ވާކް ވިސާއާ ގުޅޭ ވަގު ސްކީމެއް ހިންގާ ކަމުގެ ތުހުމަތުގައި ބަންގްލަދޭޝްގައި ހުންނަ ސައުދީ އަރަބިއްޔާގެ އެމްބަސީގެ ދެ މުވައްޒަފުން ހައްޔަރުކޮށްފި އެވެ.
ސައުދީ އަރަބިއްޔާގެ އޯވާސައިޓް އެންޑް އެންޓި ކޮރަޕްޝަން އޮތޯރިޓީ (ނަޒާހާ) އިން ބުނީ ދެ މީހުން ހައްޔަރު ކުރި އިރު، އެ ސްކީމްގައި އިތުރު 11 މީހުންގެ ބައިވެރިވުން ހިމެނޭ ކަމަށެވެ.
ހައްޔަރު ކުރި މީހުންގެ ތެރޭގައި ހިމެނެނީ އެމްބަސީގެ ކޮންސިއުލާ ސެކްޝަންގެ ވެރިޔާ އަބްދުﷲ ފަލާހް މުދީ އަލް ޝައްމާރީ އަދި އެ ސެކްޝަންގެ ޑެޕިއުޓީ ހާލިދު ނާސިރް އަޔިދް އަދި ގަހްތާނީ އެވެ.
އެ ސްކީމް ހިންގުމުގައި އިންޓީރިއާ މިނިސްޓްރީގެ ދެ އޮފިޝަލުންނާއި ބަންގްލަދޭޝްގެ އަށް މީހުންނާއި ފަލަސްތީނުގެ އިންވެސްޓަރެއް ބައިވެރިވާ ކަމަށް ނަޒާހާއިން ތުހުމަތު ކުރެ އެވެ.
ބެލެވޭ ގޮތުގައި އެ ވަގު ސްކީމްގެ ދަށުން ވާކް ވިސާ ދޫކުރުމުން އެމްބަސީގެ އޮފިޝަލުންނަށް 14.4 މިލިއަން ޑޮލަރު ލިބިފައިވެ އެވެ.
އެކަމުގައި ބައިވެރިވި ކަމަށް ތުހުމަތުވާ ބައެއް މީހުންގެ ގެތައް ބަލައި ފާސްކުރި އިރު 5.38 މިލިއަން ޑޮލަރާއި، ރަނާއި، ލަގްޒަރީ ކާރު ފެނިފައިވެ އެވެ.
