނޮމިކް ކައުންސިލަށް ވެސް ގެންގޮސްގެން އަޅުގަނޑުމެން ބަލާނަން ސްޓްރެޓިޖިކް ޕާޓްނާއެއްތޯ ބޭނުންވަނީ؟ ޑޮމެސްޓިކް އައިޕީއޯ [އާއްމުންނަށް ހިއްސާ ވިއްކުން] އަކަށްތޯ ދާނީ؟ ބޭރުގެ އައިޕީއަކަށްތޯ ދާނީ؟،" މިނިސްޓަރު ވިދާޅުވި އެވެ.

ސަރުކާރުގެ ކުންފުނިތައް ޕްރައިވެޓައިޒް ކުރަން ހުށަހެޅުމުން އަމާޒުވެފައިވާ ފާޑުކިޔުންތަކަށް އިޝާރާތް ކުރައްވަމުން އަމީރު ވިދާޅުވީ ކުންފުނިތައް ޕްރައިވެޓައިޒް ކުރަނީ ސަރުކާރަށް އާމްދަނީ އިތުރުކުރުމުގެ ބޭނުމުގައި ނޫން ކަމަށެވެ.

މިނިސްޓަރު ވިދާޅުވި ގޮތުގައި ދުނިޔޭގެ އެހެން ގައުމުތަކުގައި ވެސް ޕްރައިވެޓައިޒް ކުރުމުން އުފެއްދުންތެރިކަން އިތުރުވެ، ކުންފުނިތަކުގެ ހިންގުން ހަރުދަނާ ވެގެންދާ ކަމަށެވެ.

ރާއްޖޭގައި ވެސް އާއްމުންގެ ހިއްސާ އޮންނަ ދައުލަތުގެ ކުންފުނިތަކުގެ ހިންގުމާއި ފައިދާ ބެހުމުގައި ވެސް، ސަރުކާރުގެ ސަތޭކަ ޕަސަންޓް ހިއްސާ އޮންނަ ގައުމުތަކާ އަޅާބަލާއިރު ވަރަށް ބޮޑަށް ވެސް ރަނގަޅު ކަމަށް މިސާލެއް ނަންގަވަމުން އަމީރު ވިދާޅުވި އެވެ.

ސަރުކާރުގެ ކުންފުނިތައް ޕްރައިވެޓައިޒް ކުރުމުގެ އިތުރުން، އާމްދަނީ އިތުރުކުރަން ސަރުކާރުން ހުށަހެޅިކަން ކޮވިޑް-19ގެ ހާލަތުގައި ލަސްތަކެއް ހުރި ނަމަވެސް، އެ މަސައްކަތްތައް ކުރެވެމުންދާކަމަށް މިނިސްޓަރު ވިދާޅުވި އެވެ.

އެގޮތުން، "ރިއަލް އެސްޓޭޓް ޓޫރިޒަމް" ރާއްޖެ އަށް ތައާރަފު ކޮށްގެން 150 މިލިއަނަށް ވުރެ ގިނަ ރުފިޔާ ލިބޭނެ ކަމަށް އަންދާޒާކޮށްފައިވާއިރު، އެ މަސައްކަތް ޓޫރިޒަމް މިިނިސްޓްރީ އާއި އިކޮނޮމިކް މިނިސްޓްރީ ގުޅިގެން ކުރެވެމުންދާ ކަމަށް މިނިސްޓަރު ވިދާޅުވި އެވެ.

އެގޮތުން، ބޭރުގެ މަހުޖަނުންނަށް އަމާޒުކުރާ "ސެކަންޑް ހޯމް" އާއި ރަށްތައް ތަރައްގީކޮށް ވިއްކުމާ ގުޅޭ ގަވައިދެއް ހަދަންޖެހޭއިރު، އެ މަސައްކަތް ގާތްގަނޑަކަށް ނިމިފައިވާ ކަމުގެ މައުލޫމާތު ލިބިފައިވާކަމަށް އަމީރު ހާމަކުރެއްވި އެވެ.

އޭގެ އިތުރުން އާ ޓެލެކޮމް ލައިސެންސެއް ދޫކުރުމާއި މާލެއަށް ކޮންޖެޝަން އާއި ޕާކިން ފީ އެއް ތައާރަފް ކުރުމަށް ބަޖެޓުގައި ހިމަނާފައިވާއިރު، އެކަމުގެ މަސައްކަތްތައް ވެސް ކަމާގުޅޭ އިދާރާތަކުން ކުރިއަށްދާ ކަމަށް އަމީރު ވިދާޅުވި އެވެ.